އިބޫގެ ރަނިންގމޭޓަކަށް ފައިސަލް ހަމަޖައްސަން އެމްޑީޕީގެ ގައުމީ މަޖިލީހުން ރުހުން ލިބިއްޖެ

މި އަހަރުގެ ރިޔާސީ އިންތިހާބުގައި އެމްޑީޕީގެ ރިޔާސީ ޓިކެޓްގައި ވާދަ ކުރައްވާ ކެންޑިޑޭޓް އިބްރާހިމް މުހައްމަދު ސޯލިހު (އިބޫ)ގެ ރަނިންގމޭޓަކަށް ރައްޔިތުންގެ މަޖިލީހުގެ ކާށިދޫ ދާއިރާގެ މެމްބަރު ފައިސަލް ނަސީމް ހަމަޖެއްސުމަށް އެމްޑީޕީގެ ގައުމީ މަޖިލީހުގެ ރުހުން އޮތް ކަމަށް ފާސްކޮށްފި އެވެ.

ޖުމްހޫރީ ޕާޓީގެ މެމްބަރު ފައިސަލް ނަސީމްއާމެދު ޕާޓީން ރުހުން އޮތް ކަމަށް އެ ޕާޓީގެ ގައުމީ މަޖިލީހުން ފާސްކުރީ އަންގާރަ ދުވަހުގެ ހަވީރު އެމްޑީޕީން ބޭއްވި ގައުމީ މަޖިލީހުގެ ބައްދަލުވުމެއްގައި އެވެ. މިއަހަރު ބާއްވާ ރިޔާސީ އިންތިހާބުގައި އެމްޑީޕީން ނެރޭ ކެންޑިޑޭޓުގެ ރަނިންގމޭޓަށް ފައިސަލް ހަމަޖައްސަން ޖުމްހޫރީ ޕާޓީން ހުށައަޅާފައި ވާތީ ފައިސަލް އާމެދު އެމްޑީޕީގެ ގައުމީ މަޖިލީހުގެ ރުހުން އޮތް ކަމަށް ބަޔާންކުރާ ގަރާރު އެ މަޖިލީހަށް ހުށައެޅުއްވީ އެ ޕާޓީގެ ނައިބު ރައީސް މުހައްމަދު ޝިފާޒް އެވެ. އަދި އެ ގަރާރު ފާސްކޮށްފައި ވަނީ ގައުމީ މަޖިލީހުގައި އެ ވަގުތު ބައިވެރިވެ ވަޑައިގެންނެވި 53 މެމްބަރުންގެ ތެރެއިން 52 މެމްބަރުންގެ ވޯޓާއެކު އެވެ. އަދި ވަކި ކޮޅަކަށް ވޯޓު ނުދެއްވާ އެއް މެމްބަރަކު އިންނެވި އެވެ.

Advertisement

ފައިސަލް ނަސީމް ފުވަމުލަކުގައި ހުންނަވައިގެން ނޫސްވެރިނަށް މައުލޫމާތު ދެއްވަނީ:- ފައިސަލް އިބޫގެ ރަނިންމޭޓަކަށް ހަމަ ޖައްސަން އެމްޑީޕީގެ ގައުމީ މަޖިލީހުން ވަނީ ފާސްކޮށްފައި

ގުޅިފައިވާ ސިޔާސީ ޕާޓީތަކުން ކެންޑިޑޭޓުގެ ރަނިންމޭޓަކު ކަނޑައަޅާނީ ޖުމްހޫރީ ޕާޓީން ކަމަށްވިއަސް އެ ކޯލިޝަނުގައި ހިމެނޭ ހުރިހާ ޕާޓީތަކަކުން ރަނިންގމޭޓަކަށް ކަނޑައަޅާ ބޭފުޅަކަށް އެއްބަސްވާން ޖެހެ އެވެ. އިބޫގެ ރަނިންގމޭޓަކަށް ފައިސަލް ހަމަ ޖެއްސުމަށް ޖުމްހޫރީ ޕާޓީން ނިންމީ އެ ޕާޓީގެ ކައުންސިލްގައި ނެގުނު ވޯޓަކަށް ފަހު އެވެ.

އަދި އެއަށްފަހު އިބޫ ރާއްޖެތެރެއަށް ކުރެއްވި ކެމްޕެއިން ދަތުރުފުޅުގައި ވެސް ފައިސަލް ވަނީ ބައިވެރިވަޑައިގެންފަ އެވެ. އެގޮތުން އައްޑޫ ސިޓީ އާއި ފުވަމުލަކު ސިޓީއަށް އިބޫ އާއި ފައިސަލް ވަޑައިގެން ބައެއް ގެތަކަށް ވެސް ޒިޔާރަތްކުރައްވާފައިވެ އެވެ.