ރައީސް ޔާމީނާ މެދު ދުވަހަކު ވެސް ހިތްހެވެއް ނުވާނެ، އެދެނީ އިބޫ އިންތިހާބު ކާމިޔާބު ކުރުމަށް: އަބްދުﷲ ސައީދުގެ ބައްޕަ
އަބްދުﷲ ސައީދުއާ މެދު ރައީސް ޔާމިން އަމަލު ކުރެއްވީ ބޭ އިންސާފުން
ކުރީގެ އުއްތަމަފަނޑިޔާރު އަބްދުﷲ ސައީދުގެ ބައްޕާފުޅު، މުހައްމަދު ސައީދު (މ)ގެ އަރިހުގައި އިބޫ (ކ) އާއި ފައިސަލް -- ފޮޓޯ: ރާއްޖެ އެމްވީ
ކުރީގެ އުއްތަމަ ފަނޑިޔާރުގެ އަބްދުﷲ ސައީދާއިމެދު ރައީސް އަބްދުﷲ ޔާމިން އަމަލު ކުރެއްވި ގޮތުން ދުވަހަކު ވެސް އެމަނިކުފާނަށް ހިތްހެޔޮ ނުވާނެ ކަމަށް އަބްދުﷲ ސައީދު ބައްޕާފުޅު މުހައްމަދު ސައީދު ވިދާޅުވެއްޖެއެވެ.
އައްޑޫ ސިޓީގައި ދިރިއުޅުއްވަމުން ގެންދަވާ އަބްދުﷲ ސައީދުގެ ބައްޕާފުޅުގެ އަރިހަށް ގުޅިފައިވާ ސިޔާސީ ޕާޓީތަކުގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިހާއި އެމަނިކުފާނުގެ ރަނިންމޭޓް ފައިސަލް ނަސީމް ވަނީ ހޮނިހިރު ދުވަހު ވަޑައިގެންފަ އެވެ. އަދި އެއަަށް ފަހު ރާއްޖެއެމްވީ. އަށް ދެއްވި އިންޓަވިއު ގައި މުހައްމަދު ސައީދު ވިދާޅުވީ އިބްރާހިމް މުހައްމަދު ސޯލިހަށް ރިޔާސީ ޓިކެޓް ދިނުމަށް ނިންމެވުމުން ވަރަށް ބޮޑަށް އުފާކުރެއްވި ކަމަށެވެ. އަދި ވިދާޅުވީ އެމަނިކުފާނުގެ ދަރިކަލުން އަބްދުﷲ ސައީދަށް ބޭ އިންސާފުން ލިބެމުންދާ އަނިޔާއިން މިންޖުވާނީ މި ވެރިކަން އެ ގޮތަށް ބަދަލުވުމުން ކަމަށެވެ.
"އިބްރާހިމް މުހައްމަދު ސޯލިހް މި ކަމަށް އިސްކުރެވުނީމަ އަޅުގަނޑު ވަރަށް އުފާވި. އެއީ އަޅުގަނޑުގެ ދަރިފުޅު މިކަމުން މިންޖުވާނެ ކަމަށް ފެންނަނީ މި ދައުރު މި ގޮތަށް ނިމުނީމަ،" މުހައްމަދު ސައީދު ވިދާޅުވި އެވެ.
އަދި އެހެންމެ އިބޫގެ ރަނިންމޭޓަކަށް ހަމަ ޖައްސަވާފައިވާ ފައިސަލް ނަސީމުއާ މެދު ވެސް މުހައްމަދު ސައީދު ވަނީ ވަރަށް ބޮޑަށް ހިތްހަމަ ޖެހުން ފާޅު ކުރައްވާފަ އެވެ. އޭގެ އިތުރުން މުހައްމަދު ސައީދު ވިދާޅުވީ އަބްދުﷲ ސައީދު ޖަލަށް ލާފައި ވަނީ އެއްވެސް ކުށެއް ނެތި ބޭ އިންސާފުން ކަމަށް އެ އާއިލާއިން ގަބޫލު ކުރާ ކަމަށެވެ. އަދި އޭގެ ސަބަބުން ރައީސް އަބްދުﷲ ޔާމީނަށް ހިތްހެޔޮ ނުކުރެވޭނެ ކަމަށް ވެސް ވިދާޅުވި އެވެ.
"އަބްދުﷲ ސައީދާއި މެދު ޔާމިން އަމަލު ކުރެއްވީ އަޅުގަނޑުމެން ދުވަހަކު ވެސް ހީނުކުރާ ގޮތަކަށް. އަޅުގަނޑުމެން ހިތްހެޔޮ ނުކުރާނަން ދުވަހަކު ވެސް. އެއްވެސް ސަބަބެއް ނެތި އެ ދަރިފުޅު ގެންގޮސް ޖަލަށް އެ ލީ. އަދި ދުވަހަކު ވެސް އަޑެއް ނާހަން ދުނިޔޭގެ އެއް ވެސް ތަނެއްގައި އުއްތަމަ ފަނޑިޔާރުކަމުގައި ހުރި މީހަކު ދަމާކޫއްތާފައި ގެންދިޔަ ވާހަކައެއް. ދެން ކިހިނެއްތޯ ޔާމީނަށް ހިތްހެޔޮ ކުރެވޭނީ،" މުހައްމަދު ސައީދު ވިދާޅުވި އެވެ.
މީގެ އިތުރުން އޭނާ ވިދާޅުވީ އަބްދުﷲ ސައީދުގެ އާއިލާގެ އެންމެން ވެސް ތިބީ އިބްރާހިމް މުހައްމަދު ސޯލިހަށް އިންތިހާބު ކާމިޔާބު ވުމަށް އެދި އެދި ކަމަށެވެ.
