ސިޔާސީ އާ ޕާޓީއެއް އުފައްދަން ހަސީން ހުށަހަޅުއްވައިފި
15 ޖުލައި 2018 | އާދީއްތަ 16:25ޕާޓީ އުފައްދަން އާދިއްތަ ދުވަހު ވަނީ އީސީ އަށް ހުށަހަޅާފައި
ޤާނޫނީ ވަކީލް އަބްދުﷲ ހަސީން
ސިޔާސީ އާ ޕާޓީއެއް އުފައްދަން ގާނޫނީ ވަކީލް އަބްދުﷲ ހަސީން އިލެކްޝަންސް ކޮމިޝަނަށް ހުށަހަޅުއްވައިފިއެވެ.
ރާއްޖެއެމްވީއަށް މައުލޫމާތު ދެއްވަމުން ހަސީން ވިދާޅުވީ ޕާޓީ އުފައްދަން އާދިއްތަ ދުވަހު އީސީ އަށް ހުށަހަޅާފައިވާ ކަމަށެވެ.
މީގެ ހަފްތާއެއްގެ ކުރިން އެމްޑީޕީން ވަކިވެ ވަޑައިގެންނެވި ހަސީން ވިދާޅުވީ ސިޔާސީ އާ ޕާޓީއެއް އުފެއްދެވުމަށް ނިންމެވީ އެމްޑީޕީއާ އެއްވެސް މައްސަލައެއް ޖެހިގެން ނޫން ކަމަށެވެ.
މިހާތަނަށް ސިޔާސީ ދާއިރާގައި ހަމައެކަނި އެމްޑީޕީގެ ހަރާތްތަކުގެ އިސް ސަފުން ފެނިފައިވާ ހަސީން ވިދާޅުވީ މިއީ އެއްވެސް ސިޔާސީ ޕާޓީ އަކާއި އިދިކޮޅަށް ވެސް އަދި އެއްކޮޅަށް ވެސް އުފައްދާ ޕާޓީއެއް ނޫން ކަމަށެވެ.
ޕާޓީއެއް އުފެއްދުމުގެ މަގުސަދަކީ މަސައްކަތްތެރިންގެ ހައްގުތަކާއި އިޖުތިމާއީ އަދާލަތު ގާއިމުކުރުމަށް ފުޅާ ދާއިރާއެއްގައި މަސައްކަތް ކުރުން ކަމަށް އޭނާ ވިދާޅުވި އެވެ.
ޕާޓީ އުފެއްދުމާ ގުޅޭ ގޮތުން އީސީ އިން ހުއްދަ ދިނުމާއެކު އިތުރު ތަފްސީލްތައް ހާމަ ކުރައްވާނެ ކަމަށް ހަސީން ވިދާޅުވިއެވެ.
ރާއްޖެ އެމްވީއަށް މައުލޫތު ދެއްވަމުން އީސީގެ މެންބަރު އަދި ތަރުޖަމާނު އަހުމަދު އަކްރަމް ވިދާޅުވީ ސިޔާސީ ޕާޓީއެއް އުފެއްދުމަށް އެ ކޮމިޝަނަށް އާދިއްތަ ދުވަހު ހުށަހަޅާފައިވާ ކަމަށެވެ. އަދި ޤާނޫނީ ގޮތުން ބަލަންޖެހޭ ކަންކަން ބަލައި ނިންމުމަށްފަހު ފެށޭ ހަފްތާގެ ތެރޭގައި ޖަވާބެއް ދެއްވާނެ ކަމަށް އޭނާ ވިދާޅުވިއެވެ.
މިއަހަރުގެ އޭޕްރީލް މަހުގެ ތެރޭގައި ވެސް ސިޔާސީ ދެ ޕާޓީއެއް އުފައްދަން އީސީއަށް ހުށަހަޅި އެވެ. ނަމަވެސް ބައެއް ޝަރުތުތައް ފުރިހަމަ ނުވާ ކަމަށް ބުނެ އެ ދެ ޕާޓީ އުފެއްދުމުގެ ހުއްދަ އިލެކްޝަންސް އިން ދީފައެއް ނުވެއެވެ.
