ކޯލިޝަންގެ މެނިފެސްޓޯއަށް ގާސިމްގެ 11 ހިޔާލެއް!
5 ޖުލައި 2018 | ބުރާސްފަތި 02:26ޖޭޕީގެ ވައުދުގެ ގޮތުގައި ނެރުއްވީ އަމިއްލަފުޅު ޚިޔާލެއް ކަމަށް ގާސިމް ވިދާޅުވި
ގުޅިފައިވާ ޕާޓީތަކުގެ ޕްރެސް ކޮންފަރެންސް - ފައިލް ފޮޓޯ
ޖުމްހޫރީ ޕާޓީން ބައިވެރިވާ ކޯލިޝަން ސަރުކާރެއްގެ އެއްބަސްވުމުގައި ހިމަނަން ފެންނަ މުހިންމު ބައެއް ޖުމްހޫރީ ޕާޓީގެ ބާނީ، މާމިގިލީ ދާއިރާގެ މެމްބަރު ގާސިމް އިބްރާޙިމް ހުށަހަޅުއްވައިފި އެވެ.
ގުޅިފައިވާ ޕާޓީތަކުން ރައްޔިތުންނަށް ހުށަހަޅާ ވައުދުތަކުގެ ނަމުގައި ނެރެފައިވާ ކަރުދާހުގައި 11 ކަމެއް ކަމެއް ހިމެނެ އެވެ. އޭގެ ތެރެއިން ބައެއް ކަންކަމަކީ އެމްޑީޕީން އާންމުކޮށްފައިވާ އެ ޕާޓީގެ މެނިފެސްޓޯއާ ފުށުއަރާ ކަންކަމެވެ.
ޖަނަރުމަނު ވިލާތުގައި ހުންނެވި ގާސިމް ވިދާޅުވި ގޮތުގައި ބުދަ ދުވަހުގެ ރޭ އޭނާ ނެރުއްވި ކަރުދާހަކީ "އަމިއްލަ ޚިޔާލެއް" ކަމަށެވެ. ޖޭޕީ ބައިވެރިވާ ކޯލިޝަން ސަރުކާރުގެ މެނިފެސްޓޯގައި އެކަންކަން ހިމެނުއްވުމަކީ ބޭނުންފުޅުވާ ކަމަކަށް ވާތީވެ، އެކަންކަން އާންމުކުރެއްވީ ކަމަށް ގާސިމް ވިދާޅުވި އެވެ.
ޖޭޕީގެ ވައުދުތަކުގެ ގޮތުގައި ގާސިމް ހުށަހަޅުއްވާފައިވާ ކަރުދާހުގައި ވަނީ އިސްލާމްދީނަށް އެއްވެސް މިންވަރެއްގެ އުނިކަމެއް އަންނާނެ އެއްވެސް ކަމެއް ނުކުރުމަށާއި، ދިވެހި ރައްޔިތުންނަށްޓަކައި ހަތަރު ޕާޓީ ވަކިނުވެ ރައްޔިތުންނަށްޓަކައި ހެޔޮލަފާ ކޯލިޝަން ވެރިކަމެއް ކުރުމަށާއި، މިފަދަ ވެރިކަމެއްގައި ޕާޓީތަކުން އެއްބަޔަކު އަނެއް ބަޔެއްގެ ޚިޔާލުތަފާތުވުންތަކަށް ފުރިހަމައަށް އިހުތިރާމްކޮށް، އެއްވެސް ޕާޓީއެއްގެ އެއްވެސް ވަޒީފާއެއް ނުވަތަ ސަރުކާރާއި ރައްޔިތުންގެ މަޖިލީހުގެ ހިއްސާއެއް އުނި ނުވަތަ ވަކި ނުކޮށް ރައްޔިތުންގެ އުންމީދުތަކާއެކު ރައްޔިތުންނަށް އޯގާތެރި ހެޔޮ ވެރިކަމެއް ކޮށްދިނުމަށެވެ.
ގާސިމްގެ ޚިޔާލު ކަރުދާހުގައި، މޯލްޑިވްސް ނޭޝަނަލް ޑިފެންސް ފޯސް އަދި މޯލްޑިވްސް ޕޮލިސް ސަރވިސްގެ ބާރާއި ޚިދުމަތަށް ގާނޫނަކުން ވިޔަސް ނުވަތަ އެނޫން ގޮތަކުންވިޔަސް އެއްވެސް އުނިކަމެއް ނުގެނައުމަށާއި އެއްވެސް ހާލަތެއްގައި އެއްވެސް މިންވަރަކަށް ރާއްޖެއިން ބޭރުގެ ސިފައިން ދިވެހި ދައުލަތުގެ ޚިދުމަތަށް ނުގެނައުމަށް ހިމަނާފައިވެ އެވެ.
އެއްވެސް ހާލަތެއްގައި އެއްވެސް މިންވަރަކަށް ރާއްޖެއިން ބޭރު ފަނޑިޔާރުން ރާއްޖޭގެ ފަނޑިޔާރުގެތަކަށް ނުގެނެއުމަށާއި ސިޔާސީ ނުފޫޒުން ޖުޑީޝަލް ސަރވިސް ކޮމިޝަނާއި ފަނޑިޔާރުން މިނިވަންކުރުމަށް ގާސިމް ހުށަހަޅުއްވާފައިވާއިރު، ދައުލަތުގެ ސްޓްރެޓީޖިކް އެއްވެސް އިންވެސްޓްމެންޓެއް، ގައުމުގެ އެއްވެސް މައި ދޮރާއްޓެއް ރާއްޖޭގެ އިސްތިގްލާލަށް ބުރޫއަރާނެ ފަދަ ގޮތަކަށް އެއްވެސް ބައެއްގެ އަތްމައްޗަށް ދޫކޮށް ނުލުމަށާއި، ދައުލަތުގެ މިފަދަ މުހިންމު ހުރިހާ އަސާސްތަކެއް ހުންނަންވާނީ އަބަދުވެސް ދިވެހި ދައުލަތާއި ސަރުކާރުގެ ފުރިހަމަ ބާރުގެ ދަށުގައި ކަމަށް ގާސިމް ހުށަހަޅުއްވާ ވައުދުގައި ހިމެނެ އެވެ.
ރާއްޖޭގެ ބިން ބޭރު ބަޔަކަށް މިލްކުކުރެވޭ ގޮތަށް ގާނޫނުއަސާސީއަށް ގެނެވުނު އިސްލާހާއި، 65 އަހަރުން މަތީގެ މީހުންނަށް ރައީސުލްޖުމްހޫރިއްޔާކަމަށް ކުރިމަތިނުލެވޭގޮތަށް ގާނޫނުއަސާސީގެ އަސާސީ ހައްގުތަކުގެ ބާބަށް އުނިކަމެއް ލިބޭނެ ފަދަ ގޮތަށް ގެނެވުނު އިސްލާހާއި، މީގެ އިތުރަށް 2008 ގައި ތަސްދީގު ކުރެވުނު ފެހި ގާނޫނުއަސާސީގެ އަސްލާއި އޭގެ ރޫހާ ޚިލާފު އެންމެހައި ކަންކަން އަލުން ގާނޫނުއަސާސީގެ އަސްލަށް ރުޖޫއަކުރުމަށް ވެސް ގާސިމް ހުށަހަޅުއްވަ އެވެ.
އޭގެ ތެރޭގައި ޚާއްސަކޮށް ރައްޔިތުންގެ އަސާސީ ހައްގުތަކަށް އުނިކަން ލިބޭ ގޮތަށާއި، ޚިޔާލުފާޅުކުރުމާއި މިނިވަން ނޫސްވެރިކަމާއި، ރައްޔިތުންގެ މަޖިލީހާއި އެމަޖިލީހުގެ މެންބަރުންގެ ހައްގުތަކާއި، ފަނޑިޔާރުގެއާއި ފަނޑިޔާރުންގެ ހައްގުތަކާއި، މުޅި ދައުލަތާއި ރައްޔިތުންގެ ހައްގުތަކަށް އުނިކަންލިބޭ ގޮތަށް ފާސްކުރެވުނު އެންމެހާ ގާނޫނުތަކާއި ގަވާއިދެއް އަލުން އިސްލާހު ކުރަންޖެހޭ ކަމަށް ވެސް ގާސިމް ދެކެވަޑައިގަންނަވަ އެވެ.
އެއްވެސް ބާވަތެއްގެ މަސްތުވާތަކެއްޗެއް، ބާރުގަދަ ވިޔަސް ބާރު ކުޑަވިޔަސް ދިވެހި މުޖުތަމައުގައި ބަލައިނުގަތުމަށް ހުށަހައަޅާފައިވާއިރު ކޯލިޝަން މެނިފެސްޓޯއެއް އިއުލާންކޮށް އެމެނިފެސްޓޯ ހުރިހާ ޕާޓީތަކުގެ ފަރާތުން ތަންފީޒުކުރުމަށް ވެސް ހުށަހަޅާފައިވެ އެވެ. އަދި މި ސަރުކާރުގައި އެކި ގޮތްގޮތުން އަނިޔާ ލިބިފައިވާ ރައްޔިތުންނަށް އިންސާފު ލިބިދެވި ދައުލަތުން އޭގެ ގެއްލުމުގެ ބަދަލު ލިބިދިނުމަށް ވަނީ ހުށަހަޅާފައެވެ.
މީގެ އިތުރަށް ގާސިމް ހުށަހަޅާ ވައުދުތަކުގެ ގޮތުގައި ވަނީ ރާއްޖޭގެ ވެރިކަން ހިންގުމުގެ ނިޒާމް ބަދަލު ނުކުރުމަށާއި، ކޮމަންވެލްތުގައި އަލުން ބައިވެރިވެ، ބައިނަލްއަގުވާމީ ދުނިޔެއާ ގުޅުން ބަދަހިކޮށް މިނިވަން ޚާރިޖީ ސިޔާސަތެއް ގާއިމްކުރުމަށް އެދިފައެވެ. އަދި ކޯލިޝަން ސަރުކާރުގެ ބޮޑެތި ހުރިހާ ނިންމުމެއް ކޯލިޝަންގެ އިސްވެރިންގެ ކައުންސިލެއް އުފައްދާ އެކައުންސިލުން ފާސްކޮށް ކުރިއަށް ގެންދިއުމަށް ވަނީ ހުށަހަޅާފައެވެ.
ޖޭޕީގެ ވައުދުތަކުގެ ގޮތުގައި ގާސިމް ނެރުއްވި ލިޔުމުގައި ވަނީ ދިވެހި ރައްޔިތުންގެ ރައްކާތެރިކަމާއި ހަމަޖެހުމާއި ގައުމުގެ އިސްތިގުލާލާއި ސިލްމާއި ސަލާމާއި މިއަދު ދިވެހިރާއްޖެ އޮތް ހާލަތުން ގައުމު ސަލާމަތްކުރުމަށްޓަކައި އެޕާޓީން ކޯލިޝަން ބައިވެރިންގެ ކިބައިން ވައުދުވާން އެދޭ ކަމަށެވެ.
މިއީ 2008 ވަނަ އަހަރާއި 2013 ވަނަ އަހަރުވެސް ޖުމްހޫރީ ޕާޓީން ވަރަށް އިޚުލާސްތެރިކަމާއި ވަރަށް ފޮނި އުންމީދާއެކު ރައްޔިތުންނާއި ގައުމުގެ ހައްގުގައި ނިންމި ނިންމުމާއި ކުރި ބުރަ މަސައްކަތުގެ ނަތީޖާއިން އުފެދުނު ސަރުކާރުތަކުން ކަންތައްތައް ވެގެންދިޔަގޮތުން މިއަދު އެޕާޓީން ގޮތެއް ނިންމުމުގައި ކޯލިޝަން އެއްބަސްވުމެއްގެ މައިގަނޑު ރުކުންތަކާއި އަސާސްތަކުގެ ތެރޭގައި ހިމަނަން ކޮންމެހެންވެސް އެދޭ މުހިންމު އުންސުރުތައް ކަމަށް ވެސް ގާސިމްގެ ނެރުއްވި ލިޔުމުގައިވެ އެވެ.
ޖުމްހޫރީ ޕާޓީ އަބަދުވެސް އޮންނާނީ ދިވެހި ރައްޔިތުންނާއި ދިވެހި ގައުމަށް އެންމެ ހަމަޖެހޭ ގޮތަކަށްކަން ފާހަގަކުރައްވައި އެޕާޓީން ބުނީ ޖެޕީއަކީ ރާއްޖޭގެ އާންމު ރައްޔިތުންގެ ޕާޓީއެއް ކަމަށާއި އަބަދުވެސް ތިބޭނީ ގައުމާއި ރައްޔިތުންނާ އެކުގައި ކަމަށާއި ވައުދުވާން ބޭނުންވަނީ، ކޯލިޝަން ހަދަން ބޭނުންވަނީ ދިވެހި ގައުމާ އެކުގައި، ދިވެހި ރައްޔިތުންނާ އެކުގައި ކަމަށް ވެސް ޖޫމްހޫރީ ޕާޓީން ވަނީ ބުނެފައެވެ.
