ގާސިމްގެ މައްސަލަ މިދަނީ ދިރާސާކުރަމުން، ދައުވާއެއް އަދި ނުކުރަން: ޕީޖީ
މަޖިލިސް މެންބަރުންނަށް ރިޝްވަތު ދިނުމުގެ ތުހުމަތު
ޖުމްހޫރީ ޕާޓީގެ ލީޑަރު އަދި މާމިގިލި ދާއިރާގެ މެންބަރު ގާސިމް އިބްރާހިމް
ޖުމްހޫރީ ޕާޓީގެ ލީޑަރު އަދި މާމިގިލި ދާއިރާގެ މެންބަރު ގާސިމް އިބްރާހިމްގެ މައްޗަށް ރިޝްވަތު ދިނުމުގެ ދައުވާކޮށްދިނުމަށް އެދި ފުލުހުން ހުށަހެޅި މައްސަލަ ދިރާސާކުރަމުންދާ ކަމަށް ޕްރޮސެކިއުޓާ ޖެނެރަލްގެ އޮފީހުން ބުނެފި އެވެ.
ގާސިމްގެ މައްޗަށް ދައުވާކޮށްދިނުމަށް އެދި ޕްރޮސެކިއުޓާ ޖެނެރަލްގެ އޮފީހަށް ފުލުހުން ހުށަހަޅާފައި ވަނީ އާދިއްތަ ދުވަހު އެވެ. މިކަމާ ގުޅޭ ގޮތުން ޕީޖީގެ މީޑިއާ އޮފިޝަލް ބުރާސްފަތި ދުވަހު ވިދާޅުވީ ފުލުހުން ހުށަހެޅި މައްސަލަ ދިރާސާކުރަމުންދާ ކަމަށާއި އަދި މިހާތަނަށް ގާސިމްގެ މައްޗަށް ދައުވާކޮށް، މައްސަލަ ކޯޓަށް ހުށަހަޅާފައިނުވާނެ ކަމަށެވެ.
ރައްޔިތުންގެ މަޖިލީހުގެ މެންބަރުންނަށް ރިޝްވަތު ދެއްވިކަމުގެ ތުހުމަތުގައި ދެ ފަހަރެއްގެ މަތިން ފުލުހުންގެ އިދާރާއަށް ގާސިމް ހާޒިރުކޮށް ސުވާލުކޮށްފައި ވެއެވެ. އެގޮތުން ފުރަތަމަ ފުލުހުންގެ އިދާރާއަށް ގާސިމް ހާޒިރުކޮށްފައިވަނީ މިދިޔަ މަހުގެ 29 ވަނަ ދުވަހު އެވެ.
ދެވަނަ ފަހަރަށް ގާސިމް ފުލުހުންގެ އިދާރާއަށް ހާޒިރުކުރީ އާދިއްތަ ދުވަހު އެވެ. އާދިއްތަ ދުވަހު ފުލުހުންގެ އިދާރާއަށް ގާސިމް ހާޒިރުކޮށް، ރައްޔިތުންގެ މަޖިލީހުގެ މެންބަރުންނަށް ރިޝްވަތު ދެއްވި ކަމުގެ ތުހުމަތާ ގުޅޭ ވީޑިއޯގެ އެނަލިސިސް ހެދުމަށް ގާސިމްގެ އަޑާއި ފޮޓޯ ނެގި އެވެ. އެހެންކަމުން ގާސިމްގެ މައްޗަށް ދައުވާކުރުމަށް ފޮނުވާފައި ވަނީ ފަސް ދުވަހުގެ ތަހުގީގަކަށް ފަހު އެވެ.
ރިޝްވަތު ދިން ކަމުގެ ތުހުމަތުކޮށްފައި ވަނީ ގާސިމް ވިދާޅުވި ގޮތުގައި، ގުޅިފައިވާ ޕާޓީތަކުން ބޭއްވި ނޫސްވެރިންގެ ބައްދަލުވުމުގައި، ރައްޔިތުންގެ މަޖިލީހުގެ މެންބަރުން އިތުރު ދައުރަކަށް ހޮވުމަށް އެހީތެރިވެ ދެއްވާނެ ކަމަށް ވިދާޅުވެފައިވާތީ އެވެ.
އެހެން ވިދާޅުވީ ރިޝްވަތު ދެއްވުމަށް ނޫން ކަމަށާއި، އެއީ އިތުރު ދައުރަކަށް އެ މެމްބަރުން އިންތިހާބުކުރުމަށް ޕާޓީގެ ތެރެއިން ކޮށްދެއްވަންޖެހޭ ހުރިހާ ކަމެއް ކޮށްދެއްވާނެކަމުގެ ވާހަކަ ކަމަށް ގާސިމް ވިދާޅުވި އެވެ. އެއީ އަމިއްލަ ޕާޓީގެ މެމްބަރުންނަށް ވިދާޅުވި ވާހަކައެއް ކަމަށް ވެސް ގާސިމް ވިދާޅުވި އެވެ.
ރިޝްވަތު ދެއްވި ކަމަށް ތުހުމަތުކުރާ މި މައްސަލައާ ގުޅިގެން ގާސިމް ރާއްޖެއިން ބޭރަށް ފުރާވަޑައިގަތުން މަނާކޮށް ކްރިމިނަލް ކޯޓުން ވަނީ އަމުރެއް ނެރެފަ އެވެ. ގާސިމްގެ ގާނޫނީ ވަކީލުން ވަނީ އެ އަމުރު ހައިކޯޓުގައި ބުދަ ދުވަހު އިސްތިއުނާފު ކޮށްފަ އެވެ.
