2018 ގެ ރިޔާސީ ވޯޓްގައި ގާސިމްގެ ނަން އޮންނާނެ: އަބްދުﷲ ރިޔާޒު

އަންނަ ރިޔާސީ އިންތިހާބުގެ ވޯޓް ކަރުދާސް ކޮޅުގައި ޖުމްހޫރީ ޕާޓީގެ ލީޑަރު ގާސިމް އިބްރާހިމްގެ ނަންފުޅު ބާއްވާނެ ކަމަށް އެޕާޓީގެ ޕާލިމެންޓަރީ ގްރޫޕްގެ ޑެޕިއުޓީ ލީޑަރު އަބްދުﷲ ރިޔާޒު ވިދާޅުވެއްޖެ އެވެ.

ޖުމްހޫރީ ޕާޓީގެ ފަރާތުން ލޯކަލް ކައުންސިލްގެ އިންތިހާބަށް ވާދަކުރައްވާ ކެންޑިޑޭޓުން ރަސްމީކޮށް އިއުލާނުކުރުމަށް އާދީއްތަ ދުވަހުގެ ރޭ، އެ ޕާޓީގެ މައި އޮފީސް، މ. ކުނޫޒުގައި ބޭއްވި ޖަލްސާގައި، ކިނބިދޫ ދާއިރާގެ މެމްބަރު ރިޔާޒު ވިދާޅުވީ މި ޖަލްސާއަކީ ހަމައެކަނި ލޯކަލް ކައުންސިލްގެ އިންތިހާބަށް ޖުމްހޫރީ ޕާޓީން ނުކުންނަ ޖަލްސާއެއް ނޫން ކަމަށާއި "މިރެއަކީ ސިޔާސީ މައިދާނުގައި ޖުމްހޫރީ ޕާޓީ އަކީ އެންމެ ކުރީގައި އޮންނަ ޕާޓީއަކަށް ހެދުމުގެ މަސައްކަތް ފެށި ރޭ" ކަމަށެވެ.

"އަޅުގަނޑުމެންނަށް ކުރެވެން އޮތް ހުރިހާ ކަމެއް ކުރާނަމޭ، ގާނޫނު އަސާސީ ބަދަލުކޮށް 2018 ގެ ޓިކެޓްގައި ޖުމްހޫރީ ޕާޓީގެ ލީޑަރު އޮނަރަބްލް ގާސިމް އިބްރާހިމްގެ ނަން ހިމެނުމަށް،" އޭނާ ވިދާޅުވި އެވެ.

އިމުރުން 65 އަހަރުން މަތީ ބޭފުޅުން ރިޔާސީ އިންތިހާބުގައި ވާދަ ނުކުރޭ ގޮތަށް ގާނޫނު އަސާސީއަށް އިސްލާހު ގެނައުމުން، ރިޔާސީ އިންތިހާބުގައި ވާދަކުރެއްވުމުގެ ފުރުސަތު ގާސިމް އަށް ވަނީ ގެއްލިފަ އެވެ. މިއީ ގާނޫނު އަސާސީއާ ހިލާފު އިސްލާހެއް ކަމަށް ރިޔާޒު ވިދާޅުވި އެވެ.

ގާސިމް އިބްރާހިމަށް ރިޔާސީ އިންތިހާބުގައި ވާދަކުރެވޭނެ ގޮތް ފަހިކުރުމަށްޓަކައި ރާއްޖެ އާއި ރާއްޖޭން ބޭރުގެ ފަރާތްތަކުގެ އެހީ ހޯއްދަވާނެ ކަމަށާއި އަދި ގާނޫނު އަސާސީ ބަދަލުކުރަން މަޖިލީހަށް ހުށަހަޅުއްވައި، އަދި ކޯޓުތަކަށް ވެސް އެ މައްސަލަ ހުށަހަޅުއްވާނެ ކަމަށް ރިޔާޒު ވިދާޅުވި އެވެ.

ރިޔާޒް ވިދާޅުވީ މިކަން ކާމިޔާބު ކުރެވޭނެ ކަން، މިހާރު ކަންކަން ވަމުންދާ ގޮތުން އެނގޭ ކަމަށެވެ. ނަމަވެސް އެކަމުގެ ތަފްސީއެއް އޭނާ ނުދެއްވަ އެވެ.

މަޖިލީހުގެ ރައީސް އަބްދުﷲ މަސީހް މަގާމުން ދުރުކުރުމުގެ ވޯޓަށް އިޝާރަތް ކުރައްވައި ރިޔާޒު ވިދާޅުވީ މި ދުވަސްވަރު، ބައިވަރު ހުށަހެޅުންތަކާއި ފައިސާ ވެސް ހުށަހަޅާނެ ކަމަށާއި، ނަމަވެސް އަގު ހުންނަންވާނީ ދިއްކޮށްލާ ނޫޓުގައި ނޫން ކަމަށެވެ. އަގު ހުންނަންވާނީ އޭނާ ވިދާޅުވި ގޮތުގައި އެބައެއްގެ ހިތުގެ އިލްހާސްތެރިކަމުގަ އެވެ.

ރިޔާޒް ވިދާޅުވީ ޖުމްހޫރީ ޕާޓީއަކީ ހުރިހާ ފަރާތްތަކެއްގެ ވެސް އުއްމީދު ކަމަށާއި އެހެން ކަމުން އެ ޕާޓީން ރައްޔިތުންނަށް ގެއްލުންވާ ކަންކަމުގައި ވޯޓް ނުދެއްވާނެ ކަމަށެވެ. އަބަދުވެސް މަސައްކަތް ކުރައްވާނީ ރައްޔިތުންނަށް ފައިދާވާ ކަންކަމުގައި ކަމަށް އޭނާ ވިދާޅުވި އެވެ.

ގައުމުގައި ހުރި މައްސަލަތައް ހަމައަކަށް އެޅުވުމަށް މަޖިލީހުގެ ރައީސް މަސީހު މަގާމުން ދުރުކުރަންޖެހޭކަން ފާހަގަ ކުރައްވައި ރިޔާޒު ވިދާޅުވީ މަޖިލީހުގެ ރައީސަށް ތާއިދެއް ނެތް ކަމަށެވެ. މަސީހް މަގާމުން ދުރުކުރަން، ޖުމްހޫރީ ޕާޓީގެ ތްރީލައިން ވިޕެއް ނެރުމަށް ވެސް ބާރު އަޅުއްވާނެ ކަމަށް ވެސް އޭނާ ވިދާޅުވި އެވެ.