ގާސިމްގެ މައްސަލަ އަނބުރާ ޕޮލިހަށް ފޮނުވާލައިފި

ރައްޔިތުންގެ މަޖިލީހުގެ މާމިގިލީ ދާއިރާގެ މެމްބަރު އަދި ޖުމްހޫރީ ޕާޓީގެ ލީޑަރު ގާސިމް އިބްރާހީމް ރިޝްވަތު ދިންކަމަށް ބުނާ މައްސަލަ، ފުލުހުން ތަހުގީގު ކުރުމުގެ މެންޑޭޓް ނެތް ކަމަށް ޕްރޮސެކިއުޓަރ ޖެނެރަލް (ޕީޖީ)ގެ އޮފީހުން ނިންމާފައިވާ ކަމުގެ މައުލޫމާތު ލިބިއްޖެ އެވެ.

އިތުބާރުހުރި ފަރާތަކުން "ރާއްޖެއެމްވީ"އަށް ކަށަވަރުން ކޮށްދިން ގޮތުގައި ޕީޖީ އޮފީހުން އެމައްސަލަ ދިރާސާކުރި ގާނޫނީ ވަކީލުންގެ ޓީމުން ނިންމާފައިވަނީ ރިޝްވަތަކީ ކޮރަޕްޝަންގެ އަމަލެއް ކަމަށްވާތީ ކޮރަޕްޝަން ހިމެނޭ މައްސަލަތައް ތަހުގީގު ކުރުމުގެ ޒިންމާ އޮތީ އެންޓި ކޮރަޕްޝަން ކޮމިޝަނަށް ކަމަށެވެ. އެ މައްސަލައަކީ ފުލުހުންގެ މެންޑޭޓްގައިވާ ކަމެއް ނޫން ކަމަށް ނިންމާ، އެ މައްސަލަ އަނބުރާ ފުލުހުންގެ އިދާރާއަށް ފޮނުވަން ނިންމާފައިޥާ ކަމަށް އޭނާ ވިދާޅުވި އެވެ.

Advertisement

ރިޝްވަތަކީ ކޮބައިކަން ހާމަކޮށްފައިވާ "ކޮރަޕްޝަން ހުއްޓުވުމައި މަނާކުރުމުގެ ގާނޫނު"ގެ ދެވަނަ މާއްދާގެ (ހ)ގައި ބުނަނީ ސަރުކާރުން ނުވަތަ ސަރުކާރުގެ ފަރާތަކުން ކުރާ ނުވަތަ ކުރަން ގަސްތުކުރާ ކަމަކާ ނުވަތަ މުއާމަލާތަކާ ގުޅޭ ގޮތުން، ވަކިފަރާތަކަށް ލުޔެއް، ނުވަތަ ފަސޭހައެއް، ނުވަތަ ހެވެއް، ނުވަތަ އެއްވެސް ބާވަތެއްގެ މަންފާއެއް ލިބިދިނުމަށްޓަކައި، ނުވަތަ ވަކިފަރާތަކަށް ބުރައެއްގެ މަންފާއެއް ލިބިދިނުމަށްޓަކައި، ނުވަތަ ބުރައެއް ޖެއްސުމަށް، ނުވަތަ އުނދަގުލެއް ކުރުމަށް، ނުވަތަ އެއްވެސް ބާވަތެއްގެ ގެއްލުމެއް ދިނުމަށްޓަކައި، ނުވަތަ މިއިން ކަމެއް ކުރުމަށް ޝައުގުވެރިކުރުމަށްޓަކައި، ނުވަތަ މިއިންކަމެއް ކުރުމުން ދޭ އިނާމެއްގެ ގޮތުން، ނުވަތަ މިނޫން ގޮތަކުންވިޔަސް، ސަރުކާރުގެ ނުވަތަ ސަރުކާރު ބައިވެރިވާ ފަރާތެއްގެ މުވައްޒަފަކު އަމިއްލައަށް، ނުވަތަ ސަރުކާރު ބައިވެރިވާ ފަރާތެއްގެ މުވައްޒަފަކު އަމިއްލައަށް، ނުވަތަ އެހެން މީހަކު މެދުވެރިކޮށް، ނުވަތަ އެހެން މީހެއްގެ ފަރާތުންވިޔަސް، ރިޝްވަތު ހިފުމާއި، ރިޝްވަތު ލިބިގަތުމަށް އެދުމާއި، ލިބިގަތުމަށް އެއްބަސްވުމާއި އެފަދަ މުވައްޒަފަކަށް ރިޝްވަތު ދިނުމާއި، ދިނުމަށް ހުށަހެޅުމާއި، ދިނުމަށް އެއްބަސްވުމަކީ ކުށެއް ކަމަށެވެ.

އެންޓި ކޮރަޕްޝަން ކޮމިޝަންގެ ގާނޫނުގައި ބުނަނީ ކޮރަޕްޝަންގެ މައްސަލަތައް ބަލައި ތަހުގީގު ކުރުމާއި ތަހުގީގު ކުރުމަށްފަހު، ޝަރީއަތަށް ފޮނުވަންޖެހޭކަމަށް ފެންނަނަމަ އެމައްސަލައެއްގައި ދައުވާ ކުރުމަށް ޕްރޮސެކިއުޓަރ ޖެނަރަލްގެ އޮފީހަށް ފޮނުވުމަކީ އެންޓި ކޮރަޕްޝަން ކޮމިޝަންގެ މަސްއޫލިއްޔަތެއް ކަމަށެވެ.

އެންޓި ކޮރަޕްޝަން ކޮމިޝަންގެ ގާނޫނުގެ 23 ވަނަ މާއްދާގައި ކޮރަޕްޝަނަކީ ކޮބައިކަން ހާމަކޮށްފައިވާއިރު، އެމާއްދާގައި ބުނެފައިވަނީ ކޮރަޕްޝަން ހުއްޓުވުމާއި މަނާކުރުމުގެ ގާނޫނުގައި ބުނެފައިވާ ކުށްތައް ކަމަށެވެ.

އެހެންކަމުން ފުލުހުން ގާސިމްގެ މައްޗަށް ކުރާ ރިޝްވަތުގެ ތުހުމަތު ނިމުމަކަށް އައިއިރު، ދެން އެމައްސަލަ ތަހުގީގު ކުރުމުގެ ބާރުލިބިގެންވަނީ އެންޓި ކޮރަޕްޝަން ކޮމިޝަނަށެވެ.