ގާސިމްގެ މައްޗަށް ރިޝްވަތު ދިނުމުގެ ދައުވާކުރަން ފޮނުވައިފި

ޖުމްހޫރީ ޕާޓީގެ ލީޑަރު އަދި މާމިގިލި ދާއިރާގެ މެންބަރު ގާސިމް އިބްރާހިމްގެ މައްޗަށް ރިޝްވަތު ދިނުމުގެ ދައުވާކުރުމަށް ފޮނުވައިފި އެވެ.

ރާއްޖެއެމްވީ އަށް އިތުބާރު ހުރި މަސްދަރަކުން މައުލޫމާތު ލިބިފައިވާ ގޮތުގައި ގާސިމްގެ މައްޗަށް ރިޝްވަތު ދިނުމުގެ ދައުވާކޮށްދިނުމަށް އެދި ޕްރޮސެކިއުޓާ ޖެނެރަލްގެ އޮފީހަށް ފުލުހުން ހުށަހަޅާފައިވަނީ އާދިއްތަ ދުވަހު އެވެ.

ރައްޔިތުންގެ މަޖިލީހުގެ މެންބަރުންނަށް ރިޝްވަތު ދިނުމުގެ ތުހުމަތުގައި ދެ ފަހަރެއްގެ މަތިން ފުލުހުންގެ އިދާރާއަށް ގާސިމް ހާޒިރުކޮށް ސުވާލުކޮށްފައި ވެއެވެ. އެގޮތުން ފުރަތަމަ ފުލުހުން އިދާރާއަށް ގާސިމް ހާޒިރުކޮށްފައިވަނީ މިދިޔަ މަހުގެ 29 ވަނަ ދުވަހު އެވެ.

ދެވަނަ ފަހަރަށް ގާސިމް ފުލުހުންގެ އިދާރާއަށް ހާޒިރުކުރީ އާދިއްތަ ދުވަހު އެވެ. އާދިއްތަ ދުވަހު ފުލުހުންގެ އިދާރާއަށް ގާސިމް ހާޒިރުކޮށް، ރައްޔިތުންގެ މަޖިލީހަށް ރިޝްވަތު ދިންކަމުގެ ތުހުމަތާ ގުޅޭ ވީޑިއޯގެ އެނަލިސިސް ހެދުމަށް ގާސިމްގެ އަޑާއި ފޮޓޯ ނެގި އެވެ. އެހެންކަމުން ގާސިމްގެ މައްޗަށް ދައުވާކުރުމަށް ފޮނުވާފައިވަނީ ފަސް ދުވަހުގެ ތަހުގީގަކަށް ފަހު އެވެ.

ރިޝްވަތު ދިން ކަމުގެ ތުހުމަތުކޮށްފައި ވަނީ ގާސިމް ވިދާޅުވި ގޮތުގައި، ގުޅިފައިވާ ޕާޓީތަކުން ބޭއްވި ނޫސްވެރިންގެ ބައްދަލުވުމުގައި، ރައްޔިތުންގެ މަޖިލީހުގެ މެންބަރުން އިތުރު ދައުރަކަށް ހޮވުމަށް އެހީތެރިވެ ދެއްވާނެ ކަމަށް ވިދާޅުވެފައިވާތީ އެވެ.

އެހެން ވިދާޅުވީ ރިޝްވަތުދެއްވުމަށް ނޫންކަމަށާއި، އެއީ އިތުރު ދައުރަކަށް އެ މެމްބަރުން އިންތިހާބުކުރުމަށް ޕާޓީގެ ތެރެއިން ކޮށްދެއްވަންޖެހޭ ހުރިހާ ކަމެއް ކޮށްދެއްވާނެކަމުގެ ވާހަކަ ކަމަށް ގާސިމް ވިދާޅުވި އެވެ. އެއީ އަމިއްލަ ޕާޓީގެ މެމްބަރުންނަށް ވިދާޅުވި ވާހަކައެއް ކަމަށް ވެސް ގާސިމް ވިދާޅުވި އެވެ.

ހޯމަ ދުވަހުގެ ރޭ ޖުމްހޫރީ ޕާޓީގެ އޮފީސް، ކުނޫޒުގައި ބޭއްވި ޖަލްސާގައި ވާހަކަ ދައްކަވަމުން ގާސިމް ވިދާޅުވީ އޭނާ ހައްޔަރުކުރަން އުޅޭ ވާހަކައާއި، ޕްރޮސެކިއުޓާ ޖެނެރަލް އެ މައްސަލަ ކޯޓަށް ފޮނުވަން އުޅޭ ވާހަކައާއި އަދި މިހާރު ވެސް ހުކުމް ލިޔެފައިވާކަމަށް އޭނާގެ ބޭފުޅުންގެ ގާތުގައި ކޮންމެވެސް ބަޔަކު ބުނެފައިވާ ކަމަށެވެ.

ގާސިމް ވިދާޅުވީ އޭނާގެ ބޭފުޅުންގެ ގާތުގައި މީހުން އެފަދަ ވާހަކަ ދެއްކިޔަސް، ޝަރީއަތެއް ނުހިންގައި ގާޒީ ހުކުމް ލިޔުއްވާނެ ކަމަށް ގަބޫލުނުކުރައްވާ ކަމަށެވެ. ގާސިމް ވިދާޅުވީ ވަރަށް ނިކަމެތި ހާލުގައި އުޅެނިކޮށް، އޭނާ މިހާރު ހުރި ހިސާބަށް ގެނެސްދެއްވީ މާތްﷲ ކަމަށާއި އެހެންކަމުން މިހާރަށް ވުރެ މާރަނގަޅު ހާލަތަކަށް ގެންދެވުމަށް ވެސް އެކަލާނގެ ކުޅަދުންވަންތަވެެވޮޑިގެންވާ ކަމަށެވެ.

އެހެންކަމުން ގާސިމް ވަނީ އެކަންކަމާ ފިކުރުކޮށް ރޮއި، ކަރުނަނޭޅުމަށް އޭނާގެ ބޭފުޅުންނަށް ގޮވާލައްވާފަ އެވެ.