އާސެނަލް އަށް ކުޅެމުން އަންނަ ޗިލީގެ ކެޕްޓަން އެލެކްސަސް ސަންޗޭޒް ހޯދުމުގެ ރޭހުގައި މެންޗެސްޓާ ސިޓީގެ މައްޗަށް ޕެރިސް ސެއިންޓް ޖާމަން (ޕީއެސްޖީ) ކުރިހޯދައިފި ކަމަށް ރިޕޯޓްތައް ބުނެފިއެވެ.

"ދަ މިރާ" އިން ބުނީ އަންނަ ޖެނުއަރީ ޓްރާންސްފާ އަށް އަމާޒުކޮށް ސަންޗޭޒް ހޯދުމަށް ކުރަމުންދިޔަ މަސައްކަތުގައި ކުރިހޯދަމުން ދިޔައީ ސިޓީ ކަމަށާއި، އެހެން ނަމަވެސް މިހާރު އޭނާ ހޯދުމަށް ސިޓީން ކުރަމުން ދިޔަ މަސައްކަތުގެ މައްޗަށް ޕީއެސްޖީ ކުރި ހޯދާފައިވާ ކަމަށެވެ.

ރިޕޯޓްތައް ބުނާގޮތުން ސަންޗޭޒް ހިތްހަމަޖެހޭ ވަރަށް މުސާރަ ދެވޭނެ ކްލަބަކީ ޕީއެސްޖީ ކަމަށާއި، އަދި އޭނާ ބަދަލުވުން އެންމެ ގާތީވެސް އެ ކްލަބަށް ކަމަށެވެ.

މި ސީޒަނަށް ފަހު އާސެނަލްއާއެކު ސަންޗޭޒް ހަދާފައިވާ އެއްބަސްވުން ހަމަވާއިރު، އޭނާ ހޯދުމަށް ގިނަ ކްލަބްތަކުން އަންނަނީ މަސައްކަތް ކުރަމުންނެވެ. އޭގެ ތެރޭގައި ބަޔާން މިއުނިކް ވެސް ހިމެނެއެވެ.

މީގެ ކުރިން ބާސާ އަށް ވެސް ކުޅެފައިވާ ސަންޗޭޒް އާސެނަލްގައި މޮޅު ކުޅުމެއް ފުރަތަމަ ސީޒަންގައި ދެއްކި ނަމަވެސް އަނިޔާގައި ހުރުމާ އެކު އެ ކްލަބާ އެކު ހޭދަކުރި ދެވަނަ ސީޒަނުގައި އެދެވޭ ކުޅުމެއް ވަނީ ދެއްކޭ ގޮތް ނުވެފައެވެ. އެހެން ނަމަވެސް އޭނާ ވަނީ މިދިޔަ ސީޒަނުގައި އާސެނަލްގައި މޮޅު ކުޅުމެއް ދައްކާފައެވެ. އެގޮތުން ކުޅުނު 51 މެޗުގައި އޭނާ ވަނީ 30 ލަނޑު ކާމިޔާބު ކޮށްފައެވެ.
ބާސާގައި ހޭދަކުރި ތިން ސީޒަނުގައި އެ ކްލަބަށް ކުޅުނު 141 މެޗުގައި 47 ލަނޑު ކާމިޔާބު ކޮށްފައިވާ ސަންޗޭޒް ވަނީ މިހާތަނަށް އާސެނަލް އަށް ކުޅުނު 155 މެޗުގައި 75 ލަނޑު ކާމިޔާބު ކޮށްފަ އެވެ.