ފަލަސްތީނުގެ ޣައްޒާގެ، ހަމާސް ޖަމާއަތަށް ނިސްބަތްވާ 25 ޓާގެޓަކަށް އިސްރާއީލުގެ ޖެޓުތަކުން ހަމަލާދީފިއެވެ. 

އިސްރާއީލުގެ އަސްކަރިއްޔާ އިން ބުނާގޮތުން އިސްރާއީލުން ޣައްޒާއަށް ހަމަލާ ދިނީ ހަމާސް އިން ފޮނުވަމުންދާ ރޮކެޓު ހަމަލާ އާއި އަދި މޯޓަރު ބަޑީގެ ހަމަލާތަކާ ގުޅިގެން ކަމަށެވެ. 

ރިޕޯޓުތައް ބުނާގޮތުން ބުދަ ދުވަހު ހެނދުނުގެ ވަގުތުގައި ޣައްޒާއަށް ދިން ހަމަލާތަކުގައި ފަލަސްތީނުގެ ތިން ރައްޔިތަކަށް އެކިވަރުގެ ކުދި އަނިޔާތަކެއް ލިބިފައިވެއެވެ. އަދި ޣައްޒާ އިން އިސްރާއީލަށް އައި ރޮކެޓު ހަަމަލާތަކާއި އަދި އޭގެ ރައްދުގައި އިސްރާއީލުން ދިން ހަމަލާތަކަކީ މިފަހުގެ ތާރީޚެއްގައި ދެފަރާތުން ބަދަލުކުރެވުނު އެންމެ ވަރުގަދަ ހަމަލާތައް ކަމަށްވެއެވެ. 

ޣައްޒާއިން އިސްރާއީލަށް ދިން ހަމަލާތަކުގައި އެއްވެސް މީހެއް މަރުވިކަމުގެ ނުވަތަ ޒަޚަމްވިކަމުގެ އެއްވެސް ރިޕޯޓެއް ލިބިފައެއްނުވެއެވެ. އިސްރާއީލު އަސްކަރިއްޔާ އިން ބުނާގޮތުގައި ޣައްޒާ އިން ވަނީ 45 ރޮކެޓު ހަމަލާއާއި މޯޓަރު ބަޑީގެ ހަމަލާތަކެއް އިސްރާއީލުގެ އެކި ސަރަހައްދުތަކަށް ދީފައެވެ. އަދި ޣައްޒާ އިން ފޮނުވާލި ހަތް ރޮކެޓެއް އިސްރާއީލުގެ އަޔަން ޑޯމް އެންޓި-މިސައިލް ޝީލްޑް ސިސްޓަމުން އިންޓަސެޕްޓްކޮށްފައިވާ ކަަމަށް އިސްރާއީލުގެ އަަސްކަރިއްޔާ އިން ބުނެއެވެ. 

ޣައްޒާއިން އިސްރާއީލަށް ފޮނުވާލި ރޮކެޓު ހަމަލާތަކުގެ ޒިންމާ ހަމާސް އިން ނަގާފައި ނުވިނަމަވެސް، އެއީ ވަރަށް ރަނގަޅަށް ކުރި ކަމެެއް ކަމަށް ބުނެ ހަމާސް އިން ވަނީ އެކަމަށް ތައުރީފުކޮށްފައެވެ. 

ފާއިތުވި ހަފްތާކުގެތެރޭގައި އިސްރާއީލުން ޣައްޒާ އަށް ހަމަލާ ދީފައިވާއިރު އިސްރާއީލުން ބުނަމުން ދަނީ އެހަމަލާތައް ދެމުން ދަނީ ފަލަސްތީނުން އިސްރާއީލުގެ ބިމަށް ދެމުންދާ ގެއްލުންތަކާ ގުޅިގެން ކަމަށެވެ. މާރޗް 30 ވަނަ ދުވަހުން ފެށިގެން ފަލަސްތީނު ރައްޔިތުން ދަނީ އިސްރާއީލް-ޣައްޒާ ބޯޑަރު ސަރަހައްދުގައި އިސްރާއީލުން ފަަލަސްތީނުގެ ރައްޔިތުންނާ ދެކޮޅަށް ހިންގަމުންދާ އެކި އަމަލުތަކާ ގުޅިގެން މުޒާހަރާ ކުރަމުންނެވެ. އިސްރާއީލުން ވަނީ މި މި މުޒާހަރާތަކާ ދެކޮޅަށް ހާލަތާ ނުބައްދަލު ބާރު ބޭނުންކޮށް 127 ފަލަސްތީނު ރައްޔިތުން މަރާލާ އަދި 3000 މީހަކު ޒަޚަމްކޮށްލާފައެވެ.