ރައީސް މައުމޫންގެ ދިފާއީ ހެކީގެ ގޮތުގައި 108 މީހަަކާއި، ދިފާއީ ހެކީގެ ގޮތުގައި 36 ލިޔުމެއް ހުށައެޅި
ރައީސް މައުމޫން އަބްދުލްޤައްޔޫމް ފުލުހުންގެ ލޯންޗަކުން ފައިބައިވަޑައިގަންނަވަނީ - އެމަނިކުފާނާއި ދެކޮޅަށް ދައުލަތުން 33 ހެއްކެއް ހުށައެޅި
ހެކީގެ ގޮތުގައި ހުށަހެޅި މީހުންނާއި ލިޔުންތަކުގެ ލިސްޓް ޕްރިންޓް ކޮށްފައި އޮތް ގޮތުގެ ސަބަބުން ކަމަށް ބުނެ ރައީސް މައުމޫން އަބްދުލްޤައްޔޫމްގެ މައްޗަށް އުފުލާފައިވާ ޓެރަރިޒަމްގެ ދައުވާގެ ދިފާއުގައި ހުށައެޅި ހެކިތައް ބަލައިނުގެން އަނބުރާ ފޮނުވާލައިފި އެވެ.
ރައީސް މައުމޫންގެ މައްޗަށް ދައުލަތުން އުފުލާފައިވާ ޓެރަރިޒަމްގެ ދައުވާގައި އެމަނިކުފާނުގެ ވަކީލެއްގެ ގޮތުގައި މަސައްކަތްކުރައްވަމުން އަންނަ ޤާނޫނީ ވަކީލް މައުމޫން ހަމީދު ވިދާޅުވީ ރައީސް މައުމޫންގެ ދިފާއީ ހެކީގެ ގޮތުގައި 108 މީހަަކާއި، ދިފާއީ ހެކީގެ ގޮތުގައި 36 ލިޔުމަކާއި ޝަރީއަތުގެ ކުރިން ހުށަހަޅަންޖެހޭ ހުށަހެޅުމުގެ ގޮތުގައި 29 ހުށަހެޅުމެއް ކްރިމިނަލް ކޯޓަށް ހުށައެޅުއްވި ކަމަށެވެ. ނަމަވެސް ދިފާއުގައި ހުށައެޅި މީހުންނާއި، ލިޔުންތައް އަނބުރާ ކްރިމިނަލް ކޯޓުން ފޮނުވާލާފައިވަނީ ލިސްޓް ޕްރިންޓްކުރި އިރު ބޯޑަރ ލައިންތައް އަރާފައި ނުވާކަމަށް ބުނެކަމަށް މައުމޫން ހަމީދު ވިދާޅުވި އެވެ.
ރައީސް މައުމޫނާ ދެކޮޅަށް ޓެރަރިޒަމުގެ ދައުވާ ކުރަނީ 2013 ވަނަ އަހަރުން ފެށިގެން ފަނޑިޔާރުންނަށް ރިޝްވަތުދީގެން ހުކުމްތައް ވަކިގޮތަކަށް ނެރުމަށް ރައީސް މައުމޫން މަޖުރޫބުކޮށްފައިވާ ކަމަށް ބުނެއެވެ. ގާނޫނާ ހިލާފަށް ސަރުކާރު ވައްޓާލުމަށް ރައްޔިތުންގެ މަޖިލީހުގެ ދަނގެތީ ދާއިރާގެ މެމްބަރު އިލްހާމް އަހުމަދާއި މައްޗަންގޮޅީ ދެކުނު ދާއިރާގެ މެމްބަރު އަބްދުﷲ ސިނާނަށް ރިޝްވަތު ދިނުމުގެ އިތުރުން 1 ފެބްރުއަރީގައި ސުޕްރީމް ކޯޓުން އަމުރު ނެރުމުގައި ރައީސް މައުމޫން ނުފޫޒު ފޯރުވާފައިވާ ކަމަށްވެސ ދައުވާގައި ބުނެފައިވެއެވެ.
ދައުލަތުން ވަނީ ރައީސް މައުމޫނާ ދެކޮޅަށް 33 ހެކި، ގަރީނާ ހުށަހަޅައިފައެވެ.
ރައީސް މައުމޫންގެ ދިފާއުގައި ހުށައެޅި ހެކިތައް ކްރިމިނަލް ކޯޓުން އަނބުރާ ފޮނުވާލާފައިވާއިރު މި މައްސަލާގައި މިދިޔަ މަހުގެ 28 ވަނަ ދުވަހު ބޭއްވި އިބްތިދާއީ އަޑުއެހުމުގައި ދިފާއީ ހެކި ހުށައެޅުމުގެ ފުރުސަތުދީފައިވަނީ ޖޫން މަހުގެ 3 ވަނަ ދުވަހުގެ މެންދުރު 12:00 ގެ ކުރިންނެވެ.
