ރާއްޖެޓީވީއަށް ފުލުހުން އައިސް، ރައީސް ނަޝީދުގެ ކޮންޓެންޓް ނުދައްކަން އަންގައިފި
ފުލުހުން ބުނީ ޕެރޯލްގެ ޤާނޫނުގެ ދަށުން އަންގާ އެންގުމެއްކަމަށް
ރާއްޖެ ޓީވީއަށް އައި ފުލުހުން
ކުރީގެ ރައީސް މުހައްމަދު ނަޝީދުގެ ކޮންޓެންޓް ރާއްޖެ ޓީވީއިން ނުދެއްކުމަށް ފުލުހުން އަންގައިފިއެވެ.
ރާއްޖެޓީވީ ހިންގާ އިމާރާތަށް މެންދުރުފަހު 3:00 ހާއިރު އާދައިގެ ހެދުމުގައި ތިބި 3 ފުލުހުން އައިސް، ރައީސް ނަޝީދުގެ ކޮންޓެންޓް ނުދެއްކުމަށް އެންގިއެވެ. އެއީ ކޮން ޤާނޫނަކުން ބާރުލިބިގެން އެންގި އެންގުމެއްތޯ އެހުމުން ފުލުހުން ބުނީ ޕެރޯލްގެ ޤާނޫނުގެ ދަށުން ކަމަށެވެ. އެހެންނަމަވެސް ޤާނޫނުގެ ކޮން މާއްދާއަކާ ހަވާލާދެއްވަނީތޯ އެހުމުން ފުލުހުންނަށް އެސުވާލަށް ޖަވާބު ދެވިފައެއް ނުވެއެވެ.
ފުލުހުން ރާއްޖެ ޓީވީގައި
ޕެރޯލްގެ ޤާނޫނުގެ ދަށުން ބްރޯޑްކާސްޓަރުން ޒިންމާވާން ޖެހޭ އެއްވެސް މާއްދާއެއް ނޯންނާނެއެވެ.
ރާއްޖެ ޓީވީގެ ސުވާލުތަކަށް ޖަވާބު ނުދެވުމުން ފުލުހުން ވަނީ މިއީ އިލްތިމާސެއް ކަމަށް ބުނެ ގޮސްފައެވެ. ފުލުހުން އައީ އެއްވެސް ކޯޓެއް އަމުރެއް ނެތިއެވެ.
ފުލުހުން އައުމުގެ ކުރިން ރާއްޖެޓީވީގެ ބްރޯޑްކާސްޓިންގ ކޮމިޝަންގެ ނައިބު ރައީސް ސޮފްވާން ވަނީ ރާއްޖެޓީވީގެ ލައިވް ކަވަރޭޖް ހުއްޓާލަން އަންގައި، ރާއްޖެ ޓީވީގެ ސީއޯއޯ ހުސެން ފިޔާޒް މޫސާގެ ފޯނަށް މެސެޖެއް ކޮށްފައެވެ.
