ރައީސް ނަޝީދުގެ އަޑެއް މި ރާއްޖެއަކުން ކަނޑުވައެއް ނުލެވޭނެ: އަސްލަމް
ރާއްޖޭގައި މީހުން ދިރިއުޅޭ 138 ރަށެއްގައި ވަނީ ކެމްޕެއިން ހިންގާފައި
ކެމްޕެއިން ނިންމުމުގެ ޖަލްސާގައި އަސްލަމް ވާހަަކަ ދައްކަވަނީ
ކިތައްމެ ވަރަކަށް ހުރަސްތައް ކުރިމަތި ކުރުވި ނަމަވެސް ރައީސް މުހައްމަދު ނަޝީދުގެ އަޑެއް މި ރާއްޖެއަކުން ކަނޑުވައެއް ނުލެވޭނެ ކަމަށް އެމަނިކުފާނުގެ ކެމްޕެއިން މެނޭޖަރ އަދި ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ މެންބަރު މުހައްމަދު އަސްލަމް ވިދާޅުވެއްޖެއެވެ.
ބުދަ ދުވަހުގެ ބާއްވާ އެމްޑީޕީގެ ޕްރައިމަރީގައި ވާދަކުރައްވާ ހަމައެކަނި ކެންޑިޑޭޓް ނަޝީދުގެ "ޖަޒީރާ ރައީސް"ގެ ކެމްޕެއިން ނިންމުމުގެ ގޮތުން އެމްޑީޕީ ހަރުގޭގައި އަންގާރަ ދުވަހުގެ ރޭ ބޭއްވި ޖަލްސާގައި އަސްލަމް ވިދާޅުވީ އެމްޑީޕީގެ ރިޔާސީ ޕްރައިމަރީގެ ކެމްޕެއިންގައި ރާއްޖޭގައި މީހުން ދިރިއުޅޭ 138 ރަށެއްގައި ވަނީ ކެމްޕެއިން ހިންގާފައި ކަމަށާއި 79 ރަށަކަށް ޓީމުތައް ދަތުރުކުރެވިފައިވާ ކަމަށެވެ. އަދި ސްކައިޕް މެދުވެރިކޮށް 115 ރަށެއްގައި ރައީސް ނަޝީދު ރައްޔިތުންނާ ބައްދަލުކޮށްފައިވާ ކަމަށާއި 9 ރަށެއްގައި ބޮޑު ޖަލްސާ ބޭއްވި ކަމަށެވެ.
މީގެ އިތުރުން ޒުވާނުންނަށް އަމާޒުކޮށްގެން ކޮފީވިތް ޖަޒީރާ ރައީސްގެ ނަމުގައި ހަރަކާތްތައް ބޭއްވުނު ކަމަށާއި ޒުވާނުންގެ ހުނަރު ދައްކާލުމުގެ ގޮތުން ހުނަރު ހާމަގެ ނަމުގައިވެސް ހަރަކާތްތަކެއް ބޭއްވިފައިވާ ކަމަށް އަސްލަމް ވިދާޅުވިއެވެ.
އަސްލަމް ވިދާޅުވީ ދޮރުން ދޮރަށް ރައީސް ނަޝީދާއެކު ގޭތަކަށް ސްކައިޕް މެދުވެރިކޮށް ހިނގުމުގެ ހަރަކާތްތަކެއް ހިންގިފައިވާ ކަމަށާއި ރަށުފެންވަރުގައާއި ޖަމާއަތުގެ ފެންވަރުގައިވެސް ވަރަށްގިނަ ހަރަކާތް ހިންގިފައިވާ ކަމަށެވެ.
ކެމްޕެއިންގައި ބައިވެރިވި އެންމެހާ ފަރާތްތަކަށް ޝުކުރު އަދާކުރައްވަމުން އަސްލަމް ވިދާޅުވީ މިހުރިހާ ހަރަކާތްތަކެއްވެސް ހިންގީ އެކަމަށް ވަރަށްގިނަ ހުރަސްތަކާއި ގޮންޖެހުންތައް ކުރިމަތި ކުރުވާފައި ވަނިކޮށް ކަމަށެވެ. އޭގެތެރޭގައި ސަރުކާރާއި ވަކިވަކި ވުޒާރާތަކުންވެސް އެފަދަ ކަންކަން ކޮށްފައިވާ ކަމަށާއި އަންގާރަ ދުވަހުގެ ރޭ ބޭއްވި ބޮޑު ޖަލްސާވެސް ބާއްވަން ބޭނުންވީ އަލިމަސް ކާނިވާ ސަރަހައްދުގައި ކަމަށެވެ. ނަމަވެސް އެތަންވެސް ނުލިބުނީ ކަމަށް އަސްލަމް ވިދާޅުވިއެވެ.
"އެކިއެކި ގޮންޖެހުންތައް މިދަނީ ކުރިމަތި ކުރުވަމުން. އަޅުގަނޑުމެންނަކީ މުއާސަލާތީ ގޮތުން މިއަށްވުރެ މާ ދަށްކޮށް އޮތް ޒަމާނެއްގައިވެސް އަޅުގަނޑުމެންގެ ތެރޭގައި އެބަތިއްބެވިއޭ އިނގިރޭސވިލާތުން މިނިވަން ރޭޑިއޯވެސް ފޮނުއްވައިދެއްވި ބޭފުޅުން. އަޅުގަނޑުމެން އެމްޑީޕީގެ މެންބަރުންނަކީ ޖަލްސާތައް ސީޑީގައި ރެކޯޑްކޮށްގެންވެސް ރަށްރަށުގެ ހޮޅުއަށިތަކަށް ފޯރުކޮށްދިން މީހުންތިބި ޕާޓީއޭ. ރައީސް ނަޝީދުގެ އަޑެއް މިރާއްޖެއަކުން ކަނޑުވައެއް ނުލެވޭނެޔޭ،" އެ މަނިކުފާނުގެ އިންޓަވިއުތައް ބްރޯޑްކާސްޓްކޮށްފި ނަމަ ފިޔަވަޅު އަޅާނެ ކަމުގެ އިންޒާރު ދީފައިވާއިރު، އެކަމަށް އިޝާރަތް ކުރައްވައި އަސްލަމް ވިދާޅުވިއެވެ.
އަސްލަމް ވިދާޅުވީ މިކެމްޕޭނުން ލިބިގެން ދިޔައީ އިތުރު ހިތްވަރަކާއި ޖޯޝެއް ކަމަށާއި ރައީސް ނަޝީދާއެކު ކުރެވުނު މަސައްކަތުގެ ސަބަބުން އެމަނިކުފާނު އެކުރައްވަމުން ގެންދަވާ މަސައްކަތްޕުޅުގެ މިސްރާބު ހިއްޕަވަންވީ ދިމާ އިތުރަށް ސާފުވެވަޑައިގެން އެމަނިކުފާނު އެކުރައްވާ މަސައްކަތްޕުޅުތަކަށް އިތުރު ހަލުވިކަމެއް ލިބިގެންދާނެކަމަށް ޝައްކު ނުކުރައްވާ ކަމަށެވެ.
"މިލާ ވޯޓަކީ ރައީސް ވަހީދާއި ރައީސް ޔާމީންގެ ފެއިލްވެފައިވާ ސިޔާސަތުގެ ސަބަބުން ފުނޑުފުނޑުވެފައިވާ މި ޖަޒީރާ ރާއްޖެ އަލުން އަނބުރާ އާރާސްތުކުރުމަށް ލިބިގެންދާ ފަހި ފުރުސަތެކޭ." އަސްލަމް ވިދާޅުވިއެވެ.
