ރަމަޟާންމަހު މިހާތަނަށް ފަސްލައްކައެއްހާ ރުފިޔާ ފިތުރު ޒަކާތުގެ ގޮތުގައި ދައްކާފައިވާ ކަމަށް އިސްލާމިކް މިނިސްޓްރީން ބުނެފިއެވެ.
އިސްލާމިކް މިނިސްޓްރީގެ މީޑިއާ އޮފިޝަލް ވިދާޅުވީ މިހާތަނަށް މާލެއަށް 493،538 ރުފިޔާ ޒަކާތުގެ ގޮތުގައި ދައްކާފައިވާކަމަށެވެ. އޭގެ ތެރޭގައި ހިމެނެނީ އެސްއެމްއެސް މެދުވެރިކޮށް އުރީދޫއަށް ދެއްކި 4،404ރ. އާއި އެޗްޑީސީއަށް ދެއްކި 20،221ރ، އާއި ބީއެމްއެލްއަށް ދެއްކި 245،975ރ. އަދި ވިލިމާލެ ޔުނިޓަށް ދެއްކި 13،629ރ. އެވެ.
ރަށްރަށުގައި ޒަކާތް ބަލައިގަންނާނީ އެރަށެއްގެ ރަށު ކައުންސިލުންނެވެ. މާލޭގައި ޒަކާތް ބަލައިގަތުން ކުރިއަށް ގެންދިއުމަށް ހަމަޖެހިފައިވަނީ އިސްލާމީ މަރުކަޒުގަ އެވެ. އެގޮތުން ހެނދުނު 10:30 ހުން ފެށިގެން 13:00 އަށް ޒަކާތް ބަލައިގަތުން ކުރިއަށްދާނެ އެވެ.
ވިލިމާލޭގައި ޒަކާތް ބަލައިގަތުން ކުރިއަށްގެންދާނީ ހައުސިންގ މިނިސްޓްރީގެ ވިލިމާލޭ ޔުނިޓްގަ އެވެ.
މީގެ އިތުރުން އެސްއެމްއެސް މެދުވެރިކޮށް ދިރާގު އަދި އުރީދޫއިން ފިތުރު ޒަކާތް ބަލައިގަތުންވެސް ކުރިއަށްދާނެ އެވެ. އިސްލާމިކް ބޭންކާއި ބޭންކް އޮފް މޯލްޑިވްސް މެދުވެރިކޮށް ވެސް ޒަކާތް ދެއްކޭނެ އިންތިޒާމު ހަމަޖެހިފައިވާ ކަމަށް އިސްލާމިކް މިނިސްޓްރީން ބުނެ އެވެ.
މާލޭ ސިޓީގައި ދިރިއުޅޭ މީހުން ޒަކާތް ދައްކަން ޖެހޭނީ އާދައިގެން ހަނޑުލުންނަމަ މީހަކަށް 13 ރުފިޔާ އެވެ. ތައިލެންޑް ހަނޑުލުންނަމަ މީހަކަށް 43ރ. އެވެ. އަދި ބާސްމަތީ ހަނޑުލުންނަމަ މީހަކަށް 81ރ އަށް ދައްކަންޖެހެ އެވެ.
ފިތުރު ޒަކާތުގެ މިންވަރަކީ މީހަކަށް 2.4 ކިލޯ ހަނޑުލުގެ މިންވަރެވެ. ޒަކާތް ނެރެންވާނީ އެބަޔަކު އަހަރުތެރޭގައި އާއްމުކޮށް ކައިއުޅުނު ހަނޑުލުގެ ބާވަތަކުން 2.4 ކިލޯ ހަނޑުލުގެ އަގަށްވާ މިންވަރެވެ.