އެމްއައިބީގެ އޭޓީއެމްއެއް ވެލާނާ އިންޓަރނޭޝަނަލް އެއަރޕޯޓުގައި ހުޅުވައިފި
އޭޓީއެމް މެދުވެރިކޮށް ދުވާލަކު 20,000ރ. އާ ހަމައަށް ފައިސާ ނެގޭނެ
ވެލާނާ އިންޓަރނޭޝަނަލް އެއަރޕޯޓުގައި ހުޅުވި އޭޓީއެމް
މޯލްޑިވްސް އިސްލާމިކް ބޭންކުގެ އޭޓީއެމްއެއް ވެލާނާ އިންޓަރނޭޝަނަލް އެއަރޕޯޓުގައި ހޯމަ ދުވަހު ހުޅުވައިފިއެވެ.
އެ އެޓީއެމް ހުޅުވައިދެއްވީ އެއަރޕޯޓްސް ކޮމްޕެނީގެ މެނޭޖިންގް ޑިރެކްޓަރ އާދިލް މޫސާ އަދި އެމްއައިބީގެ އެކްޓިން ސީއީއޯ އަހުމަދު ރިޒާއެވެ.
އަހުމަދު ރިޒާ ވިދާޅުވީ އޭޓީއެމް ހުޅުވުމުގެ މަޤްސަދަކީ އެއަރޕޯޓުގެ ހިދުމަތް ހޯދާ ހުރިހާ ފަރާތްތަކަށް ފަސޭހައިން އެމްއައިބީގެ ހިދުމަތްތަށް ފޯރުކޮށްދިނުމަށް ކަމަށާއި ދުވާލަކު20,000 ރ. އާ ހަމައަށް ފައިސާ ނެގޭނެ ކަމަށެވެ.
މި އޭޓީއެމް ހުޅުވާފައި ވަނީ ހުޅުލޭ ޑޮމެސްޓިކް ޓާމިނަލާ މާ ދުރު ނޫން ހިސާބެއްގައެވެ.
އެމްއައިބީ އިން ވަނީ މިއަހަރުގެ މެއި 8 ވަނަ ދުވަހު ފައިސާ މޮބައިލްގެ ނަމުގައި މޮބައިލް ބޭންކިންގ އެޕްލިކޭޝަނެއް ވެސް ލޯންޗުކޮށްފައެވެ.
މޮބައިލް އެޕްލިކޭޝަން މެދުވެރިކޮށް އެކައުންޓް ބެލެންސް ބެލުމާއި ޓްރާންސެކްޝަންގެ ހިސްޓްރީ ބެލުމާއި އެހެން ބޭންކްތަކުގެ އެކައުންޓުތަކަށާއި އެމްއައިބީގެ އެކައުންޓުތަކަށް ފައިސާ ފޮނުވުމުގެ އިތުރުން ފައިނޭންސިންގ ފެސިލިޓީސްތަކުގެ ތަފްސީލާއި ޗެކް ފޮތުގެ ތަފްސީލް ބަލާލެވޭނެއެވެ.
މޯލްޑިވްސް އިސްލާމިކް ބޭންކްގެ ހިދުމަތް ރާއްޖޭގައި ފަށާފައި ވަނީ 2011 ވަނަ އަހަރުގެ މާރޗް މަހުގައެވެ.
