ނަޒީރުގެ ޕާސްޕޯޓް ހިފަހައްޓާފައި ބޭއްވުމަށް ކޯޓުން އަނެއްކާ ވެސް އަމުރެއް ނެރެފި
ޕާސްޕޯޓް ހިފަހައްޓާފައިވަނީ ޖޫން މަހުގެ 21 ވަނަ ދުވަހާއި ހަމައަށް
އަދާލަތު ޕާޓީގެ މީޑިއާ ކޮމިޓީގެ މުޤައްރިރު އަލީ ނަޒީރު
ފުލުހުން އެދުމުން އަދާލަތު ޕާޓީގެ މީޑިއާ ކޮމިޓީގެ މުޤައްރިރު އަލީ ނަޒީރުގެ ޕާސްޕޯޓް ހިފަހައްޓުމުގެ މުއްދަތު އިތުރުކުރަން ކްރިމިނަލް ކޯޓުން އަނެއްކާ ވެސް ކޯޓު އަމުރެއް ނެރެފިއެވެ.
ނަޒީރުގެ ޕާސްޕޯޓް ފުރަތަމަ ހިފަހެއްޓީ މާޗް 21 ވަނަ ދުވަހު އެވެ.
ނަޒީރު ހޮނިހިރު ދުވަހުގެ ރޭ ކުރެއްވި ޓުވީޓެއްގައި ވިދާޅުވެފައިވަނީ އޭނާގެ ޕާސްޕޯޓް ހިފަހައްޓަން ތިން ވަނަ އަމުރު ނެރެފައިވާ ކަމަށާއި ތަހުގީގުގައި އިތުރު ކަމެއް ނެތް ކަމަށް ފުލުހުން ބުނިތާ ދެ މަސް ދުވަސް ވެފައިވާ ކަމަށެވެ. އަދި އެ ޒާތުގެ ކަންކަމުން ޔަޤީންވެ ކަށަވަރުވާ ކަމަކީ ދިވެހި ފުލުހުންގެ ޕްރޮފެޝަނަލް ނޫންކަމާއި ސިޔާސީ ނުފޫޒު ވެދެފައިވާ މިންވަރާއި ޤާނޫނު ނެގެހެއްޓުމުގައި ފެއިލް ވެފައި އޮތް މިންވަރު ކަމަށް ވެސް އޭނާ ވިދާޅުވިއެވެ.
ނަޒީރު ވަނީ އޭނާގެ ޕާސްޕޯޓް ހިފަހައްޓަން ކްރިމިނަލް ކޯޓުން ނެރެފައިވާ ކޯޓު އަމުރު ޓުވީޓްގައި ހާމަ ކުރައްވާފައެވެ.
އެ ކޯޓު އަމުރުގައިވަނީ ފެބްރުއަރީ 5 ވަނަ ދުވަހު ރާއްޖޭގައި ކުއްލި ނުރައްކަލުގެ ހާލަތު އިއުލާނު ކޮށްފައިވަނިކޮށް، އެ ޤަރާރުން އެއްވެ އުޅުމުގެ ޤާނޫނު ސަސްޕެންޑް ކުރެވިފައިވަނިކޮށް މާރޗް 16 ވަނަ ދުވަހު ސަރުކާރާއި އިދިކޮޅު ފަރާތްތަކުން ބޭއްވި ނޫސްވެރިންގެ ބައްދަލުވުމުގައި ރާއްޖޭގެ ހުރިހާ ރަށްތަކުން މަގުތަކަށް މީހުން ނިކުތުމަށާއި ސަރުކާރާ ދެކޮޅަށް އަޑުއުފުލާ މުޒާހަރާ ކުރުމަށް ހިތްވަރުދީ، ވާހަކަ ދައްކާފައިވާ ކަމަށް ތުހުމަތު ކުރެވޭ މައްސަލާގައި އޭނާ ރާއްޖެއިން ބޭރަށް ފުރައިގެން ގޮސްދާނެ ކަމަށް ފެންނާތީ އާއި އޭނާ ރާއްޖެއިން ބޭރަށް ފުރައިގެން ގޮސްފިނަމަ މައްސަލަ ތަހުގީގު ކުރަން ހުރަސް އެޅިދާނެ ކަމަށެވެ.
ނަޒީރުގެ ޕާސްޕޯޓް ހިފަހައްޓާ މުއްދަތަކީ މި މެއި މަހުގެ 22 ވަނަ ދުވަހުން ފެށިގެން ގޮސް ޖޫން މަހުގެ 21 ވަނަ ދުވަހާއި ހަމައަށެވެ.
