ހއ. ދިއްދޫ ކައުންސިލްގެ ރައީސް އަލީ ހާޝިމް ދީދީ ކޯޓު އަމުރެއްގެ ދަށުން ފުލުހުން ހައްޔަރު ކޮށްފައިވާތީ އެކަން ކުށްވެރިކޮށް އޭނާ މިނިވަން ކުރުމަށް މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)އިން ގޮވާލައިފިއެވެ.
އެމްޑީޕީން ބުނީ ހާޝިމް ހައްޔަރުކޮށްފައި ވަނީ އެއްވެސް އަސްލެއް ނެތް ތުހުމަތުތަކެއްގެ މައްޗަށްކަމަށާއި، އަދި ހާޝިމް ގެއިން ވެސް ފުލުހުންގެ ތުހުމަތުތަކަށް ވާގިދޭ ލިޔެކިޔުމެއްވެސް ފެނިފައިނުވާ ކަމަށެވެ.
ސައްހަނޫން ލިޔުމެއް ތައްޔާރުކުރިކަމަށް ބުނެ، ދިއްދޫ ކައުންސިލްގެ ރައީސް ހައްޔަރުކޮށްފައިވާއިރު މީގެކުރިންވެސް ސަރުކާރުންވަނީ އޭނާއަށް އެކިބާވަތުގެ އުނދަގުލާއި، ތުރާ ކުރިމަތިކުރުވާފައިވާ ކަމަށް ވެސް އެމްޑީޕީން ބުންޏެވެ.
އެގޮތުން ސިޔާސީ ހައްޔަރީން މިނިވަންކުރުމަށާއި، ރައްޔިތުންގެ މަޖިލީހުގެ 12 މެންބަރެއްގެ ގޮނޑި ނުގެއްލޭކަމަށް ކަނޑައަޅާ ސުޕްރީމް ކޯޓުން 2018 ފެބްރުއަރީ 1 ގައި ނެރުނު ޢަމުރު ތަންފީޒުކުރުމަށް ގޮލުމާ ގުޅިގެން ހާޝިމް ސަސްޕެންޑުކޮށްފައިވެ އެވެ.
މިއާއެކު ދިއްދޫގައި އިމާރާތްކޮށްފައިވާ ފްލެޓުތައް ރަށު ކައުންސިލްގެ ބަހެއްނެތި ސަރުކާރަށް ތާއީދުކުރާ ފަރާތްތަކަށް ހަމައެއްނެތި ދީފައިވާ މައްސަލާގައި ނުރުހުން ފާޅުކޮށް، އެކަމުގެ މައުލޫމާތު ރައްޔިތުންނަށް ފޯރުކޮށްދިނުމަށް މަސައްކަތްކޮށްފައިވާތީ 2017 ސެޕްޓެންބަރުގައި ވެސް އޭނާ ވަނީ ސަސްޕެންޑުކޮށްފައެވެ.
އެމްޑީޕީން ބުނީ ލާމަރުކަޒީ ނިޒާމުގެ މަގްސަދު ގެއްލޭގޮތަށް، އެނިޒާމަށާއި، ކައުންސިލު މެންބަރުންނަށް ސަރުކާރުން ކުރިމަތިކުރުވަމުންދާ ފިއްތުންތަކަކީ ޣައިރު ގާނޫނީ އަމަލުތަކެއް ކަމަށެވެ. ދިއްދޫ ކައުންސިލްގެ ރައީސް ހައްޔަރުކުރުމަކީ ސިޓީ އަދި ރަށު ކައުންސިލުތަކުގެ ބާރުތައް ހަނިކޮށް، އެބާރުތައް މާލޭގެ ސަރުކާރުގެ މުށުތެރެއަށް ލުމަށް ކުރާ ކަމެއް ކަމަށް ވެސް އެމްޑީޕީން ވަނީ ބުނެފައެވެ.
ހާޝިމްގެ ބަންދަށް މިމަހުގެ 23 ވަނަ ދުވަހު، ހއ. ފިއްލަދޫ ކޯޓުން ފަސް ދުވަސް ޖަހާފައިވާއިރު، ހާޝިމް މިނިވަން ކުރުމަށް ކުރީގެ ރައީސް އަދި އެމްޑީޕީގެ ލީޑަރ މުހައްމަދު ނަޝީދު ވެސް ވަނީ ސަރުކާރަށް ގޮވާލައްވާފަ އެވެ.