ސްރީލަންކާއަށް މިހާރު ކުރަމުންދާ ވިއްސާރާގައި ފެންބޮޑުވުމުގެ ސަބަބުންނާއި ބިންގަނޑުކަނޑައިގެން ދިޔުމުގެ ހާދިސާތަކުގައި ނުވަ މީހުން މަރުވެ 23 މީހުން ގެއްލިފައިވާ ކަމަށް ލަންކާގެ ނެޝެނަލް ޑިޒާސްޓާ މެނޭޖްމަންޓް ސެންޓަރު (ޑީއެމްސީ) އިން ބުނެފިއެވެ. 

ޑީއެމްސީ އިން ބުނާގޮތުން 23،741 މީހުން ވަނީ ގެދޮރު ދޫކޮށްދާންޖެހިފައެވެ. އަދި އެ މީހުން ވަނީ 163 ރައްކާތެރި ތަނަކަށް ބަދަލުކުރެވިފައެވެ. 

"ކޮލަމްބޯ ޕޭޖު" ނޫހުން ބުނާގޮތުން 66،340 މީހުންނަށް ވަނީ ވިއްސާރައިގެ ސަބަބުން އަސަރުކޮށްފައެވެ.

ރަންބިމާ، ވެލިހިންދާ އަދި ޔަކަޑަގަލްލަ ފަަދަ ބިންތިރި ހިސާބުތަކަށް ވަނީ ވަރަށް ބޮޑަށް ފެންބޮޑުވުމުގެ އަސަރުކޮށްފައެވެ. ލަންކާގެ ސަރުކާރުން ވަނީ ހާލުގައި ޖެހިފައިވާ މީހުންނަށް އެހީވުމަށް ސިފައިން ފޮނުވާފައެވެ. ބައެއް ސަރަހައްދުތަކަށް ރޭލުގެ ޚިދުމަތްވެސް ވަނީ ކެޑިފައެވެ.