ރައްޔިތުންނަށްޓަކައި އިލްހާމް ވަމުންދާ ގުރުބާނީއާ މެދު ފަޚުރުވެރިވޭ:އާއިލާ
23 މެއި 2018 | ބުދަ 05:00އިލްހާމް ޖަލުގައި ހައްޔަރުކުރެވުނުތާ މިއަދަށް 101 ދުވަސް ވަނީ ވެފައި
އެމްޕީ އިލްހާމް އަހްމަދު އަދި އަނބިކަނބަލުން އައިމިނަތު މާޝާ ހަސަން
ރައްޔިތުންގެ މަޖިލީހުގެ ދަނގެތީ ދާއިރާގެ މެންބަރު އިލްހާމް އަހުމަދު ޖަލުގައި ހައްޔަރުކުރެވުނުތާ ގިނަ ދުވަސްތަކެއް ވެފައިވާ ކަމަށާއި، ރައްޔިތުންނަށްޓަކައި އިލްހާމް ވަމުންދާ ގުރުބާނީއަށްޓަކައި ފަޚުރުވެރިވާ ކަމަށް އިލްހާމްގެ އަނބިކަނބަލުން އައިމިނަތު މާޝާ ވިދާޅުވެއްޖެ އެވެ.
އިލްހާމް ޖަލުގައި ހައްޔަރުކުރެވުނުތާ 100 ދުވަސް ހަމަވުމާއި ގުޅިގެން މާޝާ ވިދާޅުވީ ނުހައްގުން އިލްހާމް ޖަލުގައި ހައްޔަރުކޮށްގެން ދެމުންދާ އަނިޔާތަކަކީ މުޅި އާއިލާއަށް ދެވޭ އަނިޔާއެއް ކަމަށާއި، މުޅި އާއިލާއަށް ލިބިފައިވަނީ ފުން ބޮޑު ހިތާމައެއް ކަމަށެވެ. ޚާއްސަކޮށް ރަމަޟާންމަހުގެ ދުވަސްތަކާއި ރޭތައް ފާއިތުވަމުންދާއިރު، އިލްހާމް ނެތުމަކީ ދަރިންނާއި، އާއިލާއަށް ލިބޭ ހިތްދަތިކަމެއްކަމަށް މާޝާ ވިދާޅުވިއެވެ.
މާޝާ ވިދާޅުވީ އިލްހާމްގެ ޖަލުގައި ހައްޔަރު ކޮށްފައިވަނީ ކުށެއްކޮށްގެން ނޫން ކަމަށެވެ. އިލްހާމްގެ ހަމައެކަނި ކުށަކީ އަނިޔާވެރިކަމަކުން ގައުމު ސަލާމަތް ކުރުމަށް އިސްލާހަށް މަސައްކަތް ކުރުމާއިއެކު މަސައްކަތުގައި ދެމި ހުރުން ކަމަށްށެވެ.
އިލްހާމަކީ ވަރަށް ސާބިތުކަމާއިއެކު ހުންނަވާ ކޮންމެ މަސައްކަތެއްގައި ހިތްވަރާއިއެކު ކުރިއަށް ވަޑައިގަންނަވާނެ ބޭފުޅެއްކަން ފާހަގަކުރައްވާ މަޝާ ވިދާޅުވީ ޑީއާރުޕީގެ ޑެޕިއުޓީ ލީޑަރުކަމާއި، ޕީޕީއެމްގެ ޑެޕިއުޓީ ލީޑަރުކަމުގެ އިތުރަށް ޖުމްހޫރީ ޕާޓީގެ ޑެޕިއުޓީ ލީޑަރުކަމާއި، ޕީޖީ ގުރޫޕްގެ ނާއިބު ލީޑަރުކަން ވެސް އިލްހާމް އަދާކުރެއްވި އިޚްލާސްތެރިކަމާއި، ތެދުވެރިކަމާއެކު ކަމަށެވެ.
މީގެ އިތުރަށް މާޝާ ވިދާޅުވީ އަނިޔާއިން އިލްހާމްގެ ހިތްވަރު ބަލި ނުކުރެވޭނެ ކަމަށާއި، ހައްގު ބަސްބުނެ ހައްގުގެ މަގުގައި ސާބިތުވެ ހުންނަވާނެ ކަމަށެވެ. އަދި އިލްހާމަކީ އެއަށްވުރެ ހިތްވަރު ގަދަ ގައުމާއި ރައްޔިތުން ދެކެ ލޯބިވާނެ ބޭފުޅެއް ކަމަށެވެ.
