ރާއްޖޭގެ ދަރަނި އިންތިހާއަށް ބޮޑުވެގެން ދާތީ ސަރުކާރާއި، ރައްޔިތުން ވިސްނަންޖެހޭ: އަނާރާ
މިދިޔަ އަހަރުގެ ނިޔަލަށް ރާއްޖޭގެ ބޭރުގެ ދަރަނި ވަނީ 1.1 ބިލިއަން ޑޮލަރަށް އަރައި، 26 ޕަސެންޓް އިތުރުވެފައި
ރައްޔިތުންގެ މަޖިލީހުގެ މަކުނުދޫ ދާއިރާގެ މެމްބަރު އަނާރާ ނައީމް...
ރާއްޖޭގެ ދަރަނި އިންތިހާއަށް ބޮޑުވެގެން ދާތީ ދިވެހި ސަރުކާރާއި، ރައްޔިތުން ފުންކޮށް ވިސްނާ ރައްކާތެރިވުމަށް ރައްޔިތުންގެ މަޖިލީހުގެ މަކުނުދޫ ދާއިރާގެ މެމްބަރު އަނާރާ ނައީމް ގޮވާލައްވައިފިއެވެ.
ސްރީލަންކާގެ ބޭރުގެ ދަރަނިތައް ބޮޑުވެ ގައުމު ބަނގުރޫޓުވުމުގެ ކާރިސާއަކާ ދިމާއަށް މިސްރާބު ޖަހާފައިވާ ކަމަށް އެގައުމުގެ މާލީ ވުޒާރާއިން އިންޒާރު ދިނުމާއި ގުޅިގެން ކަންބޮޑުވުންފާޅު ކުރައްވާ އަނާރާ ކުރެއްވި ޓްވީޓެއްގައި ވިދާޅުވީ ރާއްޖޭ ދަރަނިވެރިވަމުންދާއިރު މިކަމާ މެދު ސަރުކާރާއި ރައްޔިތުން ވިސްނަންޖެހޭ ކަމަށެވެ. އަދި ރާއްޖޭ މިހާރު އޮތީ ނުރައްކާތެރި ފަށްތަރެއްގައި ކަމަށެވެ.
ލަންކާ ބަނގުރޫޓްވުމުގެ ކާރިސާއަކާ ދިމާއަށް ގައުމު ދަތުރުކުރަމުންދަނީ، ކުރީގެ ސަރުކާރުން އަގުބޮޑު މަޝްރޫއުތައް ހިންގުމަށްޓަކައި، އަނބުރާ ބޮޑު އަދަދެއް ދައްކާގޮތަށް ނަގާފައިވާ ލޯނުތަކުގެ ސަބަބުން ކަމަށް މާލީ ވުޒާރާއިން ވަނީ ބުނެފައެވެ. ހަމަ އެގޮތަށް ރާއްޖޭގެ ތަރައްގީ ގިނަ މަޝްރޫއުތައް ހިންގުމަށް ސަރުކާރުން އަންނަނީ ނުއަގުގައި ގިނަ ލޯންތައް ނަގަމުންނެވެ.
ރައީސް ޔާމިންގެ ސަރުކާރުން ގިނަ އަދަދެއްގެ ލޯނު ނަގަމުންދާތީ ސިޔާސީ އިދިކޮޅު ފަރާތްތަކުން ވެސް ދަނީ ކަންބޮޑުވުންފާޅު ކުރަމުންނެވެ. ގައުމު ދަރުވައިގެން ގެންނަ ތަރައްގީ ދިވެހިން ބޭނުން ނުވާ ކަމަށާއި، މިގޮތަށް ލޯނު ނަގާ ނަމަ ސްރީލަންކާގެ އިގްތިސާދު 87 ބިލިއަން އެމެރިކާ ޑޮލަރުން ދަރަނިވެރިވެފައިވާ ގޮތައް ރާއްޖެ ވެސް ދަރަނިވެރިވެ ލަންކާ އަށް ޖެހިފައިވާ ހާލަތު ޖެހޭނެ ކަމަށް އިދިކޮޅު ފަރާތްތަކުން ދަނީ ބުނަމުންނެވެ.
ރާއްޖޭގެ މަރުކަޒީ ބޭންކް (އެމްއެމްއޭ) އިން ނެރުނު މިދިޔަ އަހަރުގެ އަހަރީ ރިޕޯޓްގައި ދައްކާ ގޮތުން މިދިޔަ އަހަރުގެ ނިޔަލަށް ރާއްޖޭގެ ބޭރުގެ ދަރަނި މިވަނީ 1.1 ބިލިއަން ޑޮލަރަށް އަރައި، 26 ޕަސެންޓް އިތުރުވެފަ އެވެ. އެއީ ރާއްޖޭގެ އާބާދީގެ ނިސްބަތުން ބަހާލާނަމަ ބޮލަކަށް ގާތްގަނޑަކަށް 30،000ރ. ގެ ދަރަނި މިހާރު ޖެހޭނެ އެވެ.
މީގެ އިތުރަށް ވާރލްޑް ބޭންކާއި އިންޓަނޭޝަނަލް މަނިޓަރީ ފަންޑް (އައިއެމްއެފް) އިން މިދިޔަ އަހަރު ވަނީ ރާއްޖޭގެ ދަރަނި ބޮޑުވަމުންދާތީ ކަންބޮޑުވުންފާޅު ކޮށްފައެވެ. ދަރަނި މެނޭޖު ކުރަން އިސްކަން ދިނުމަށް ވެސް ވަނީ ގޮވާލާފައެވެ. ނަމަވެސް ރައީސް ޔާމިންގެ ސަރުކާރުން މިކަމަށް އެއްވެސް ފަރުވާލެއްދޭ މަންޒަރެއް މިހާތަނަކަށް ނުފެންނަ ކަމުގައި އިދިކޮޅު ފަރާތްތަކުން ބުނަމުން ދެއެވެ.
