ރައީސް މައުމޫނާއި ސިނާންގެ މައްޗަށް އުފުލާފައިވާ ދައުވާގެ އަޑުއެހުމެއް މާދަމާ
މައުމޫނުގެ މައްސަލައިގެ އަޑުއެހުން އޮތީ 11.00 ގައި
ކުރީގެ ރައީސް މައުމޫނު އަބްދުލް ގައްޔޫމު:- އެމަނިކުފާނުގެ މައްޗަށް ކުރާ ދައުވާގެ އަޑުއެހުމެއް މާދަމާ އޮންނާނެ
ކުރީގެ ރައީސް މައުމޫނު އަބްދުލްގައްޔޫމުގެ މައްޗަށް އުފުލާފައިވާ އަދުލު އިންސާފު ގާއިމު ކުރަން ހުރަސްއެޅުމުގެ ދައުވާ އާއި ގުޅިގެން ހޯމަ ދުވަހު އަޑުއެހުމެއް ބޭއްވުމަށް ކްރިމިނަލް ކޯޓުގައި ތާވަލުކޮށްފި އެވެ.
މި ދައުވާ އަކީ ރައީސް މައުމޫނުގެ އިތުރުން އުއްތަމަ ފަނޑިޔާރު އަބްދުﷲ ސައީދާއި ސުޕްރީމް ކޯޓުގެ ފަނޑިޔާރު އަލީ ހަމީދުގެ މައްޗަށް އެއްކޮށް ކޮށްފައިވާ ދައުވާ އެކެވެ. އެހެން ނަމަވެސް މި މައްސަލައިގައި މާދަމާ ބާއްވާނީ ރައީސް މައުމޫނުގެ އަޑުއެހުން އެކަންޏެވެ. ސަބަބަކީ ރައީސް މައުމޫނުގެ ސިއްހީ ހާލުކޮޅުދެރަވެ، އެންމެ ފަހުން ބޭއްވި ޝަރީއަތުގެ އަޑުއެހުމަށް ހާޒިޒު ނުކުރެވުމުން އެމަނިކުފާނު ނުހިމަނައި އަލީ ހަމިދާއި އަބްދުﷲ ސައީދު ބައި އެދުވަހު ކުރިއަށް ގެންގޮސްފައިވާތީ އެވެ.
މާދަމާ އޮންނާނީ ރައީސް މައުމޫނުގެ ފަރާތްޕުޅުން ޝަރީއަތުގެ ކުރިން ހުށަހަޅާ ހުށެހެޅުންތަކާ ގުޅޭ ގޮތުން ވާހަކަ ދެއްކެވުމާއި ގޮތެއް ނިންމެވުމެވެ. މާދަމާ މިއަޑުއެހުން ބާއްވަން ތާވަލުކޮށްފައިވަނީ ހެނދުނު 11.00ގައި އެވެ. މި ދައުވާ ރައީސް މައުމޫނުގެ މައްޗަށް އުފުލާފައިވަނީ އެމަނިކުފާނު ފުލުހުންގެ ބެލުމުގެ ދަށަށް ގެންގޮސް ފޯނު ދިނުމަށް އެދުމުން ފޯނު ދީފައިނުވާ ކަމަށް ބުނެ އެވެ.
މިއަޑުއެހުން ބޭއްވުމަށް އެންމެ ފަހުން ދެ ފަހަރުވެސް ތާވަލު ކުރުމަށްފަހު ދެ ފަހަރަށް ވެސް ކެންސަލް ކުރަން ޖެހުނީ ރައީސް މައުމޫނުގެ ސިއްހީ ހާލުކޮޅު ހުރި ގޮތުން އެމަނިކުފާނު މާލޭ ނުގެނެސްދެވިގެންނެވެ.
ރައްޔިތުންގެ މަޖިލީހުގެ މައްޗަންގޮޅި ދެކުނު ދާއިރާގެ މެމްބަރު އަބްދުﷲ ސިނާންގެ މައްޗަށް ދައުލަތުން އުފުލި ޓެރަރިޒަމްގެ އަމަލެއް ހިންގަން އުޅުނުކަމުގެ ދައުވާގެ އަޑުއެހުމެއް ވެސް މާދަމާ ބޭއްވުމަށް ވަނީ ތަވާލުކޮށްފަ އެވެ. މި އަޑުއެހުން ބާއްވަން ތާވަލުކޮށްފައިވަނީ މާދަމާ މެންދުރުފަހު 13.00ގައި އެވެ.
މި މައްސަލައިގައި އެންމެ ފަހުން ބާއްވަން ތާވަލުކުރި އަޑުއެހުން ވަނީ ކެންސަލްކޮށްފަ އެވެ. މި މަހުގެ ނުވަ ވަނަ ދުވަހު ބާއްވަން ތާވަލުކުރި އަޑުއެހުން ކެންސަލް ކުރި ވަކި ސަބަބެއް ކޯޓުން ނުބުނެ އެވެ.
ރައްޔިތުންގެ މަޖިލީހުގެ މައްޗަންގޮޅި ދެކުނު ދާއިރާގެ މެމްބަރު އަބްދުﷲ ސިނާން
ސިނާންގެ މައްޗަށް ޓެރަރިޒަމްގެ އަމަލެއް ހިންގަން އުޅުނުކަމުގެ ދައުވާ ކޮށްފައިވަނީ މިދިޔަ އަހަރުން ފެށިގެން ސިނާން, ރިޝްވަތުހިފައި އިތުރު ބަޔަކާ ބައިވެރިވެގެން ރައްޔިތުންގެ މަޖިލީހުގެ ތެރެއިން ގާނޫނާ ހިލާފަށް ވެރިކަން ވައްޓާލުމަށްޓަކައި މަސައްކަތްކޮށް ގާނޫނު އަސާސީން ދައުލަތް ހިންގުމަށް ވަކިވަކި ބާރުތައް ލިބިދީ އުފައްދާފައިވާ މުވައްސަސާތަކުގެ ހިންގުމުގެ ނިޒާމުތަކަށް ބުރޫއަރައި، ގައުމީ ސަލާމަތާއި ރައްޔިތުންގެ ރައްކާތެރިކަމާ ގުޅިފައިވާ މަސްލަހަތުތަކެއް ގެއްލޭ ގޮތަށް ސުޕްރީމް ކޯޓުން އަމުރެއް ސިނާން ނެރުއްވާފައިވާ ކަމަށް ތުހްމަތުކޮށެވެ. އޭގެ އިތުރުން ގާނޫނީ އުސޫލުތަކުގެ ބޭރުން ކުރީގެ ޕޮލިސް ކޮމިޝަނަރ އަހްމަދު އަރީފް މެދުވެރިކޮށް ދުރާލާ ރާވައިގެން ފުލުހުންގެ ތެރެއިން ބަޔަކު ލައްވައި ފުލުހުންގެ ޑިއުޓީގައި އުޅުނު އިތުރު ފުލުހުންނާއި ކުރިމަތިލައި، ގައުމުގެ ހަމަޖެހުން ނަގާލަން މަސައްކަތްކޮށް ގާނޫނު އަސާސީއާއި ގާނޫނުތަކާއި އުސޫލުތަކުގެ ބޭރުން، ގާނޫނީ ގޮތުން އުފެދިފައިވާ ސަރުކާރު ގާނޫނާ ހިލާފަށް ވައްޓާލަން މަސައްކަތްކޮށް، ދައުލަތަށާއި ސަރުކާރަށް ނޭދެވޭ ނުފޫޒު ފޯރުވައި، އާންމުންގެ ސަލާމަތަށް ނުރައްކާތެރިވާ ފަދަ ހާލަތެއް މެދުވެރިކުރުވަން މަސައްކަތްކޮށްފައިވާ ކަމަށް ވެސް ސިނާންގެ މައްޗަށް ކޮށްފައިވާ ދައުވާގައި ބުނެފައިވެ އެވެ.
