އިސްލާމީ ރިވެތި އަޚުލާޤުގެ މަތީގައި ދެމިތިބުމަށް ރައީސް ޔާމީން އިލްތިމާސްކުރައްވައިފި
ރޯދަ ހިފުމާއިއެކު ޤުރްއާން ކިޔެވުން ގިނަކުރުމާއި، ނަމާދަށް ފަރުވާތެރިވުމަށް ރައީސް ޔާމީން އިލްތިމާސް ކުރެއްވި
ރައީސް ޔާމީން ޖަލްސާއެއްގައި ވާހަކަ ދައްކަވަނީ
ރަމަޟާން މަހަކީ ކީރިތި ޤުރްއާން ބާވައިލެއްވި މައްސަރު ކަމަށްވީހިނދު، މިމައްސަރުގެ މާތްކަމާއި އިތުރުކަން ބޮޑުވެގެން ވާކަމަށާއި، އެހެންކަމުން، މި މައްސަރުގައި ރޯދައިގެ މަތިވެރި އަޅުކަން އަދާކުރުމާއެކު، ކީރިތި ޤުރްއާން ކިޔެވުން ގިނަކުރުމާއި، ފަރުޟު ފަސްނަމާދަށް ފަރުވާތެރިވުމަށް ދިވެހި އެންމެހައި މުސްލިމް ރައްޔިތުންނަށް ރައީސް އަބްދުﷲ ޔާމީން އަބްދުލްޤައްޔޫމް އިލްތިމާސް ކުރައްވައިފިއެވެ.
ރަމަޟާން މަސް ފެށުމުގެ މުނާސަބަތުގައި ރައީސް ޔާމީން ނެރުއްވި ޚިޠާބުގައި ވިދާޅުވީ މި މަތިވެރި މައްސަރުގެ ދުވަސްތަކާއި ރޭތަކުގެ ބޭނުން ހެޔޮގޮތުގައި ހިފުމަށާއި، އިސްލާމީ ރިވެތި އަޚުލާޤުގެ މަތީގައި ދެމިތިއްބެވުމަށްވެސް އެންމެހައި ދިވެހި ލޮބުވެތި ރައްޔިތުންނަށް ނަސޭހަަތްތެރިވެވަޑައިގަންނަވާކަމަށެވެ.
އަދި މިމަަތިވެރި މައްސަރުގެ ރަޙްމަތާއި ފުއްސެވުމާއި ރުއްސެވުން އަޅުގަނޑުމެންނަށް މާތްﷲ މިންވަރު ކުރެއްވުމަށާއި، ހިފާ ރޯދައިގެ މަތިވެރި ދަރުމައާއި ސަވާބު އެކަލާނގެ އިތުރު ކުރެއްވުމަށް ދުޢާކުރައްވާކަމަށް ރައީސް ޔާމީން ވިދާޅުވިއެވެ.
ރައީސް ޔާމީން ވަނީ ރަމަޟާން މަހުގެ ތަހުނިޔާއާއި ހެޔޮއެދުންތައް ދިވެހި އެންމެހާ ރައްޔިތުންގެ އިތުރުން އިސްލާމީ ޤައުމުތަކުގެ ވެރިންނަށާއި ރައްޔިތުންނަށާއި، ބައިނަލްއަޤްވާމީ ޖަމުޢިއްޔާ ޖަމާޢަތްތަކުގެ ވެރިންނަށްވެސް ފޮނުއްވާފައެވެ.
