ފޭދޫ އެމްޑީޕީ ހަރުގެ ކުރިމަތީގައި ސިޔާސީ ހަރަކާތް ނުހިންގަން އަންގައިފި
ސިޔާސީ ހަރަކާތް ހިންގާނަމަ ހައުސިންގް މިނިސްޓްރީގެ ހުއްދަ ހޯދަން ޖެހޭނެކަމަށް ފުލުހުން ބުނި
އެމްޑީޕީ ފޭދޫ ހަރުގެ ސަރަހައްދުގައި ފުލުހުން ހަރަކާތެރި ވަނީ
އައްޑޫ ސިޓީ އެމްޑީޕީ ހަރުގެ ކުރިމަތީގައި ސިޔާސީ ހަރަކާތް ނުހިންގުމަށް ފުލުހުން އަންގައިފިއެވެ.
ފުލުހުން މިގޮތަށް އަންގާފައިވަނީ ބުދަ ދުވަހުގެ ރޭ އައްޑޫ ސިޓީ ފޭދޫ އެމްޑީޕީ ހަރުގެ ކުރިމަތީގައި "ބޮޑު ސްކުރީން" ބަހައްޓައިގެން ގުޅިފައިވާ ސިޔާސީ ޕާޓީ ތަކުން ކުނޫޒުގައި ބޭއްވި ޖަލްސާ ބަލަމުން ދަނިކެވެ.
ފޭދޫ އެމްޑީޕީ ހަރުގޭގައި ތިބި މީހުން ރާއްޖެއެމްވީއަށް މައުލޫމާތުދެމުން ބުނީ ފުލުހުން އަންގާފައި ވަނީ ހަރުގެ ކުރިމަތީގައި ސިޔާސީ ހަރަކާތް ހިންގާކަމަށްވާނަމަ ހައުސިންގް މިނިސްޓްރީންގެ ހުއްދަ ހޯދަން ޖެހޭނެ ކަމަށެވެ. އެހެންނަމަވެސް މިކަމާއި ގުޅިގެން ފުލުހުންގެ ބަހެއް ލިބޭ ގޮތް ވަނީ ނުވެފައެވެ.
އައްޑޫ ސިޓީން ވާހަކަ ދެއްކި މީހަކު ބުނީ ފުލުހުން އަންގާފައި ވަނީ ސައުންޑް ސިސްޓަމް ބޭނުންކޮށްގެން، ހަރުގެ ކުރިމަތީގައި ޖަލްސާ ބަލަން ނުތިބެވޭނެކަން ކަމަށެވެ. ފުލުލުހުންގެ އެންގުމަށް ހަރުގޭގައި ތިބި މީހުން ޕްރޮޖެކްޓަރު އަޅެވުމަށް ބޭނުންކުރާ ސްކްރީން ވަނީ ހަރުގެ ތެރެއަށް ވައްދާފައިކަމަށް އޭނާ ބުންޏެވެ.
ސިޔާސީ ހަރަކާތް ހިންގަން ހައުސިންގ މިނިސްޓްރީގެ ހުއްދަ ހޯދަން ޖެހުމުން، އެކި ފަހަރުމަތިން އައްޑޫ ސިޓީގައި ހުންނަ އެމިނިސްޓްރީގެ ބުރާންޗަށް ގޮސް ހުއްދައަށް އެދިފައިވާ ކަމަށް އެނާ ބުންޏެއެވެ. އެހެންނަމަވެސް ހައުސިންގް މިނިސްޓްރީން ހުއްދަ ދީފައި ނުވާކަމަށް ވެސް އެނާ ބުންޏެވެ.
