ސުނާމީ ބިނާ ސަރަހައްދު ކުއްޔަށް ދޫކުރުމަށް ނިންމައިފި
14 މެއި 2018 | ހޯމަ 10:18ކުޑަކުދިންގެ ހަރަކާތްތައް ހިންގުމަށް އެއް ގަޑިއިރަށް އެސަރަހައްދު ދޫކުރަން ހަމަޖެހިފައިވަނީ 100 ރުފިޔާއަށް
ސުނާމީ ބިނާ
ތަފާތު އެކި ހަރަކާތްތައް ހިންގުމަށް ސުނާމީ ބިނާ ސަރަހައްދު ކުއްޔަށް ދޭން ހައުސިން މިނިސްޓްރީން ނިންމައިފިއެވެ.
ހައުސިން މިނިސްޓްރީން ނެރުނު އިއުލާނެއްގައި ބުނެފައިވަނީ ހަރަކާތްތައް ހިންގުމަށް މައިޒާންތަކާއި ޕާކުތައް ކުއްޔަށްދޭ އުސޫލުން ސުނާމީ ބިނާ ސަރަހައްދު ވެސް ކުއްޔަށް ދޫކުރަން ނިންމާފައިވާކަމަށެވެ. ހައުސިން މިނިސްޓްރީން ބުނީ ކުޑަކުދިންގެ ހާއްސަ ހަރަކާތްތައް ހިންގުމަށް އެއް ގަޑިއިރަށް އެސަރަހައްދު ދޫކުރަން ހަމަޖެހިފައިވަނީ 100 ރުފިޔާއަށް ކަމަށެވެ. އަދި އަމިއްލަ ފަރާތްތަކާއި ޖަމްއިއްޔާތައް އަދި ސްކޫލުތަކާއި ކުންފުނިތަކުގެ އިތުރުން ދައުލަތުގެ އެކިއެކި މުވައްސަސާތަކަށް އެސަރަހައްދު ކުއްޔަށް ދޫކުރާނީ ގަޑިއިރަކަށް 250 ރުފިޔާއަށްކަމަށެވެ.
ސުނާމީ ބިނާ ލޮނުޒިޔާރަތްކޮޅު ސަރަހައްދުން ނެގުމަށްފަހު ތިން ރުއް ޕާކަށް ބަދަލުކުރީ ލޮނުޒިޔާރަތްކޮޅު ސަރަހައްދުގައި ބްރިޖުގެ މަސައްކަތް ކުރުމަށް 2016 ވަނަ އަހަރެވެ.
ސުނާމީ ބިނާއަކީ 2004 ވަނަ އަހަރު ރާއްޖެއަށް ކުރިމަތިވި ސުނާމީ ކާރިސާގައި ލިބުނު ގެއްލުންތަކާއި މަރުވި މީހުންގެ ހަނދާނުގައި ހަދާފައިވާ ރަމްޒީ ބިނާއެކެވެ. ސުނާމީ ބިނާއިން ރަމްޒުކޮށްދެނީ ރާއްޖޭގެ 20 އަތޮޅާއި ސުނާމީ ކާރިސާގައި ރާއްޖެއިން މަރުވި މީހުންގެ އަދަދެވެ.
