ބީއެމްއެލްގެ ޚިދުމަތް ރާއްޖެއިން ބޭރަށް ފުޅާކުރުމުގެ ވަގުތު އައިސް ޖެހިއްޖެ: ސީއީއޯ
ބޭންކް މިވަނީ ވަރަށް ކުރިއަރާގެން ގޮސްފައި
ބީއެމްއެލްގެ ސީއީއޯ އެންޑްރޫ ހީލީ
ބޭންކް އޮފް މޯލްޑިވްސް (ބީއެމްއެލް)އިން ދަނީ ކުރިމަގަށް ތައްޔާރު ވަމުން ކަމަށާ އެހެން ގައުމެއްގައި ބީއެމްއެލްގެ ޚިދުމަތް ދޭން ފެށުމުގެ ވަގުތު އައިސް ޖެހިއްޖެ ކަމަށް ބޭންކުގެ ސީއީއޯ އެންޑްރޫ ހީލީ އާދީއްތަ ދުވަހުގެ ރޭ ވިދާޅުވެއްޖެއެވެ.
ބޭންކާއި ދިމާލަށް ނަޒަރު ހިންގާލައިފިނަމަ ކުރިއަރައިގެން ގޮސްފައިވާ މިންވަރު ހާމަވެ ފެނިގެންދާ ކަމަށާއި ރާއްޖެއިން ބޭރަށް ބީއެމްއެލް ފުޅާ ކުރަންވީ ވަގުތު އައިސް ޖެހިއްޖެކަން އަހަރީ ރިޕޯޓަށް ބަލާލުމުން ޔަގީން ވެގެން ދާކަމަށް އެންޑުރޫ ވިދާޅުވިއެވެ. އެންޑުރޫ ވިދާޅުވީ ބޭންކްގެ ޚިދުމަތް އެހެން ގައުމުތަކުގައި ފެށިކަމުގައި ވިޔަސް އަބަދު ވެސް އިސްކަމެއް ދޭނީ ރާއްޖެއަށް ކަމަށާއި މިއީ ދިވެހިންގެ ބޭންކެއް ކަމަށެވެ.
ރާއްޖޭގައި ހިންގާ އެންމެ ބޮޑު ބޭންކުން ހޮޓެލް ޖެންގައި އާދީއްތަ ދުވަހު ރޭ ބޭއްވި 35 ވަނައަހަރުގެ އާއްމު އަހަރީ ޖަލްސާގައި އެންޑްރޫ ވަނީ ބީއެމްއެލް އިން ކުރަމުންދާ މަސައްކަތަށް އަލި އަޅުއްވާ ލައްވާފައެވެ.
ރާއްޖޭގައި ހިންގާ އެންމެ ބޮޑު ބޭންކުން ހޮޓެލް ޖެންގައި އާދީއްތަ ދުވަހު ރޭ ބޭއްވި 35 ވަނައަހަރުގެ އާއްމު އަހަރީ ޖަލްސާގައި އެންޑްރޫ ވަނީ ބީއެމްއެލް އިން ބައިނަލް އަގްވާމީ ދުނިޔެއަށް ނިކުތުމުގެ ވަގުތު ޖެހިއްޖެ ކަމުގެ މައްޗަށް އަލި އަޅުއްވާ ވަރަށް ބޮޑަށް ވާހަކަފުޅު ދައްކަވާފައެވެ. ހަމަ އެއާއެކު އެންޑުރޫ ވަނީ އެހެންގައުމެއްގައި ބީއެމްއެލްގެ ބްރާންޗެއް ހުޅުވުމުގެ މަސައްކަތް ކުރަމުން ދާކަން ޔަގީން ކޮށްދެއްވާފައެވެ.
"އަޅުގަނގަޑަށް އިނގޭ އަދި އަޅުގަނޑުމެން ހާމައެއް ނުކުރާކަން ކޮން ގައުމެއްގަ ކަމެއް (އެންމެ ފުރަތަމަ ބީއެމްއެލްގެ) ޚިދުމަތް ފުޅާކުރަން ގަސްދު ކޮށްފައިވަނީކީ. ވަރަށް ގިނަ ބަޔަކު ދަނީ އެ މީހުންގެ ޚިޔާލުގައި ވާ ގައުމުތަކުގެ ނަންތައް ކިޔަމުން އެހެން ނަމަވެސް އަހަރުމެންގެ ލައިސެންސް އެޕްލިކޭޝަން އެގައުމުން މިވަގުތު ޗެކް ކުރަމުން ދާތީއާއި އެގައުމަށް ކުރާ އިހްތިރާމުގެ ސަބަބުން ލައިސަންސްގެ ހުއްދަ ނުލިބެނީސް އެއީ ކޮން ގައުމެއްކަން ރަސްމީކޮށް އިއުލާން ނުކުރާނަން" އެންޑުރޫ ވިދާޅުވިއެވެ
ބައިނަލް އަގްވާމީ ދުނިޔެއަށް ނިކުތުމަކީ ކަންމަތީ ފިހާރައެއް ހުޅުވާލުންހާ ފަސޭހަ ކަމެއް ނޫން ކަމަށާއި ވަރަށް ގިނަ ގުނަ ގޮންޖެހުންތަކާއި ކުރި މަތި ލާންޖެހޭނެ ކަމެއްކަމަށް އޭނާ ވިދާޅުވިއެވެ. މިއީ ކުރިން އެއްވެސް ވަރަކަށް މި ބޭންކުން ކުރި ކަމެއް ނޫން ކަމަށާއި މިކަމުގައި އެއްވެސް ތަޖުރިބާއެއް ނެތް ކަމަށް އެންޑުރޫ ވިދާޅުވިއެވެ. އަދި ދުނިޔެއަށް ބީއެމްއެލް އިން ނިކުންނަ އިރު މަގުދައްކައިދޭން އެއްވެސް ބަޔަކު ނެތްކަން ވެސް ފާހަގަ ކުރެއްވިއެވެ. އެހެން ނަމަވެސް ބީއެމްއެލްގެ އަމާޒަށް ވާސިލް ވާން ކުރެވެން ހުރި ހުރިހާ ކަމެއް ކުރާނެ ކަމަށާއި އިރާދަކުރެއްވިއްޔާ ކާމިޔާބު ލިބި އޭގެ ފަހަތުގައި ވާނީ ހީވާގި އަދި މުރާލި މުވައްޒަފުން ކަން ޔަގީންވާ ކަމަށް ވެސް އެންޑުރޫ ވިދާޅުވިއެވެ.
އެންޑްރޫ ވަނީ ބީއެމްއެލްއަށް މިދިޔަ ހަތަރު އަހަރުގެ ތެރޭގައި ލިބުނު ފައިދާ ދެ ގުނަ އިތުރުވެ، ޓެކްސް އާއި ހިއްސާގެ ފައިދާގެ ގޮތުގައި 1.3 ބިލިއަން ރުފިޔާ ދައުލަތަށް ދައްކާފައިވާނެ ކަން ހާމަ ކުރައްވާފައެވެ. އަދި ފާއިތުވި ހަތަރު އަހަރު ދުވަހުގެ ތެރޭގައި ބޭންކްގެ ހިއްސާގެ އަގު 240 އިންސައްތަ އިތުރުވެފައިވާ ކަމަށް ވެސް ވަނީ ވިދާޅުވެފައެވެ.
