ސުޕްރީމް ކޯޓުން ކުރި އަމުރު ތަންފީޒު ކުރަން އުޅުމުން މިވީ ޓެރަރިސްޓަކަށް: ކުރީގެ ސީޕީ އަރީފް
ސުޕްރީމް ކޯޓުގެ އަމުރު ތަންފީޒު ކުރަން އުޅުނިން، އެއީ ފުލުހުންގެ މައްޗަށް ލާޒިމްކަމެއް
ކުރީގެ ޕޮލިސް ކޮމިޝަނަރ އަހުމަދު އަރީފް (އަތް މައްޗަށް ނަންގަވައިގެން)
ކޮށްފައިވާ ހުވަޔާ އެއްގޮތަށް ސުޕްރީމް ކޯޓު އަމުރެއް ތަންފީޒު ކުރަން އުޅުމުންވީ ޓެރަރިސްޓަކަށް ކަމަށާއި ސުޕްރީމް ކޯޓުން ނެރުނު އަމުރެއް ފުލުހުން ތަންފީޒު ކުރަން ދެކޮޅު ހެދިތަނެއް މިނޫނިއްޔާ ނުދެކޭ ކަމަށް ކުރީގެ ކޮމިޝަނަރ އޮފް ޕޮލިސް އަހުމަދު އަރީފް ވިދާޅުވެއްޖެ އެވެ.
އަރީފްގެ މައްޗަށް ދައުލަތުން ކޮށްފައިވާ ޓެރަރިޒަމްގެ ދައުވާއާ ގުޅިގެން އާދިއްތަ ދުވަހު ބޭއްވި އަޑުއެހުމުގައި ވާހަކަ ދައްކަވަމުން އަރީފް ވިދާޅުވީ ސުޕްރީމް ކޯޓުން އަމުރެއް ނެރުމުން އެ އަމުރު ތަންފީޒު ކުރުމަކީ ގާނޫނުއަަސާސީއާއި ގާނޫނުތަކުން ފުލުހުންގެ މައްޗަށް ލާޒިމް ކަމެއް ކަމަށެވެ. އަދި ހާއްސަކޮށް ސުޕްރީމް ކޯޓުން ނެރުނު އަމުރެއްނަމަ އެ އަމުރާ މެދު އިތުރަށް ސުވާލު އުފެއްދުމުގެ ޖާގައެއް ވެސް ނެތް ކަމަށް އޭނާ ވިދާޅުވި އެވެ.
އަރީފް ވިދާޅުވީ ކޮމިޝަނަރ އޮޕް ޕޮލިސްގެ ހައިސިއްޔަތުން ސުޕްރީމް ކޯޓުން ނެރުނު އަމުރު ތަންފީޒު ކުރުމަށް މަސައްކަތް ކުރުމުން ވަގުތުން މަގާމުން ވަކިކޮށް، ސަރުކާރު ވައްޓާލަން މަސައްކަތް ކުރިކަމަށްބުނެ ޓެރަރިސްޓެއްގެ ތުހުމަތު ކުރުމަކީ އެއްގޮތަކަށްވެސް ގަބޫލު ކުރެވޭނެ ކަމެއް ނޫންކަމަށެވެ.
މީގެއިތުރުން އަރީފް ވިދާޅުވީ ފުލުހުންގެ ހިދުމަތުގައި 29 އަހަރު ހޭދަ ކޮށްފައިވާއިރު، ގާނޫނާ ހިލާފު އެއްވެސް އަމަލެއް ކޮށްފައި ނުވާނެ ކަމަށާއި ދައުލަތުން އޭނާގެ ދައުވާ ކޮށްފައިވަނީ ހަގީގަތުގައި އަމުރު ތަންފީޒު ކުރަން އުޅުމުން ކަމަށާއި ހުވަޔާއި ހިލާފަށް އަމުރު ތަންފީޒު ނުކޮށް ނުހުރެވޭނެ ކަމަށެވެ. އަރީފް ވިދާޅުވީ، އޭނާ ޖަލަށްލާފައި ހުރުމަކީ މި ގައުމުގައި ގާނޫނީ އިމެއްނެތް ކަމާއި ގާނޫނީ ވެރިކަމެއް ނެތްކަން ދޭހަވާ ކަމެއް ކަމަށެވެ.
އަރީފްގެ މައްޗަށް ކުރާ ދައުވާ އިއްވުމުން ދިފާއީ ވަކީލުންގެ ސުވާލުތައް ޕްރޮސެކިއުޓަރ ޖެނެރަލް (ޕީޖީ)ގެ ގާނޫނީ ވަކީލުންނާ ކުރިމަތިވިއިރު، އެމައްސަލަ ބައްލަވާ ގާޒީ އަހުމަދު ހައިލަމްވެސް ވަނީ ބައެއް ސުވާލުތައް ޕީޖީގެ ވަކީލުންނާ ކުރިމަތި ކުރުވާފަ އެވެ.
އަރީފްގެ މައްޗަށް ދައުލަތުން އުފުލާފައިވާ ޓެރަރިޒަމްގެ އަމަލެއް ހިންގަން އުޅުމުގެ ކުށުގެ ދައުވާގައި ވަނީ، އަރީފު، ޕޮލިސް ކޮމިޝަނަރުގެ މަގާމުގައި ހުންނަވައިގެން މަގާމުގެ ނުފޫޒު ބޭނުން ކޮށްގެން 2017 ވަނަ އަހަރުން ފެށިގެން ގާނޫނީ ވެރިކަން ވައްޓާލުމަށް މަސައްކަތްކޮށްފައި ކަމަށެވެ. އަދި އޭނާ 1 ފެބްރުއަރީގައި ނެރުނު އަމުރާ ގުޅުވައި، ފުލުހުންގެ ތެރެއިން އޭނާ ބޭނުންވާ ވަކި ބަޔަކު ނަގައި އިތުރު ފުލުހުންތަކާ ކުރިމަތިލުމަށް ދުރާލާއި ރާވާފައި ކަމަށް ދައުލަތުން ތުހުމަތުކޮށްފައިވެ އެވެ. އޭގެ އިތުރުން ގައުމުގެ ހަމަޖެހުން ނަގާލަން މަސައްކަތްކޮށް، ގާނޫނު އަސާސީ އާއި ގާނޫނުތަކާއި އުސޫލުތަކުގެ ބޭރުން، ދައުލަތަށާއި ސަރުކާރަށް ނޭދެވޭ ނުފޫޒު ފޯރުވައި، އާންމުންގެ ސަލާމަތަށް ނުރައްކާތެރިވާ ފަދަ ހާލަތެއް މެދުވެރިކުރުވަން މަސައްކަތް ކޮށްފައިވާ ކަމަށް ވެސް އަރީފުގެ މައްޗަށް ތުހުމަތުކޮށްފައިވެ އެވެ.
އެދައުވާގައި، ސުޕްރީމް ކޯޓުން 2018 ފެބްރުއަރީ އެއްވަނަ ދުވަހު ނެރުނު އަމުރު ނެރުމަށް، 2017 ވަނަ އަހަރުން ފެށިގެން އަރީފް ކޮށްފައިވަނީ ކޮންކަމެއްތޯއާއި އަރީފާއި ސުޕްރީމް ކޯޓުގެ އެ އަމުރާ އޮތީ ކޮންގުޅުމެއްތޯއާއި ސުޕްރީމް ކޯޓުގެ އެ އަމުރުގައި އަރީފްގެ ސޮޔެއްވެސް ނެތެއް ނޫންތޯއޭ ވިދާޅުވެ ވަނީ ޕީޖީގެ ވަކީލުންނާ ސުވާލު ކުރައްވާފަ އެވެ.
ޕީޖީގެ ވަކީލުން ވިދާޅުވީ ސުޕްރީމް ކޯޓުން އަމުރު ނެރުމުގައި އަރީފްގެ ބައިވެރިވުން އޮތް މިންވަރު، ހެކީންގެ ހެކިބަސް ނަގާއިރު އެނގިގެންދާނެ ކަމަށެވެ. އަދި މިޝަރީއަތަށް ހުށަހެޅިފައިވާ ސިއްރު ބަޔާންތަކާއި ހެއްކާއި ގަރީނާތަކުން އެނގޭނެ ކަމަށްވެސް ދައުލަތުގެ ވަކީލުން ވިދާޅުވި އެވެ.
ދައުވާގެ ބަޔަަށްފަހު އަރީފްގެ ބަންދާއި، ޖަލުގައި އަމަލު ކުރަމުންދާ ގޮތާ ގުޅޭގޮތުން އަރީފްގެ ހުރިކަންބޮޑުވުންތައް ފާޅު ކުރުމަށް އަރީފް އެދިލެއްވުމުގެ މަތިން ގާޒީ ހައިލަމް ވަނީ ދެއްވާފަ އެވެ. އަރީފް ވިދާޅުވީ ކުށް ސާބިތުވެ ޖަލުގައި ހުކުމް ތަންފީޒު ކުރަމުންދާ ގައިދީންނަށް ވުރެ، ކުށެއްގެ ތުހުމަތުގައި ހައްޔަރުކޮށްގެން ޖަލުގައި އޭނާ ބައްހަޓާފައިވާއިރު، އޭނާއަށް ލިބެންޖެހޭ ހައްގުތައް ވަރަށް ބޮޑަށް ހަނިކޮށްފައިވާ ކަމަށެވެ.
އެކަނިމާއެކު ކުޑަ ތަންކޮޅެއްގައި ބަހައްޓާފައިވާއިރު، އެތަނުން ނެރެނީ ދުވާލަކު އެއްގަޑިއިރަށް ކަމަށް އަރީފް ވިދާޅުވި އެވެ. އަދި އެއްްވެސް މީހަކާ ބައްދަލުނުވާކަމަށާއި ސިއްހީ ފަރުވާއާއި އާއިލީ ބައްދަލުވުމާއި ގާނޫނީ ވަކީލުންނާ ބައްދަލު ކުރުމުގެ ފުރުސަތުވެސް ލިބެނީ ވަރަށް ވަރުން މަސައްކަތް ކޮށްގެން ކަމަށް އޭނާ ވިދާޅުވި އެވެ. އަރީފް ވިދާޅުވީ ކޮންމެ ކަމަމަށް އެދުމަށް ފޯމެއް ހުށަހަޅަން ޖެހޭއިރު، ހާއްސަކޮށް ޑޮކްޓަރަށް ދެއްކުންފަދަ ކަންކަމަށް ވަރަށް ގިނަ ދުވަސް ނަގާކަމަށެވެ.
އަރީފްގެ އެ ޝަކުވާތަކަށް ޕީޖީގެ ވާކީލުން ވިދާޅުވީ ކޮންމެ ދުވަހަކު ނަރުސް ކުއްޖެއް އަރީފް ގާތަށް ދާނެ ކަމަށާއި ހަފްތާއަކު އެއްފަހަރު، އާއިލާ ބައްދަލުވުން އެއް ގަޑިއިރަށް، އަދި ހަމަޖެހިފައި އޮންނަ އުސޫލުން ގާނޫނީ ވަކީލުންނާވެސް ބައްދަލު ކުރެވޭ ކަމަށެވެ. ނަމަވެސް އަރީފް ވިދާޅުވީ ނާރުސް ކުއްޖެއް ނާންނަ ކަމަށާއި ޑޮކްޓަރަށް ދެއްކުމަށް މިހާރުވެސް އެދިފައިވާތާ ވަރަށް ގިނަ ދުވަސްވެފައިވާ ކަމަށެވެ.
އަރީފްގެ ގާނޫނީ ވަކީލު ހިސާން ހުސައިން ވިދާޅުވީ އެއްވެސް މީހަކާ ބައްދަލު ނުވާގޮތަށް އެގޮތަށް ކުޑަ ތަންކޮޅެއްގައި ބަންދުކޮށްފައި ބެހެއްޓުމަކީ ނަފްސާނީ ގޮތުން ބަލިކަށި ކޮށްލުމަށް ނޫން ސަބަބެއް ނެތް ކަމަށާއި އެކަން ދިފާއުކޮށް ދައުލަތުން ވާހަކަ ދައްކަވާތީ ހިތާމަ ކުރައްވާ ކަމަށެވެ. އަދި ދައުލަތުގެ ބެލުމުގެ ދަށުގައި ބަންދުކޮށްފައިވާ މީހުންނާމެދު ގާނޫނީ އިމުގެ ތެރެއިން އަމަލު ކުރުމަށާއި އިންސާނީ ހައްގުތަކާއި އިންސާނީ ކަރާމާތް ނުގެއްލޭގޮތަށް އަމަލު ކޮށްދިނުމަށާއި އެއާ ހިލާފަށް އުސޫލެއް އަދި ގަވާއިދެއް ވިޔަސް ވާނަމަ އެކަންކަން އިސްލާހު ކޮށްދެއްވުމަށް ބާރު އަޅުއްވާ ދެއްވުމަށް ގާޒީ ހައިލަމް އަރިހުން ހިސާން އެދިލެއްވި އެވެ.
ހައިލަމް ވިދާޅުވީ ޕީޖީގެ ވަކީލުން ޕީޖީ އާއިޝަތު ބިޝާމްއަށް މިކަންކަން ހިއްސާކޮށް، އެކަންކަން އިސްލާހު ކުރުމަށް ދަންނަވާ ކަމަށެވެ. އަދި ދެން މިމައްސަލާގައި ބޭއްވޭ އަޑުއެހުމެއްގައި މިކަންކަމާ ގުޅޭގޮތުން ސުވާލު ކުރެވޭނެ ކަމަށްވެސް ހައިލަމް ވިދާޅުވި އެވެ.
