ޖަލު ބަންދުގައި ހުންނެވި ރައީސް މައުމޫންގެ ހާލުކޮޅު ދަނީ ކޮންމެ ދުވަހަކުވެސް ގޯސްވަމުން ކަމަށް ރައީސް މައުމޫން ފެކްޝަންގެ ނައިބު ރައީސާއާމިނަތު ނާދިރާވިދާޅުވެއްޖެ އެވެ.
ރާއްޖެއެމްވީން ދެންނެވި ސުވާލަކަށް ޖަވާބު ދެއްވަމުން ނާދިރާ ވިދާޅުވީ ރައީސް މައުމޫންގެ ސިއްހީ ހާލުކޮޅު ރަނގަޅު ނުވާ ކަމަށާއި، އިއްޔެ އޭޑީކޭއަށް ޑޮކްޓަރަށް ދެއްކުމަށް ގެނައީ ވެސް ކުއްލި އަކަށް ކަމަށެވެ.
ނާދިރާ ވިދާޅުވީ ރައީސް މައުމޫން އިއްޔެ އޭޑީކޭއަށް ގެނެސް ލޮލުގެ ޚާއްސަ މީހަކަށް ދެއްކި ކަމަށާއި، އެމްއާރްއައި ވެސް ހެދި ކަމަށެވެ. އަދި އެމަނިކުފާނުގެ ޓެސްޓްތަކުގެ ނަތީޖާ އާއިލާއަށް ނުލިބޭ ކަމަށް ވިދާޅުވިއެވެ.
" ބައެއް މީހުންނަށް ރައީސް މައުމޫން ހޮސްޕިޓަލަށް ގެނައި މަންޒަރު ފެނިގެން އާއިލާއަށް ގުޅާފައި ބުނީ. ހޮސްޕިޓަލުން ފެނުނު. އެކަމަކު ބައްދަލު ކޮށްލާ ވާހަކަ ދައްކާލަން ފުރުސަތެއް ނުދޭ " ނާދިރާ ވިދާޅުވިއެވެ.
ނާދިރާ ވިދާޅުވީ ރައީސް މައުމޫނަށް ކުރިމަތިވެވަޑައިގަނެފައިވާ މައްސަލައަކީ ބެނިން ޕްރޮކްސިމަލް ޕޮޒިޝަނަލް ވާޓީގޯ(ބީޕީޕީވީ) ނަމަކަށް ކިޔާ ހާލަތެއް ކަމަށެވެ. އެ ހާލަތު ކުރިމަތިވުމުން ބޮލަށް ގެންނަ ހަރަކާތެއްގެ ސަބަބުން ބެލެންސުން ނެއްޓި މީހާ ވެއްޓޭ ގޮތް މެދުވެރިވެދާނެއެވެ. އަދި އެ ހާލަތު ކުރިމަތިވާ މީހާއަށް އޭނާގެ ވަށައިގެން ހުންނަ އެއްޗެހި އެބުރޭހެން ހީވެދާނެއެވެ. އޭގެއިތުރުން ސްޓްރޯކް ޖެހުން ފަދަ ނުރައްކާތެރި ސިއްހީ މައްސަލަތައް ކުރިމަތިވެދާނެއެވެ. އެހެންކަމުން އެމަނިކުފާނުގެ އަރިހުގައި އަބަދުވެސް އާއިލާ ބޭފުޅަކު ހުންނަވަން ޖެހޭ ކަމަށް ނާދިރާ ވިދާޅުވިއެވެ.
މީގެ އިތުރަށް ނާދިރާ ވިދާޅުވީ ކުރިއަށް އޮތީ ރަމަޟާން މަހަށްވުމާއެކު ކަރެކްޝަން ބޭފުޅުންނަށް ރައީސް މައުމޫން ބެލޭނެ ކަމަށް ގަބޫލު ނުކުރާ ކަމަށާއި، އެމަނިކުފާނު ގެއަށް ބަދަލުކުރަންޖެހޭ ކަމަށެވެ. ރައީސް މައުމޫނަކީ ހުކުމެއްގައި ބަންދު ކުރައްވައިފައި ހުރި ކުށްވެރިއެއް ނޫން ކަން ފާހަގަކުރައްވާ ނާދިރާ ވިދާޅުވީ އެމަނިކުފާނަށް ލިބެންޖެހޭ ހައްގުތައް ނިގުޅައި ނުގަނެވޭނެ ކަމަށެވެ.
ނާދިރާ ވިދާޅުވީ ރައީސް މައުމޫންގެ ސިއްހީ ހާލުކޮޅު ގޯސްވުމާއި ގުޅިގެން ގެއަށް ބަދަލު ކޮށްދެއްވުމަށް އެދި ސަރުކާރުގެ އެކި މުއައްސަސާތަކަށް ލިޔެ ކިޔުންތައް ހުށައެޅި ނަމަވެސް މިހާތަނަށް އެއްވެސް ޖަވާބެއް ދީފައި ނުވާ ކަމަށެވެ. އަދި މިކަމުގައި އަލި މަގެއް ފެންނަން ނެތް ކަމަށާއި، މިއީ އާއިލާ ވަރަށް ކަންބޮޑުވާ މައްސަލަ އެއް ކަމަށް ވެސް ނާދިރާ ވިދާޅުވިއެވެ.
ރައީސް ޔާމިންގެ ވެރިކަން ގާނޫނު އަސާސީއާ ހިލާފަށް ވައްޓާލަން މަސައްކަތް ކުރިކަމުގެ ތުހުމަތާއި އިތުރު ތުހުމަތުތައްކޮށް ރައީސް މައުމޫނު ހައްޔަރު ކޮށްފައިވަނީ ކުއްލި ނުރައްކަލުގެ ހާލަތު އިއުލާނު ކުރުމަށް ފަހު މިއަހަރުގެ ފެބްރުއަރީ މަހުގެ ފަސް ވަނަ ދުވަހުގެ ރޭ މެންދަމުގެ ވަގުތެއްގައެވެ.
