މިއަދު ކްރިމިނަލް ކޯޓުން ދެފަޑިޔާރުންގެ މައްޗަށް ކުރި ހުކުމަކީ ދީނީ އަދި ގައުމީ ޒިންމާ އެބޭފުޅުން އަދާކުރުމުގެ ނަތީޖާ ކަމަށް ގުޅިފައިވާ ޕާޓީތަކުން ބުނެފިއެވެ.
ގުޅިފައިވާ ޕާޓީތަކުން މިއަދު އެމްޑީޕީ އޮފީހުގައި ބޭއްވި ނޫސްވެރިންގެ ބައްދަލުމުގައި އަދާލަތު ޕާޓީގެ މީޑިއާ ކޮމެޓީގެ މުގައްރިރު އަލީ ނަޒީރު ވިދާޅުވީ ރަސްމީ ހައިސިއްޔަތުން ކުރަންޖެހޭ ކަމަކަށް ނުފޫޒު ފޯރުވުމުގެ ދައުވާ ސާބިތުވާކަމަށް ނިންމައި އުއްތަމަ ފަނޑިޔާރު އަބްދުﷲ ސައީދާއި ސުޕްރީމް ކޯޓުގެ ފަނޑިޔާރު އަލީ ހަމީދާއި ދެބޭފުޅުން ވެސް 1 އަހަރާއި 7 މަހާއި 6 ދުވަހަށް ޖަލަށްލުމަށް ކުރި ހުކުމަކީ އިންސާފުން އެއްކިބާވެފައިވާ ހުކުމެއް ކަމަށެވެ.
ގުޅިފައިވާ ސިޔާސީ ޕާޓީތަކުން ދެކޭ ގޮތުގައި އެދެފަޑިޔާރުންގެ މައްޗައް ކުރި ހުކުމުގެ މަހްފޫމަކީ މިރާއްޖޭގެ ރައްޔިތުންގެ ޝަކުވާތައް އިންތިހާއަށް ބޮޑުވުމުން މިރާއްޖޭގެ ދައުލަތުގެ ތެރޭގައި ހިނގަމުން ދިޔަ ކޮރަޕްޝަނާއި ވައްކަމާއި ފަސާދައިގެ ކަންކަން ހައްދުން ނެއްޓިގެން ދިއުމާއި ގުޅިގެން ރާއްޖެ ސަލާމަތް ކުރުމަށް ކުރި މަސައްކަތް ކަމަށް އަލީ ނަޒީރު ވިދާޅުވިއެވެ.އަދި ފަނޑިޔާރުންގެ މައްޗަށް ކުރެވެމުންދާ ހުކުމްތަކާއި ހިންގޭ ޝަރިއަތްތަކުން ފަނޑިޔާރުންނަށާއި ކޯޓުތަކަށް ސީދާ ނުފޫޒު ފޯރުވާކަން ހާމަވާކަމަށް ނަޒީރު ވިދާޅުވިއެވެ.
"އެހުކުމާއި ހަމައަށް އައުމުގައި ދައުލަތުގެ ފަރާތުން ހިނގާފައި އައި މަގަކީ ގާނޫނީ އިޖުރާތްތަކުގެ ބޭރުން ހިނގާފައި އޮތް މަގެއްކަން ގާނޫނީ އިޖްރާތްތަކަށް ނުފެތޭ މަގެއްކަން ހާމަވޭ. އެހެނީ ގާނޫނީ އިޖުރާތްތަކުގެ ތެރެއިން އެކަން ކުރާނަމަ ސްޕްރިމްކޯޓުގެ ފަޑިޔާރުން ހައްޔަރުކުރުމަށްޓަކައި ފަނޑިޔާރު ގޭގެ ޓިނު ނަގަން ނުޖެހުނީސް ކުއްލި ނުރައްކަލުގެ ހާލަތު އިއުލާން ކުރާކަށް ނުޖެހުނީސް އަދިވެސް ހާމަކަން ބޮޑު ގޮތެއްގައި ކޯޓުގެ ޕްރޮސީޖާރ ތެރޭގައި ހިނގަމުން ދިޔަ ކަންކަން އެގޮތަށް ހިނގާކަށް ނުޖެހުނީސް" އަލީ ނަޒީރު ވިދާޅުވިއެވެ.
އަދާލަތު ޕާޓީގެ މީޑިއާ ކޮމެޓީގެ މެމްބަރު އަލީ ނަޒީރު ވިދާޅުވީ އެކެއް ފެބްރުއަރީގެ ހުކުމަކީ ގާނޫނު ނެގެހެއްޓުމަށްޓަކައި ނެރެފައިވާ ހުކުމެއް ކަމަށާއި، މިހުކުމް ތަންފީޒު ނުކުރުމަށް ގާނޫނު އަސާސީއާ ހިލާފަށް މިއަދު ކަންތައްތައް ކުރެވުނު ނަމަވެސް އިންސާފު އެފަރާތްތަކާއި އަރާ ހަމަކުރާނެ ދުވަސް ވަރަށް އަވަހަށް އަންނާނެ ކަމަށެވެ.
އަލީ ނިޒާރު ވިދާޅުވީ ރައީސް މައުމޫން ސިއްހީ ހާލުކޮޅު ގޯސްވަމުންދާ ކަމަށާއި ޑޮކްޓަރުން ތަކުރާރުކޮށް ޖަލުން އެމަނިކުފާނު ދޫކޮށްލުމަށް އިރުޝާދު ދެމުންދާއިރު ވެސް ޖަލުގައި ހައްޔަރުކޮށްފައިވާތީ ކަންބޮޑުވާ ކަމަށެވެ.
ރައީސް ޔާމީނު ގާތްގުޅުމެއް ބޭއްވެވި ކޮރަޕްޝަނާއި ފަސާދައިގެ ތުހުމަތުތައް ކުރެވިފައިވާ މެލޭޝިޔާގެ ބޮޑުވަޒީރު ނަޖީބު ރައްޒާޤާއި މެލޭޝިޔާގެ އާއްމު އިންތިހާބަށް އިޝާރާތްކުރައްވާ އަލީ ނިޒާރު ވިދާޅުވީ އިލެކްޝަން ކޮމިޝަނުން ރިޔާސީ އިންތިހާބު އޮޅުވާލަން މަސައްކަތް ކުރެއްވި ނަމަވެސް އެކަން ކާމިޔާބު ނުވާނެ ކަމަށެވެ. ރައީސް ޔާމިންގެ އަންގަވާ ގޮތުގެ މަތިން ވަކި ނަތީޖާއެއް ނެރުމަށް މަސައްކަތް ނުކޮށް އިލެކްޝަން ކޮމިޝަނުގެ ރައީސް އާއި، މެމްބަރުން އިސްތިއުފާ ދެއްވުމަށް ވެސް އަލީ ނަޒީރު ގޮވާލެއްވިއެވެ