ކާފަ ވިދާޅުވާ ބެފުޅުންނަށް ރައީސް މައުމޫނާއި ބައްދަލުކުުރުމުގެ ފުރުސަތު ދެއްވުމަށް އެދިވަޑައިގެންފި
10 މެއި 2018 | ބުރާސްފަތި 13:43ރައީސް މައުމޫނަށް ކާފަ ވިދާޅުވާ ބޭފުޅުންނަށް އެމަނިކުފާނާއި ބައްދަލުކުރުމަށް ފުރުސަތު ދެއްވުމަށް އެދިވަޑައިގަނެފި
މެޑަމް ނަސްރީނާ އަދި ޔުމްނާ މައުމޫން ހައިކޯޓަށް ވަޑައިގެންނެވުމަށްފަހު ނިކުމެވަޑައިގަންނަވަނީ
ކުރީގެ ރައީސް މައުމޫން އަބްދުލް ޤައްޔޫމާއި ބައްދަލު ކުރުމުގެ ފުރުސަތު އެމަނިކުފާނަށް ކާފަ ވިދާޅުވާ ބޭފުޅުންނަށް ދެއްވުމަށް އެމަނިކުފާނުގެ އަނބިކަނބަލުން ނަސްރީނާ އިބްރާހިމް އެދިވަޑައިގެންފިއެވެ.
އެކްޓިންގ ކޮމިޝަނަރ އޮފް ޕޮލިސްގެ މަގާމުގައި ހުންނެވި ޑެޕިއުޓީ ކޮމިޝަނަރ އޮފް ޕޮލިސް އަބްދުﷲ ނަވާޒަށް ނަސްރީނާ ފޮނުއްވެވި ސިޓީގައި ވިދާޅުވެފައިވަނީ ރައީސް މައުމޫނަށް ކާފަ ވިދާޅުވާ ބޭފުޅުންނަށް އެމަނިކުފާނާއި ބައްދަލުކުރެއްވުމަށް ދޫނިދޫއަށް ދިއުމުގެ ހުއްދަދެއްވުން އެދޭ ކަމަށެވެ.
ރައީސް މައުމޫންގެ ސިއްހީ ހާލުކޮޅު ގޯސްވެ އެކަމަނާ ދޫނިދޫއަށް ވަޑައިގަންނަވާއިރު ކާފަ ވިދާޅުވާ ބޭފުޅުން ރައީސް މައުމޫންގެ ހާލުކޮޅު ބެލުމަށް ޒިޔާރަތް ކުރުމަށް ބޭނުންފުޅުވާކަން ފާހަގަކުރައްވާ ނަސްރީނާ ވިދާޅުވީ ރައީސް މައުމޫން މާފުށީ ޖަލުގައި ހުންނެވިއިރު އެމަނިކުފާނާއި ބައްދަލު ކުރުމުގެ ފުރުސަތު ކާފަ ވިދާޅުވާ ބޭފުޅުންނަށް ލިބުނު ކަމަށެވެ. އެހެންކަމުން ރައީސް މައުމޫން ދޫނިދޫގައި ހުންނަވާއިރު ވެސް އެމަނިކުފާނާއި ބައްދަލުކުރުމުގެ ފުރުސަތު ދެއްވުމަށް ނަސްރީނާ ވަނީ އެދިވަޑައިގެންފައެވެ.
އެނގިފައިވާ ގޮތުގައި ރައީސް މައުމޫންގެ ހާލުކޮޅު ހޮނިހިރު ދުވަހު ސީރިއަސްވެ، އެމަނިކުފާނު ބައްލަވަން ޑޮކްޓަރަކުވެސް ދިޔައެވެ. އަދި ރައީސް މައުމޫން ބަންދުކޮށްފައި ހުންނަވާ ކޮޓަރީގައި ހޮނިހިރު ދުވަހު ފުލުހަކު ޑިއުޓީއަށް ހުރިކަމަށް މައުލޫމާތު ލިބެއެވެ. އޭގެ ފަހުން އެމަނިކުފާނުގެ ހާލުކޮޅު އަދި ރަނގަޅު ނުވާއިރު ކޯޓަށް ހާޒިރު ކުރެވޭވަރު ނުވެގެން އެމަނިކުފާނާ ދެކޮޅަށް ކުރާ ޝަރީއަތްތަކުގެ އަޑުއެހުންތަކެއް ވެސް ވަނީ ކެންސަލްކޮށްފައެވެ.
ރައީސް މައުމޫންގެ އަރިހުގައި އަބަދުވެސް މީހަކު ހުންނަން ޖެހޭކަމަށް ޑޮކްޓަރު ލަފާ ދެއްވާފައިވަނީ އެމަނިކުފާނަށް ސިއްހީ މައްސަލައެއްކަމަށްވާ 'ބިނައިން ޕެރޮކްސިސްމަލް ޕޮޒިޝަނަލް ވަރޓިގޯ' (ބީ.ޕީ.ޕީ.ވީ) ޖެހިފައިވާތީއެވެ. މިބައްޔަށް މިދިޔަ ޑިސެމްބަރު މަހުވެސް ރައީސް މައުމޫނަށް ފަރުވާދެއްވާފައިވާކަމަށް އައިޖީއެމްއެޗް ގެ އީއެންޓީ ސްޕެޝަލިސްޓެއް ވިދާޅުވެ، ދެއްވާފައިވާ ލިޔުމެއް އާއިލާއިން ވަނީ ކަމާއި ބެހޭ ފަރާތްތަކާއި ހަވާލުކޮށްފައެވެ .
