ޖުމްހޫރީ ޕާޓީގެ ނައިބު ލީޑަރު އަދި ރައްޔިތުންގެ މަޖިލީހުގެ ކިނބިދޫދާއިރާގެ މެންބަރު ޢަބުދުﷲ ރިޔާޒް ހައްޔަރުކޮށް ފުރަތަމަ ބާއްވާފައިވަނީ ޖަނަވާރު ވެސް ބާއްވަން ހެޔޮނުވާވަރުގެ ގޮޅިއެއްގައިކަމަށް ކެންދޫ ދާއިރާގެ މެންބަރު ޢަލީ ހުސައިން ވިދާޅުވެއްޖެއެވެ.
ގުޅިފައިވާ ޕާޓީތަކުން ބުދަ ދުވަހުގެރޭ ކުނޫޒްގައި ބޭއްވި ޕެނަލް ޑިސްކަޝަންގައި ވާހަކަ ދައްކަވަމުން ޤާނޫނީ ވަކީލް ޢަލީ ހުސައިން ވިދާޅުވީ ޢަބްދުﷲ ރިޔާޒް ހައްޔަރު ކުރުމުން އެހައްޔަރު ކުރެވުނީ މުޅި ކިނބިދޫ ދާއިރާގެ ރައްޔިތުން ކަމަށާއި އެއީ ކިނބިދޫ ދާއިރާގެ ރައްޔިތުންގެ އަޑު ކަނޑުވާލުން ކަމަށެވެ.
އަލީ ހުސައިން ވިދާޅުވީ ރިޔާޒް ހައްޔަރުކުރީ ޤާނޫނޫން އަސާސީއާއި ޤާނޫން ތަކާއި ރާއްޖެ ބައިވެރިވެފައިވާ ބައިނަލްއަޤްވާމީ މުއާހަދާތަކާވެސް ޚިލާފަށް ކަމަށާއި ހައްޔަރު ކުރުމަށްފަހުވެސް ޢަމަލް ކުރީ ޤާނޫނާ ޚިލާފަށް ކަމަށެވެ.
އެސްއޯއީގެ ދަށުން ބަންދުގެ މުއްދަތު ޖަހާފައިވަނީވެސް ސަސްޕެންޑް ކޮށްފައިވާ ޖިނާއީ އިޖުރާއަތުގެ ޤާނޫންގެ ދަށުންކަމަށާއި އެއީވެސް ޤާނޫނާ ޚިލާފަށް ކޮށްފައިވާ ކަމެއްކަމަށް ޢަލީ ހުސައިން ވިދާޅުވިއެވެ.
"ބަންދުކޮށްފައިހުރިއިރު ހުރީ ފުރަތަމަ ފަންކާއެއްވެސް ނެތްތަނެއްގައި. އިންސާނުން ބައިތިއްބަން ހެޔޮނުވާބަރުގެ ތަނެއްގައި. ޖަނަވާރުވެސް ބާއްވަން އެކަށީގެން ނުވާވަރުގެ ތަނެއްގައި ފުރަތަމަ ޢަބްދުﷲ ރިޔާޒް ބާއްވާފައި އޮތީ"
ޢަލީ ހުސައިން ވިދާޅުވީ ހައިކޯޓުން ހުކުމް ކުރީ އިސްތިއުނާފް ނުކުރާ ޕޮއިންޓަކަށް ރިއާޔަތްކޮށްފައި ކަމަށާއި އަބްދުﷲ ރިޔާޒަށް ހުކުމް ކުރީ އަސާސީ ހައްޤެއް ބޭނުންކުރީތީ ކަމަށެވެ. އެއީ އެމީހަކަށް އެނގޭ މައުލޫމާތެއް ނުދިނުންކަމަށާއި ފޯނު ކޯޑަކީ އެނގިހުރި މައުލޫމާތެއް ކަމަށެވެ. ބްލަޑް ސާމްޕަލްއާއި ފިންގަރޕްރިންޓް ދޭން އެންގިދާނެ ކަމަށާއި އެކަމަކު ކޯޑް ދޭކަށް ނުޖެހޭނެ ކަމަށެވެ.
ޢަބްދުﷲ ރިޔާޒް ހައްޔަރުކުރީ ޓެރަރިޒަމްގެ ކުށަކުނޫންކަން ފާހަގަ ކުރައްވަމުން ޢަލީ ހުސައިން ވިދާޅުވީ އޭގެފަހުން ނުފަށާ ޝަރީއަތެއް ނިމެންދެން ވާނުވާ ޖެހީ ޓެރަރިޒަމްގެ ކުށުގައި ކަމަށެވެ.
ޢަލީ ހުސައިން ވިދާޅުވީ ސިއްހީ ފަރުވާވެސް ރިޔާޒަށް ނުދޭ ކަމަށާއި ޑޮކްޓަރަށް ދެއްކުމަށްވެސް ނުގެންނަ ކަމަށެވެ. އެގޮތުން
ލޮލުގެ ޑޮކްޓަރަކަށް ދައްކަން އެދޭތާ ހަފްތާއެއްވެފައިވާއިރު އަދިވެސް ނުގެންނަކަމަށް ޢަލީ ހުސައިން ވިދާޅުވިއެވެ.
އަބްދުﷲ ރިޔާޒަކީ ގިނައިން ފޮތްވިދާޅުވާ ބޭފުޅެއްކަން ފާހަގަ ކުރައްވަމުން ޢަލީ ހުސައިން ވިދާޅުވީ ގެންދާ ފޮތްތަކުންވެސް ރިޔާޒްށް ލިބެނީ ވަކި ބާވަތްތަކެއްގެ ފޮތްތަކެއް ކަމަށެވެ.
ޢަލީ ހުސައިން ވިދާޅުވީ މިމައްސަލަތައް ފާހަގަކޮށް އެޗްއާރުސީއެމަށް ސިޓީލާފައިވާކަމަށާއި ލީ ސިޓީގެ ޖަވާބު އަދިވެސް ނުދޭކަމަށެވެ.
މީގެ އިތުރުން އަލީ ހުސައިން ވިދާޅުވީ ރިޔާޒްގެ މައްޗަށް ކޮށްފައިވާ ޓެރަރިޒަމްގެ ދައުވާއަކީ ދޮގުދައުވާތަކެއް ކަމަށާއި އެކަން އެނގެނީ ލީކުވެފައިވާ ސިއްރު ބަޔާންތަކުން ކަމަށެވެ. ސިއްރުން ވަގަށް މިކަން ކުރަނީ ދޮގު ދައުވާއަކަށްވީތީ ކަމަށާއި ޓެރަރިޒަމްގެ ކުށެއް ކޮށްފިއްޔާ ރައްޔިތުންނަށް އެކަން އެނގެން ޖެހޭނެކަމަށެވެ. އަދި އެކަމާމެދު ރައްޔިތުން ބިރުގަންނަން ޖެހޭ ކަމަކަށްވެސްވާންވާނެކަމަށް ޢަލީ ހުސައިން ވިދާޅުވިއެވެ.
