މެމްބަރުން އިތުރު ކުރުމަށް ޖޭޕީން ހަރަކާތްތަކެއް ހިންގަނީ
9 މެއި 2018 | ބުދަ 08:41ގިނަ މެމްބަރުންތަކެއް ވަނީ އެމީހުންނަށް ނޭނގި އެހެން ޕާޓީތަކުގެ ދަފްތަރުގައި ހިމަނާފައި
ޑރ. އަބްދުﷲ މައުސޫމް | ޓްވިޓަރ
މެމްބަރުން އިތުރުކުރުމަށް ޖުމްހޫރީ ޕާޓީ (ޖޭޕީ)އިން "ޖޭޕީ ހޭވައްލާ"ގެ ނަމުގައި ހާއްސަ ކެމްޕޭނެއް ފެށުމަށް ނިންމައިފި އެވެ
ޖުމްހޫރީ ޕާޓީގެ މައި، އޮފީސް މ. ކުނޫޒުގައި މިއަދު ބޭއްވި ނޫސްވެރިންގެ ބައްދަލުވުމެއްގައި އެޕާޓީގެ އެކްޓިވިޓީ ކޮމިޓީގެ ޗެއާރ ޑރ. އަބްދުﷲ މައުސޫމް ވިދާޅުވީ ޖޭޕީގެ މިހާއްސަ ކެމްޕޭން ފެށުމަށް ހަމަޖެހިފައިވަނީ ބުރާސްފަތި ދުވަހުގެ ރޭ 9:00 ޖަހާއިރު ކުނޫޒުގައި ބާއްވާ ހާއްސަ ރަސްމިއްޔާތަކާއެކު ކަމަށެވެ.
މައުސޫމް ވިދާޅުވީ ޖުމްހޫރީ ޕާޓީގެ މެމްބަރުންގެ ގޮތުގައި ކުރިން ތިއްބެވި ބައެއް މެމްބަރުން، އެ މެމްބަރުންނަށް ނޭނގި އެހެން ޕާޓީތަކުގެ މެމްބަރުންގެ ދަފްތަރުގައި ހިމަނާފައިވާ ކަމަށެވެ. އެހެންކަމުން އެ މެމްބަރުންނަށާއި އިތުރަށް މެމްބަރުން އިތުރުކުރުމަށް ހިންގާ މިހަރަކާތް ވަރަށް ފޯރިއާއެކު ކުރިއަށް ދާނެ ކަމަށް ވެސް މައުސޫމް ވިދާޅުވި އެވެ.
މައުސޫމް ވިދާޅުވީ މިކެމްޕޭނަކީ ޖޭޕީ ވަރުގަދަ ޕާޓީއަކަށް ހެދުމަށް ކުރާ މަސައްކަތުގެ ވަރަށް މުހިއްމު ބައެއް ކަމަށެވެ. އެހެންކަމުން ޖުމްހޫރީ ޕާޓީގެ ހުރިހާ މެމްބަރުންނަށާއި އަދި ސަޕޯޓް ކުރައްވާ ހުރިހާ ފަރާތްތަކެއް ބުރާސްފަތި ދުވަހުގެ ރޭ ބާއްވާ ހާއްސަ ރަސްމިއްޔާތަށް ވަޑައިގެންނެވުމަށް މައުސޫމް އެދިވަޑައިގެންނެވި އެވެ.
މެމްބަރުން އިތުރު ކުރުމަށް ހިންގާ މިހަރަކާތް ރިޔާސީ އިންތިހާބާ ހަމަޔަށް ކުރިއަށްދާނެ ކަމަށް ވެސް މައުސޫމް ވިދާޅުވި އެވެ. މައުސޫމް އިތުރަށް ވިދާޅުވީ މި ކެމްޕޭން މުޅި ރާއްޖޭގައި ކުރިއަށް ގެންދާނެ ކަމަށާއި ކެމްޕޭން ކުރިއަށްދާއިރު އުފާވެރި ހަބަރުތައް ވެސް ލިބެމުންދާނެ ކަމަށެވެ.
ޖޭޕީގެ މެންބަރުންގެ ގޮތުގައި ޖޭޕީގައިވާ ދަފްތަރާއި އިލެކްޝަންސް ކޮމިޝަންގައި އޮތް ޖޭޕީގެ ދަފްތަރުގައިވާ ޖުމްލަ އަދަދުގައި ބޮޑު ތަފާތެއް ހުރުމުން އިލެކްޝަންސް ކޮމިޝަނުގެ އިހުލާސްތެރިކަމާމެދު މައުސޫމް ވަނީ ސުވާލު އުފައްދަވާފަ އެވެ. މައުސޫމް ވިދާޅުވީ ބައެއް ޕާޓީތަކުން މެމްބަރޝިޕް ފޯމްތައް އިލެކްޝަންސް ކޮމިޝަނަށް ހުށަހެޅުމާއެކު މަދު ދުވަސްކޮޅެއްގެ ތެރޭގައި ދަފްތަރުގައި ހިމަނާއިރު، ޖޭޕީގެ މެމްބަރުން ދަފްތަރުގައި ހިމެނެން ވަރަށް ގިނަ ދުވަސް ނަގާ ކަމަށެވެ. އަދި މަމްބަރުކަމުގެ ގިނަ ފޯމްތަކެއް "ރިޖެކްޓް" ކުރަމުންދާއިރު، ފޯމް ފުރާފައިވާ ބައެއް ފަރާތްތައް އިލެކްޝަންސް ކޮމިޝަނަށް ހާޒިރުކޮށްދީގެން ވެސް ޖޭޕީގެ ދަފްތަރުގައި ހިމަނަންޖެހުނު ކަމަށްވެސް މައުސޫމް ވިދާޅުވި އެވެ.
ޖުމްހޫރީ ޕާޓީގެ ސްޕޯކްސްޕާސަން އަލީ ސޯލިހް ވިދާޅުވީ ޖުމްހޫރީ ޕާޓީއަކީ ހުރިހާ ބޭފުޅުންނަށް ވެސް ސިޔާސީގޮތުން ކުރިއަށް ދިއުމަށް ފުރުސަތު އޮތް ޕާޓީއެއް ކަމަށެވެ. އަދި ޖުމްހޫރީ ޕާޓީއާއެކު ކުރިއަށް ދިއުމަށްހުރި ފުރުސަތުތަކާއި ވަރަށް ގިނަ މައުލޫމާތު "ޖޭޕީ ހޭވައްލާ" ހަރަކާތުން ލިބިގެންދާނެ ކަމަށްވެސް އަލީ ސޯލިހު ވިދާޅުވި އެވެ.
