ރައީސް ޔާމީންގެ އަނިޔާވެރިކަން މަރުހަލާއަކަށްފަހު މަރުހަލާއެއް އިތުރުވިޔަސް އަޅުގަނޑުމެން ފަހަތަކަށް ނުޖެހޭނަން: ޝިދާތާ
މީހުންނަށް ބިރު ދައްކައިގެން ޓާގެޓް ކުރައްވައިގެން ޖަލަށް ލިޔަސް އެކަމުން ކުރާނެ އެއްވެސް ފައިދާއެއް ނެތް
ފަލަސުރުހީ ޕްރޮގްރާމްގެ ތެރެއިން
ރައީސުލް ޖުމްހޫރިއްޔާ އަބްދުﷲ ޔާމީން އަބްދުލް ޤައްޔޫމްގެ އަނިޔާވެރިކަން މަރުހަލާއަކަށްފަހު މަރުހަލާއެއް އިތުރުވިޔަސް ގުޅިފައިވާ ސިޔާސީ ޕާޓީތަކުން ފަހަތަށް ނުޖެހޭނެ ކަމަށް އަދާލަތު ޕާޓީގެ ފޮރިން ރިލޭޝަންސް ކޮމެޓީގެ މުޤައްރިރު ޝިދާތާ ޝަރީފް ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި ހޯމަ ދުވަހުގެރޭ ވާހަކަދައްކަވަމުން ޝިދާތާ ވިދާޅުވީ މީހުންނަށް ބިރު ދައްކައިގެން ޓާގެޓް ކުރައްވައިގެން ޖަލަށް ލިޔަސް އެކަމުން ކުރާނެ އެއްވެސް ފައިދާއެއް ނެތްކަން ހުދު ރައީސް ޔާމީންވެސް ޤަބޫލުފުޅުކުރައްވާނެ ކަމަށެވެ.
"މިކަން ފެށިގެން މިދިޔައީ ސިޔާސީ ގޮތުން ވާދަވެރި ހުރިހާ އެންމެން ނެތިކޮށްލުމުގެ މަރުހަލާއިން ފެށިގެން. ފުރަތަމަ ޕާޓީތަކުގެ ލީޑަރުން ޖަލަށްލީ. ދެން އެއަށްފަހު ވާދަވެރި ޕްރޮފައިލްއެއް ދައްކަވާފާނެހެން ހީވާ އެންމެންވެސް ޖަލަށް ލީ. އޭގެ ތެރެއިން އާއިލާތަކަށްވެސް އަނިޔާ ކުރަމުން އެ ގެންދަނީ. އެހެންނަމަވެސް މިކަމުގެ ތެރެއިން އަޅުގަނޑުމެން އެންމެންނަށް ދަސްވެފައި މިތިބީ އިތުރަށް ހިތްވަރު ކުރަން. ދެން އަޅުގަނޑުމެންނަށް މިއަދު ފެނިގެންދަނީ ވަރަށް ބޮޑަށް ރައީސް ޔާމީންގެ އަނިޔާވެރިކަން މަރުހަލާއަކަށްފަހު މަރުހަލާއެއް އިތުރުވާތަން. އަދި އަޅުގަނޑުމެންގެ ތެރެއިން އެއްވެސް ބަޔަކު އެކަމަށް ފަސްޖެހޭ މަންޒަރެއް ނުފެނޭ މިހާރު"
ޝިދާތާ ވިދާޅުވީ ކުރީގެ ރައީސް މައުމޫން އަބްދުލް ޤައްޔޫމް ކުރައްވާ ހިތްވަރުފުޅަކީ އެންމެން ބަލައިގަނެ އެކަމަށް ސެލިއުޓްކުރާ ކަމެއް ކަމަށާއި ރައީސް މައުމޫންގެ ބަޔާންތަކުންވެސް ދޭހަވާކަމަކީ އިސްލާހަށް ކުރައްވާ މަސައްކަތް ހުއްޓާ ނުލައްވާކަން ކަމަށެވެ.
ރައްޔިތުންގެ މަޖިލީސް ފެށުމުން މިހާރު މި ހިނގާ ކަންކަމަށް ލުއެއް ލިބޭނެކަން ފާހަގަކުރައްވާ ޝިދާތާ ވިދާޅުވީ އެކަމުގެ ސަބަބުން ދައުލަތުގެ އެހެނިހެން މިނިވަން މުއައްސާތައްވެސް ހަމަ މަގުން ހިންގަން ބާރު ލިބިގެންދާނެކަމަށެވެ. އަދި ރައްޔިތުން އިންތިހާބުކޮށްފައިވާ މަންދޫބުންގެ އަޑު ކަނޑުވަލައިގެން ދައުލަތް ހިންގަން އުޅުމުން އެ ދައުލަތް އިނދަ ޖެހިގެންދާނެ މަންޒަރު ފެނިގެންދާނެ ކަމަށްވެސް ޝިދާތާ ވިދާޅުވިއެވެ.
މިހާރު ގުޅިފައިވާ ޕާޓީތަކުން ހިންގާ ހަރަކާތްތައް ހިންގަނީ ގުޅިފައިވާ ޕާޓީތަކުގެ ލީޑަރުންގެ މަޝްވަރާގެ މަތިންކަމަށް ޝިދާތާ ވިދާޅުވިއެވެ. އަދި ގުޅިފައިވާ ޕާޓީތަކުގެ ހިތްވަރަށް އެއްވެސް ބަދަލެއްނާންނަކަމަށްވެސް އޭނާ ވިދާޅުވިއެވެ. ރާއްޖޭގެ އަދުލުގެ ނިޒާމުގެ ކަންތައްތައް ޤާނޫނުގެ ތެރެއިން ނުހިނގާކަން އެއީ އެންމެ ދަންނަ ހަޤީޤަތެއް ކަމަށްވެސް ޝިދާތާ ވިދާޅުވިއެވެ.
