ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ފަދަ ފިރިއަކަށް ވުމަށް އެމަނިކުފާނުގެ އަނބިކަނބަލުން ފާތުމަތު އިބްރާހިމް ދީދީ ހުރިހާ ފިރިހެނުންނަށް އިލްތިމާސް ކުރައްވައިފިއެވެ.
ހުކުރު ދުވަހުގެރޭ ވެރިކަން ކުރާ ޕީޕީއެމްއިން ފުވައްމުލަކުގައި ބޭއްވި ޖަލްސާއެއްގައި ވާހަކަފުޅު ދައްކަވަމުން ފާތުމަތު އިބްރާހިމް ވިދާޅުވީ، ތިން ކުދިންގެ މައްމައެއްގެ އިތުރުން، މާމައަކަށް ވެސް ވެހުންނަވައި އެކަމަނާއަށް ސިޔާސީ ކަންކަމުގައި ހަރަކާތްތެރި ވެލެއްވެނީ ރައީސް ޔާމީން އެކަމަށް ފުރުސަތު ދެއްވާތީ ކަމަށާއި، ރައީސް ޔާމީންފެ ފަރާތުން ހުރިހާ ފިރިން ވެސް މިސާލު ނަގަންޖެހޭ ކަމަށެވެ.
މި ޖަލްސާގައި އިތުރަށް ވާހަކަފުޅު ދައްކަވަމުން އެކަމަނާ ވަނީ ރައީސް ޔާމީން ރާއްޖެއަށް ގެންނަވަމުން ގެންދަވާ ހަލުވި ތަރައްޤީ ދެމެހެއްޓޭނީ އެމަނިކުފާނަށް ރިޔާސީ އިތުރު ދައުރެއް ދީގެން ކަމަށް ވިދާޅުވެފައެވެ.
އެކަމަނާ ވިދާޅުވީ، ރާއްޖޭގައި އިސްލާމީ އުސޫލުތައް ހިންގައި، ރާއްޖެ ތަރައްޤީ ކުރުމަށް ރައީސް ޔާމީން ބޮޑު އަހައްމިއްޔަތުކަމެއް ދެއްވާ ކަމަށެވެ. އެގޮތުން ރައްޔިތުންނަށް ބޭނުންވާ އަސާސީ ޚިދުމަތްތައް ފޯރުކޮށްދިނުމަށް ރައީސް ޔާމީން އިސްކަމެއް ދެއްވާ ކަމަށް ވެސް އެކަމަނާ ވިދާޅުވިއެވެ.
ކަން މިހެން އޮތްއިރު، ރާއްޖޭގައި ހިންގަމުންދާ ތަރައްޤީގެ އެކި މަޝްރޫޢުތަކަށް ހުއްޓުމެއް އަންނަން އެއްވެސް ރައްޔިތަކު ބޭނުން ނުވާނެ ކަމަށާއި، އެ ތަރައްޤީ ދިފާޢު ކުރުމަށް ހުރިހާ ރައްޔިތުން ނުކުންނަން ޖެހޭ ކަމަށް އެކަމަނާ ވިދާޅުވިއެވެ.
އާންމުކޮށް މިފަދަ ސިޔާސީ ޖަލްސާތަކުގައި ވާހަކަފުޅު ނުދައްކަވާ ފާތުމަތު އިބްރާހިމް މި ޖަލްސާގައި ވާހަކަފުޅު ދައްކަވަމުން ވަނީ ރައީސް ޔާމީން ކޮށްދެއްވަމުން ގެންދަވާ ކަންކަމަށް ޝުކުރު ދަންނަވާފައެވެ.