ސުޕްރީމް ކޯޓުގެ ތެރެއިން ވެރިކަން ވައްޓާލަން އުޅޭކަމަށް އަޑުއިވުމުން އެކަން ނުކުރުމަށް ހަސަން ސައީދާއި ފަނޑިޔާރު ހަމީދަށް އިންޒާރު ދިނިން: އޭސީސީ ލުތުފީ
4 މެއި 2018 | ހުކުރު 04:10ލީކުވެފައިވާ ސިއްރު ބަޔާނަކީ ހަ ސަފްހާގެ ބަޔާނެއް
އޭސީސީގެ ރައީސް ހަސަން ލުތުފީ
ސުޕްރީމް ކޯޓުގެ ތެރެއިން މި ސަރުކާރު ވައްޓާލަން ރޭވުންތަކެއް ރާވަމުންދާކަމުގެ ވާހަކަތައް އަޑުއިވިގެން އެފަދަ އެއްވެސް ކަމެއް ނުކުރުމަށް ޖުޑީޝަލް އެޑްމިނިސްޓްރޭޓަރ ހަސަން ސައީދާއި ފަނޑިޔާރު އަލީ ހަމީދަށް އިންޒާރު ދެއްވި ކަމަށް އެންޓި ކަރަޕްޝަން ކޮމިޝަން(އޭސީސީ)ގެ ރައީސް ހަސަން ލުތުފީ ވިދާޅުވެއްޖެއެވެ.
ސުޕްރީމް ކޯޓުގެ ފަނޑިޔާރުންނާއި އަދި ޖުޑީޝަލް އެޑްމިނިސްޓްރޭޓަރ ހަސަން ސައީދާއި ދެކޮޅަށް ލުތުފީ ދެއްވާފައިވާ ސިއްރު ބަޔާން ލީކު ވެފައިވާއިރު ހަ ސަފްހާގެ ބަޔާނުގައި އޭނާ ވިދާޅުވެފައިވަނީ ވެރިކަން ވެއްޓުމަށް އެއްވެސް މަސައްކަތެއް ނުކުރުމަށާއި ރައީސް ޔާމީނަކީ ކާކުކަން ދަންނަން ޖެހޭނެ ކަމަށް ދެންނެވި ކަމަށެވެ. އޭނާ އާއި ހަސަން ސައީދާއި އަދި ފަނޑިޔާރު އަލީ ހަމީދާއި އެކީގައި ލެމަންގްރާސްއަށް ފުދޭ ވަރަކަށް ގިނައިން ކާންދެވިފައި ހުންނާނެކަމަށާއި އެހެން ނަމަވެސް ސުޕްރީމް ކޯޓުން 1 ފެބްރުއަރީގައި ނެރުނު ހުކުމާއި ގުޅޭ ގޮތުން އެއްވެސް ވާހަކައެއް ހިއްސާ ނުކުރައްވާކަމަށެވެ.
ލުތުފީ ވިދާޅުވެފައި ވަނީ ފެބްރުއަރީ 1 ގައި ސުޕްރީމް ކޯޓުން ނެރުނު އިރު އޭނާ ހުންނެވީ ހުޅުމާލޭ ޝްވެކް ސިނަމާގައި "ޕަދްމަވަތީ" ކިޔާ ހިންދީ ފިލްމެއް ބަލަން ކަމަށާއި އެ އަމުރު ނެރުމާއިއެކު އޭނާ ހަސަން ސައީދާއި އަލީ ހަމީދަށް މެސެޖް ކުރެއްވިކަމަށެވެ. މިއީ ކޮންކަމެއްތޯއާއި އޭނާ ދެއްކެވި ވާހަކަތައް އެއީ ތެދު ވާހަކައެއް ނޫންތޯ އާއި އެވަރަށް މުނާފިގު ވާކަށް ނުވާނެކަމަށް ވިދާޅުވުމަށް ގުޅުއްވަން މަސައްކަތްކުރެއްވި ކަަމަށާއި ނަމަވެސް އެބޭފުޅުން ފޯނު ނުނަންގަވާ ކަމަށް ލުތުފީގެ ބަޔާނުގައިވެ އެވެ. އެކަމާ އޭނާ ކަންބޮޑުވެލެއްވި ކަމަށާއި ސުޕްރީމް ކޯޓްގެ ތެރެއިން ވެރިކަން ބަދަލުކުރުމުގެ ކަންކަމުގައި އޭނާ ވެސް ބައިވެރިވުން އޮވެދާނެ ކަމަށް ބައެއް ފަރާތްތަކުން ގަބޫލުކޮށްފާނެތީ އެވެ.
ފެބްރުއަރީ 1 ވަނަ ދުވަހު ފަނޑިޔާރު އަލީ ހަމީދު ލުތުފީއަށް ގުޅުއްވި ކަމަށާއި މި ސަރުކާރު ގެނައީ އެ ބޭފުޅުން ގެނައި ސަރުކާރެއް ކަމަށާއި ސަރުކާރުގެ ތަރައްގީގެ މަޝްރޫއުތަކުގެ ވާހަކަ ވެސް ދެއްކެވި ކަމަށް ލުތުފީ ވިދާޅުވެފައިވެ އެވެ.
ފެބްރުއަރީ މަހުގެ އެއްވަނަ ދުވަހު ސުޕްރީމް ކޯޓުގެ ފަސް ފަނޑިޔާރުން ސޮއިކުރައްވާ ނެރުއްވި އަމުރު ތަންފީޒު ނުކޮށް އުއްތަމަ ފަނޑިޔާރު އަބްދުﷲ ސައީދާއި، ސުޕްރީމް ކޯޓުގެ ފަނޑިޔާރު އަލީ ހަމީދު މިދިޔަ ފެބްރުއަރީ މަހުގެ ފަސްވަނަ ދުވަހު ހައްޔަރުކުރީ ކުއްލި ނުރައްކަލުގެ ހާލަތު އިއުލާންކޮށް ކުއްލި ނުރައްކަލުގެ ހާލަތުގެ ދަށުންނެވެ. ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ)ގެ ޖުޑީޝަލް އެޑްމިނިސްޓްރޭޓަރު ހަސަން ސައީދު ހައްޔަރުކުރީ ސުޕްރީމް ކޯޓުގެ ފަނޑިޔާރުންނަށް ރިޝްވަތު ދިން ކަމަށް ކުރާ ތުހްމަތު މައްސަލައެއްގައެވެ. ގާނޫނު ހިންގަން ހުރަސްއެޅުމުގެ ދައުވާ އޭނާގެ މައްޗަށް އުފުލާފައި ވަނީ އޭނާ ހައްޔަރު ކުރުމަށް ފުލުހުން މަސައްކަތްކުރި އިރު ފުލުހުންނަށް ފިލައިގެން އުޅުނު ކަމަށް ބުނެއެވެ. އުއްތަމަ ފަނޑިޔާރާއި ފަނޑިޔާރު ހަމީދާއި ޖުޑީޝަލް އެޑްމިނިސްޓްރޭޓަރ ހަސަން ސައީދު ހައްޔަރު ކުރުމުގެ އެއްދުވަސް ކުރިން (ފެބްރުއަރީ މަހުގެ 4 ވަނަ ދުވަހު) ފުލުހުން އާންމުކޮށްފައިވާ ނޫސްބަޔާނެއްގައި ބުނެފައިވަނީ ރާއްޖޭގެ އުއްތަމަ ފަނޑިޔާރު އަބްދުﷲ ސައީދާއި ސުޕްރީމް ކޯޓުގެ ފަނޑިޔާރު އަލީ ހަމީދުގެ އާއިލާގެ ދެ ބޭފުޅުންވެސް ފްލެޓްތައް ބައްލަވައިގަތުމަށްޓަކައި މުއާމަލާތް ކުރެއްވި ކަމުގެ ހެކި ލިބިފައިވާ ކަމަށެވެ. ހަސަން ސައީދުގެ މައްޗަށް ވަނީ ސުޕްރީމް ކޯޓުގެ ފަނޑިޔާރުނަށް ރިޝްވަތު ދިނުމުގެ ތުހުމަތުކޮށް ކިތާބީ ހެކި ހުރި ކަމަށް ވެސް އެބަޔާނުގައި ފާހަގަ ކޮށްފައެވެ.
