ރައީސް ޔާމިން މަޑު މަޑުން އެކަހަރި ކޮށްލާނަން، އަނިޔާއެއް ނުކުރާނަން: ޝިފާޒް
3 މެއި 2018 | ބުރާސްފަތި 19:16ލީކް ވެފައިވާ ބަޔާންތަކާ ގުޅިގެން ގާޒީ ހައްޔަރު ކުރުމަށް ގޮވާލެއްވި
އެމްޑީޕީގެ ނައިބު ރައީސް މުހައްމަދު ޝިފާޒް
ރައީސް އަބްދުﷲ ޔާމިން މަޑު މަޑުން އެކަހަރިކުރާނެ ކަމަށާއި އެހެން ނަމަވެސް އެމަނިކުފާނަށްވެސް އަނިޔާއެއް ނުކުރާނެ ކަމަށް އެމްޑީޕީގެ ނައިބު ރައީސް މުހައްމަދު ޝިފާޒް ވިދާޅުވެއްޖެ އެވެ.
އިދިކޮޅު ފަރާތްތަކުން މ.ކުނޫޒުގައި ބުރާސްފަތި ދުވަހު ބޭއްވި ޖަލްސާގައި ވާހަކަ ދައްކަވަމުން ޝިފާޒް ވިދާޅުވީ ރައީސް ޔާމިން ރީތިކޮށް ވެރިކަން ކުރައްވަން އެއް އަހަރު ފުރުސަތު ދީގެން އެމްޑީޕީން އޮތް ކަމަށެވެ.
"ވައްކަން ކުރަން ފެށީމަ އެކަން އިސްލާހް ނުކުރި. ކޯލިޝަނުގެ ބައިވެރިން ތަކުރާރުކޮށް ވިދާޅުވީމަ ވެސް އެކަން އިސްލާހް ނުކުރި. އަޅުގަނޑުމެން ދެން ނިކުތީ ރައީސް ޔާމިން ސައިޒް ކުރަން. މިހާރު އެ ހުރީ ސައިޒްކޮށްފައި" އޭނާ ވިދާޅުވި އެވެ.
ޔާމިންގެ އަނިޔާވެރިކަމުގެ އާހިރު ނިކުމަކަށް ވާނީ ޔާމިންގެ މައްޗަށް ހިންގަން ޖެހޭ ތަހްގީގު ހިންގައި، އެމަނިކުފާނު ހައްޔަރު ކުރުން ކަމަށެވެ. އަދި އެކެއް ފެބްރުއަރީ ސުޕްރީމް ކޯޓުން ނެރުނު އަމުރާ ގުޅިގެން ފުލުހުން ހިންގި ތަހްގީގުގައި އުއްތަމަ ފަނޑިޔާރު އަބްދުﷲ ސައީދާއި ފަނޑިޔާރު އަލީ ހަމީދާ ދެކޮޅަށް ބަޔާންދެއްވި ކޯޓުގެ ފަނޑިޔާރުންގެ ބަޔާންތައް ލީކްވެފައިވާތީ އެކަމަށް ޝިފާޒް ވަނީ ވަރަށް ބޮޑަށް ފާޑު ވިދާޅުވެފަ އެވެ. އެގޮތުން ހެކި ނައްތާލަފާނެ ތީ ކަމަށްބުނެ ރައީސް މައުމޫނާއި އެހެނިހެން ބޭފުޅުން ހައްޔަރުކޮށްގެން އުޅެނިކޮށް އެ ވިދާޅުވި ހެކިތައް މުޅި ދުނިޔޭގައި ދައުރުވަމުންދާ ކަމަށް އޭނާ ވިދާޅުވި އެވެ. އަދި އެ ބަޔާންތަކަށް ބަލައި ރައީސް ޔާމިނާއި އެ ބަޔާންތައް ދީފައިވާ ގާޒީން ހައްޔަރު ކުރުމަށް އޭނާ ގޮވާލެއްވި އެވެ.
ޝިފާޒް ވިދާޅުވީ އަނިޔާ ލިބެމުންދާ އެންމެންގެ ހައްގުގައި އެ ބޭފުޅުން ނިކުންނަވާނެ ކަމަށާއި މަސައްކަތް ކުރައްވަމުން ގެންދަވަނީ މާޒީގައި ހިނގާފައިވާ ކަންކަމުން މުސްތަގުބަލެއް ބިނާ ކުރުމަށް ކަމަށެވެ. މޭޑޭގެ މުޒާހަރާއާ ގުޅިގެން ޖަލު ހުކުމެއް ތަންފީޒް ކުރައްވަމުން ގެންދަވާ އަދާލަތު ޕާޓީގެ ރައީސް ޝެއިހް އިމްރާން އަބްދުﷲ އާއި އޭނާގެ އާއިލީ މެމްބަރުންގެ ހިތްވަރަށް އޭނާ ވަނީ ސާބަސް ރައްދު ކުރައްވާފަ އެވެ.
މޭޑޭގެ މުޒަހަރާއާ ގުޅިގެން ޖަލަށްލީ ކޮންމެ މީހަކު ޖަލުގައި ހޭދަ ކުރައްވަމުން ގެންދަވަނީ ރައްޔިތުންގެ ހައްގުގައި ކަމަށް ފާހަގަ ކުރައްވައި ޝިފާޒް ވަނީ އެމީހުންގެ ހިތްވަރަށް ވެސް ސާބަސް ދެއްވާފަ އެވެ. ހަމަ އެހެންމެ މޭޑޭ މުޒާހަރާއިން ހައްޔަރުކޮށް ޖަލު ހުކުމެއް ތަންފީޒު ކުރަމުން ދަނިކޮށް މަރުވި އަބްދުﷲ ރަޝީދުގެ މަރަކީ ސަރުކާރުގެ އަނިޔާވެރިކަމުން ހިނގާދިޔަ ކަމެއް ކަމަށް ޝިފާޒް ވިދާޅުވި އެވެ. އަދި އެކަން ފުރިހަމަ ތަހްގީގެއް ހިންގައިފި ނަމަ ޔަގީންވެގެންދާނެ ކަމަށް ޝިފާޒް ވިދާޅުވި އެވެ.
ކުރީގެ ރައީސް މައުމޫނު އަބްދުލް ގައްޔޫމަކީ ކުށްވެރިއެއް ނޫން ކަމަށާއި އެމަނިކުފާނު ޖަލުގައި އޮންނަވަން ޖެހޭނެ ސަބަބެއް ނެތް ކަމަށް ޝިފާޒް ވިދާޅުވި އެވެ.
