ރައީސް ޔާމީންގެ އަނބިކަނބަލުން ފުވައްމުލަކަށް ވަޑައިގެންފި
އަންނަ ހުކުރު ދުވަހުގެ ރޭ ޕީޕީއެމްގެ ޖަލްސާއެއް ބާއްވަނީ
ް ފުވައްމުލަކުން ރައީސް ޔާމީންގެ އަނބިކަނބަލުންނަން މަރުހަބާ ދަންނަވަނި
ރައީސް އަބްދުﷲ ޔާމީންގެ އަނބިކަނބަލުން ފާތިމަތު އިބްރާހިމް ފުވައްމުލަކަށް ވަޑައިގެންފިއެވެ.
މި ދަތުރަކީ ރައީސް ޔާމީންގެ އަނބިކަނބަލުން ފާތިމަތު އިބްރާހިމް ފައްޓަވާފައިވާ އެންމެ ގާތުން ކެމްޕެއިންގެ ދަށުން ފުވައްމުލައް ސިޓީއަށް ކުރެއްވި ދަތުރުފުޅެކެވެ. ބުދަ ދުވަހު ހަވީރު ފާތިމަތު އިބްރާހިމް ފުވައްމުލަކަށް ވަޑައިގަތުމުން ޕީޕީއެމްގެ ބައެއް ސަޕޯޓަރުން ވަނީ އެއަރޕޯޓް ސަރަހައްދުން މަރުޙަބާ ކިޔާފައެވެ.
މި ދަތުރުފުޅުގައި ފާތިމަތު އިބްރާހިމް ހަތަރު ދުވަހު ފުވައްމުލަކުގައި ހޭދަކުރައްވާނެއެވެ. ރައްޔިތުންގެ ހާލު ބެއްލެވުމުގެ ގޮތުން އެ ސިޓީގެ ވަކި ވަކި އަވަށްތަކުގައި ދިރިއުޅޭ ރައްޔިތުންނާއި ބައްދަލު ކުރައްވަން ވަނީ ހަމަޖެހިފައެވެ. އަދި އަންނަ ހުކުރު ދުވަހުގެރޭ ފުވައްމުލަކުގައި ޕީޕީއެމެން ބާއްވާ ޖަލްސާގައި ފާތިމަތު އިބްރާހިމް ބައިވެރިވަޑައިގަންނަވާނެވެ.
ފާތިމަތު އިބްރާހިމް ފުވައްމުލަކަށް ބުދަ ދުވަހު ވަޑައިގެންނެވިއިރު، އަންގާރަ ދުވަހު ރައްޔިތުންގެ މަޖިލީހުގެ ރައީސް އަބްދުﷲ މަސީހާއި، މަޖިލީހުގެ ނައިބް ރައީސް މޫސާ މަނިކާއި، ބައެއް ރައްޔިތުންގެ މަޖިލީހުގެ މެމްބަރުން ވަނީ އެ ސިޓީއަށް ވަޑައިގެންފައެވެ. އެ ބޭފުޅުން އެއްދުވަސް ކުރިން ފުވައްމުލަކަށް ވަޑައިގަތުމަށް ފަހު، ފާތިމަތު އިބްރާހިމްގެ މަރުޙަބާ ކިޔުމުގެ ހަރަކާތްތައް ކުރިއަށް ގެންދިއުމުގެ ކަންކަން ރޭވުމުގައި އުޅުއްވި ކަމަށް ފުވައްމުލަކުގެ ބައެއް ރައްޔިތުން ބުނެއެވެ.
