ރައީސް މައުމޫންގެ ފުރާނަފުޅަށް ނުރައްކާނުވަނީސް ގެއަށް ބަދަލުކޮށްދެއްވާތޯ އާއިލާއިން މަސައްކަތްކުރަނީ
2 މެއި 2018 | ބުދަ 12:16ރައީސް މައުމޫންގެ ސިއްހީ ހާލުކޮޅާއި ގުޅިގެން ގެއަށް ބަދަލުކޮށްދެއްވާތޯ ކަމާއި ގުޅޭ ހުރިހާ އިދާރާތަކަށް ވަނީ ދަންނަވާފައި
ރައީސް މައުމޫން ދޫނިދޫއިން މާލެއަށް ގެންނަނީ: އެމަނިކުފާނުގެ ސިއްހީ ހާލުކޮޅާއި ގުޅޭ ގޮތުން އާއިލާއިން ދަނީ ކަންބޮޑުވުން ފާޅުކުރަމުން
ކުރީގެ ރައީސް މައުމޫން އަބްދުލްޤައްޔޫމްގެ ދޫނިދޫގައި ބަންދުކޮށްފައި ހުންނެވުމުގެ ސަބަބުން އެމަނިކުފާނުގެ ޙާލުކޮޅު ދެރަވަމުންދާތީ، އެމަނިކުފާނު ގޭބަންދަށް ބަދަލުކޮށްދެއްވާތޯ އާއިލާއިން މަސައްކަތްކުރަމުން އެބަގެންދަވައެވެ.
އެގޮތުން ޢުމުރުފުޅާއި ސިއްހީ ހާލުކޮޅަށް ބައްލަވައި، އެމަނިކުފާނުގެ ފުރާނަފުޅަށް ނުރައްކާވެދާނެފަދަ ޙާލަތެއް މެދުވެރިވުމުގެ ފުރުސަތު ކުޑަކުރުމަށްޓަކައި ގެއަށް ބަދަލުކޮށްދެއްވުމަށް މަސައްކަތްކޮށްދެއްވުމަށް ރައީސް މައުމޫން ހިއުމަން ރައިޓްސް ކޮމިޝަން އޮފް ދަ މޯލްޑިވްސްއަށް ވަނީ ސިޓީއަކުން ދަންނަވާފައެވެ. އަދި އެސިޓީފުޅާއި ގުޅޭގޮތުން އެމަނިކުފާނުގެ އަނބިކަނބަލުން މެޑަމް ނަސްރީނާ އިބްރާހީމް ވަނީ އެޕްރީލް މަހުގެ 26 ވަނަ ދުވަހު އެކޮމިޝަނުގެ މެމްބަރުންނާއި އެސިޓީފުޅާއި ގުޅޭ ގޮތުން ބައްދަލު ކުރައްވާފައެވެ. އަދި އެއަށް ފަހު، އެދުވަހު ދެކެވުނު ވާހަކަތަކާއި ގުޅިގެން އެކޮމިޝަނުން އެއްވެސް ފިޔަވަޅެއް އަޅުއްވާފައިވޭތޯ ބެއްލެވުމަށް އެކަމަނާ ވަނީ ބުދަ ދުވަހު އަނެއްކާވެސް ކޮމިޝަނަށް ސިޓީފުޅެއް ފޮނުއްވާފައެވެ.
މީގެ އިތުރުން ރައީސް މައުމޫން ގެއަށް ބަދަލުކޮށްދެއްވާތޯ މޯލްޑިވްސް ޕޮލިސް ސަރވިސްގަޔާއި ކްރިމިނަލް ކޯޓުގައިވެސް އެދިވަޑައިގެންފައިވާކަން އެކަމަނާ ފާހަގަކުރެއްވިއެވެ.
އެހެންނަމަވެސް، މިދިޔަ މަހުގެ 29ވަނަ ދުވަހު ރައީސް މައުމޫންގެ މައްޗަށް ކުރެވޭ ޓެރަރިޒަމްގެ ދައުވާގެ މައްސަލައިގައި ބޭއްވި ޝަރީޢަތުގެ މަޖިލީހުގައި ކްރިމިނަލް ކޯޓުގެ ގާޒީ އަހުމަދު ހައިލަމް ވިދާޅުވީ ރައީސް މައުމޫން ބަންދުގައި ހުންނަވަނީ އެމަނިކުފާނުގެ ސިއްހީ ހާލުކޮޅަށް ރިއާޔަތް ކުރެއްވުމަށް ފަހު ޚާއްސަ އުސޫލަކުން ކަމަށާއި، އެމަނިކުފާނު ގޭ ބަންދަށް ބަދަލުކޮށް ނުދެވޭނެ ކަމަށެވެ.
ރައީސް މައުމޫން އެދުވަހުގެ ޝަރީޢަތުގެ މަޖިލީހުގައި ވިދާޅުވީ ބަންދުގައި ހުންނަވާތާ އެތައް ދުވަހެއް ވެފައިވާކަމަށާއި، އެމަނިކުފާނުގެ އުމުރުފުޅާއި ސިއްހީ ހާލަތު ހުރިގޮތުން ބަންދުގައި އެކަނި އޮންނެވުމަކީ ސިއްހީ ނުރައްކަލެއް ކުރިމަތިވެދާނެ ކަމެއް ކަމަށެވެ. ރައީސް މައުމޫންގެ ފަރާތްޕުޅުން އެމަނިކުފާނުގެ ސިއްހީ ހާލުކޮޅާއި ގުޅޭ ލިޔެކިޔުންތައްވެސް ވަނީ ކަމާއި ބެހޭ ފަރާތްތަކަށް ހުށަހަޅާފައެވެ.
ރައީސް މައުމޫންގެ ސިއްޙީ ހާލުކޮޅު ދެރަވަމުންދާތީ އެމަނިކުފާނު ގެއަށް ބަދަލުކޮށްދެއްވާތޯ އާއިލާއިން މަސައްކަތްކުރަމުންދާއިރު، މިވަގުތު ޖަލުގައި ތިއްބެވި ފަރާތްތައް ގޭ ބަންދަށް ބަދަލުކުރުމަކީ ފަނޑިޔާރަށް ކުރެއްވޭނެ ކަމެއް ނޫން ކަމަށާއި، އެ ފަރާތްތައް ޖަލުގައި ތިއްބެވީ ހެއްކަށް ނުފޫޒް ފޯރުވަތީކަމަށް ރައީސް މައުމޫންގެ އެއްބަފާ ކޮއްކޯފުޅު ރައީސް އަބްދުﷲ ޔާމީން އަންގާރަ ދުވަހުގެ ރޭ ވަނީ ވިދާޅުވެފައެވެ.
