ލީކުވި ބަޔާން: ރައީސް ބޭނުންފުޅުވާ ގޮތަށް މައްސަލަތައް ނިންމުމަށް އަލީ ހަމީދު އިރުޝާދުދެއްވި!
ދައުލަތުގެ މަސްލަހަތު ހިމެނޭތީ ސިވިލް ކޯޓަށް ހުށައެޅޭ މައްސަލަތައް ވަކި ގޮތަކަށް ނެރުމަށް ސުޕްރީމް ކޯޓް ފަނޑިޔާރުން ލަފާދެއްވާ
ސިވިލް ކޯޓްގެ ގާޒީ މުހައްމަދު ހަލީމް
އުއްތަމަ ފަނޑިޔާރާއި ފަނޑިޔާރު އަލީ ހަމީދު ގުޅުއްވާ ކޯޓްތަކުގައި ހުރި ދައުލަތާއި،އެފަރާތްތަކުގެ މަސްލަހަތު ހިމެނޭ މައްސަލަތައް ރައީސް އަބުދުﷲ ޔާމީން ބޭނުންފުޅުވާގޮތަށް ނިންމެވުމަށް އިރުޝާދު ދެއްވާކަމަށް މޯލްޑިވްސް ޕޮލިސް ސާވިސްއަށް ސިވިލް ކޯޓްގެ ގާޒީ މުހައްމަދު ހަލީމް ދީފައިވާ ބަޔަނުގައި ވިދާޅުވެއްޖެއެވެ.
މި ބަޔާނުގައި ގާޒީ ހަލީމް ވިދާޅުވެފައިވާ ގޮތުގައި، އެގޮތަށް އެބޭފުޅުން ވިދާޅުވުމުން ބޭނުންވާގޮތަށް ހުކުމްތައް ކޮށްފައިވާނެކަމަށް ވިދާޅުވެފައި ވެއެވެ.
އެގޮތުން ސިވިލް ކޯޓަށް ހުށައެޅުނު ޕްރޮގްރެސިވް ޕާޓީ އޮފް މޯލްޑިވްސް ޕީޕީއެމް ރައީސް މައުމޫނާއި ހަވާލުކުރުމަށް ހުށައެޅުނު މައްސަލައާއި، ހަވީރު ނޫހުގެ މައްސަލައާއި، ގާސިމް އިބްރާހިމްގެ ވިލާ ކުންފުންޏަށް ދީފައިވާ ކާޑެއްދޫ އެއާޕޯޓް ނެގުމަށް ޓޫރިޒަމް މިނިސްޓްރީން އެންގި މައްސަލައަށް އަމުރުކުރުން ފަސްކޮށްދިނުމަށް ހުށައެޅި މައްސަލަ ދައުލަތުގެ މަސްލަހަތު ހިމެނޭތީ ދައުލަތުން ބޭނުންވާ ގޮތަށް ނިންމުމަށް ސުޕްރީމް ކޯޓްގެ ފަނޑިޔާރުން ލަފާދެއްވާފައިވާކަމަށް ވިދާޅުވެފައިވެއެވެ.
"2016 ޖުލައި މަސްތެރޭގައި (ތާރީޚް ހަނަދާނެއް ނެތް) ސިވިލް ކޯޓަށް ހުށައެޅުނު ޕްރޮގްރެސިވް ޕާޓީ އޮފް މޯލްޑިވްސްގެ ހިންގުމާއި ގުޅޭ މައްސަލައެއްގެ ޝަރީއަތް އަޅުގަނޑު ކުރިން. އެ މައްސަލަ އަޅުގަނޑު ބަލާ ހުކުމް ކުރި ފަހުން އަޅުގަނޑަށް ސީދާ ފަނޑިޔާރު އަލީ ހަމީދު މުހައްމަދާއި އުއްތަމަ ފަނޑިޔާރު އަބުދުﷲ ސައީދު މައްސލަތަކުގައި ގުޅުއްވާ އިރުޝާދު ދޭންފެށި. އަދި އެދުވަހުން ފެށިގެން ފަނޑިޔާރު އަލީ ހަމީދު މުހައްމަދާއި އުއްތަމަ ފަނޑިޔާރު އަބުދުﷲ ސައީދުގެ ދައުލަތް ހިމެނޭ އެބޭފުޅުންގެ މަސްލަހަތު ހިމެނޭ މައްސަލައެއް އަޅުގަނޑުގެ ސެކްޝަނަށް ހުށައެޅިއްޖެނަމަ ފަނޑިޔާރު އަލީ ހަމީދު މުހައްމަދު ގުޅުއްވާ ރައީސް ވަރަށް ބޮޑަށް ބޭނުންވެޔޭ މައްސަލަ ހުށައަޅުއްވާފައިވާ ފަރާތުގެ މަސްލަހަތު ހިމާޔަތްވާގޮތަށް މައްސަލަަތައް ނިންމުމަށް ވިދާޅުވުމުން އަޅުގަނޑުމެން އުސޫލް ތަކުގެ ތެރެއިން އެގޮތަށް ހަމަޖައްސަމެވެ" ގާޒި ހަލީމް ދީފައިވާ މި ބަޔާނުގައިވެއެވެ.
Caption
ފެބްރުއަރީ 1 ވަނަ ދުވަހު ސުޕްރީމް ކޯޓުން ނެރުނު އަމުރާ ގުޅިގެން ހައްޔަރުކޮށްފައިވާ ފަރާތްތަކުގެ މައްސަލަ ތަހުގީގުކުރި އިރު އެކި ފަރާތްތަކުން ފުލުހުންނަށް ދީފައިވާ ބަޔާންތައް ސޯޝަލް މީޑިއާގައި ދައުރުވާން ފެށީ އަންގާރަ ދުވަހުއެވެ. އެއީ ސައްޙަ ބަޔާންތަަކެއްތޯ ރައްޔިތުން ސުވާލެއްގެ ތެރޭގައި ތިއްބާ ފުލުހުން ބުދަދުވަހު ބޭއްވި ނޫސްވެރިންގެ ބައްދަލުވުމުގައި އެ ބަޔާންތަކަކީ ސައްޙަ ބަޔާންތަކެއް ކަމަށާއި ބަޔާންތައް ލީކުވި މައްސަލަ ސީރިއަސް މައްސަލައެއްގެ ގޮތުގައި ބަލައި އެކަން ކުރި ބަޔަކު ހޯދައި ފިޔަވަޅު އަޅާނެކަމަށް ވަނީ ބުނެފައެވެ.
ލީކުކޮށްލި ބަޔާންތަކުގެ ތެރޭގައި، ފެބުރުއަރީ 1 ގައި ސުޕްރީމް ކޯޓުން އަމުރު ނެރުމުގައި އުއްތަމަ ފަނޑިޔާރު އަބްދުﷲ ސައީދާއި ފަނޑިޔާރު އަލީ ހަމީދު އަމަލު ކުރެއްވި ގޮތާއި ބައެއް ގާޒީންނަށް އެ ދެ ބޭފުޅުން ނުފޫޒު ފޯރުވި ކަމަށް ހެކިބަސް ދީފައިވާ ބަޔާންތައް ހިމެނެ އެވެ. އަދި، އަމުރާ ގުޅިގެން ކުރީގެ ޕޮލިސް ކޮމިޝަނަރު، އަހްމަދު އަރީފް އަމަލު ކުރެއްވި ގޮތާ ގުޅޭ ގޮތުން ފުލުހުންގެ އިސް ވެރިން ދެއްވި ކަމަށް ބުނާ ބަޔާންތަކެއް ވެސް ހިމެނެ އެވެ.
Caption
މި ބަޔާންތައް އާއްމުވެފައި މިވަނީ، މައްސަަލަ ބޮޑުވި ސުޕްރީމް ކޯޓުގެ އަމުރަށް ފަހު، ކުއްލި ނުރައްކަލުގެ ހާލަތު އިއުލާންކޮށް، އުއްތަމަ ފަނޑިޔާރާއި ފަނޑިޔާރު އަލީ ހަމީދުގެ އިތުރުން ކުރީގެ ރައީސް މައުމޫން އަބްދުލްގައްޔޫމާއި ރައްޔިތުންގެ މަޖިލީހުގެ ބައެއް މެމްބަރުން ހައްޔަރުކޮށްފައި ވަނިކޮށެވެ. ސަރުކާރު ވައްޓާލަން އުޅުނު ކަމުގެ ތުހުމަތުގައި ހައްޔަރުކޮށްފައިވާ، އެ ބޭފުޅުންގެ މައްޗަށް ޓެރަރިޒަމްގެ ދައުވާ އުފުލައި، ޝަރީއަތް ވެސް މިހާރު ވަނީ ފަށައިފަ އެވެ.
