ފަލަސްތީނުގެ ޤައުމީ ކައުންސިލުން 22 އަހަރަށް ފަހު ބައްދަލުކޮށްފި

ފަލަސްތީނުގެ މިނިވަން ކަމަށް މަސައްކަތް ކުރާ ޖަމާޢަތްތަކުގެ ބެލެނިވެރި ޖަމްއިއްޔާ ކަމަށްވާ ޕީއެލްއޯގެ ޤާނޫނު ހަދާ ބާރު ކަމަށްވާ ފަލަސްތީނުގެ ޤައުމީ ކައުންސިލުގެ ބައްދަލުވުމެއް 22 އަހަރަށް ފަހު ބާއްވައިފިއެވެ.

ހޯމަ ދުވަހުން ފެށިގެން 3 ދުވަހުގެ މުއްދަތަކަށް ފަަލަސްތީނުގެ ވެރިރަށް ރާމަﷲގައި ކުރިއަށް ދިޔަ މި ބައްދަލުވުމުގައި ފަލަސްތީނުގެ މިނިވަން ކަމަށް މަސައްކަތް ކުރާ ގިނަ ޖަމާޢަތްތަކަކުން ބައިވެރިވިއެވެ. އެހެން ނަމަވެސް ބައެއް ޖަމާޢަތްތަކުން ބައްދަލުވުން ބޮއިކޮޓް ކޮށްފައިވެއެވެ. މި ބައްދަލުވުން ބޮއިކޮޓް ކުރި ޖަމާޢަތްތަކުގެ ތެރޭގައި ޙަމާސް، އިސްލާމިކް ޖިހާދު، ޕޮޕިއުލަރ ފްރަންޓް ފޮރ ދަ ލިބަރޭޝަން އޮފް ޕަލަސްޓައިން ހިމެނެއެވެ. މިއީ ފަލަސްތީނުގެ މިނިވަން ކަމަށް ކުރާ ޖިހާދުގެ މުހިއްމު ބައިވެރިންނެވެ. ޖުމްލަ 145 ބައިވެރިން މި ބައްދަލުވުން ބޮއިކޮޓް ކޮށްފައިވެއެވެ. ނޭޝަނަލް ކައުންސިލްގެ މެމްބަރުންގެ އަދަދަކީ ގާތްގަނޑަކަށް 700އެވެ. ޙަމާސް އާއި އިސްލާމިކް ޖިހާދަކީ ޕީއެލްއޯގެ މެމްބަރުން ނޫން ކަމުގައި ވިޔަސް، އެޖަމާޢަތުގެ އޮބްޒާވަރުންނެވެ.

ހުޅަނގު އައްސޭރީގައި މި ބައްދަލުވުން ކުރިއަށްދާއިރު، ޣައްޒާގައި ތިބި ފަލަސްތީނުގެ ރައްޔިތުން ތިބީ މިސްރާއީ އިސްރާއީލުން ޣައްޒާއަށް ވަދެވޭ ސަރަހައްދީ ރޮނގު ބަންދުކޮށްފައި ވާތީއާއި، ފަލަސްތީނުގެ ފެކްޝަންތަކުގެ މެދުގައި ހިނގަމުންދާ ހަމަނުޖެހުންތަކުގެ ސަބަބުން ހިތްހަމަނުޖެހިފައެވެ.

ކައުންސިލްގެ ބައްދަލުވުން ހުޅުވުމުގެ ރަސްމިއްޔާތުގައި ފަލަސްތީނުގެ ރައީސް މަޙްމޫދު ޢައްބާސް ދެގަޑިއެއްހާ އިރު ވާހަކަ ދެއްކެވިއެވެ. އެހެން ނަމަވެސް އެމަނިކުފާނުގެ ވާހަކަފުޅުގައި ސިޔާސަތުތަކާއި މައްސަލަތައް ހައްލުކުރެވޭނެ ގޮތަށްވުރެ ބޮޑަށް އަލިއަޅުއްވާލެއްވީ ތާރީޚަށެވެ.

މި ބައްދަލުވުމުގައި އިރުމަތީ ޤުދުސްގެ މައްސަލައާއި، އެމެރިކާއިން އިސްރާއީލުގެ ވެރިރަށަކީ ޤުދުސްކަމަށް ބަލައިގަތުމާއި ގުޅިގެން އެކަންކަމާއި ބެހޭ ގޮތުން މަޝްވަރާކުރާނެއެވެ. ނޭޝަނަލް ކައުންސިލްގެ ބައްދަލުވުމެއް 1996ވަނަ އަހަރުގެ ފަހުން ބާއްވާފައިނުވާއިރު، ތެލްއަވީވުގައި ހުންނަ އެމެރިކާގެ އެމްބަސީ ޤުދުސްއަށް ބަދަލުކުރުމަށް މަސައްކަތްކުރުމަށް އެމެރިކާގެ ވަފުދެއް މިމަހުގެ 14 ވަނަ އިސްރާއީލަށް ދާނެއެވެ.