އެފްރިކާގެ ގައުމުތަކަށް ޓަރަމްޕް ވިދާޅުވި ބަދު ބަސްތަކަށް ނައިޖީރިއާގެ ރައީސް ބުހާރީ އެއްޗެއް ވިދާޅެއް ނުވި، ޓްރަމްޕް އެވާހަކަތައް ދޮގެއް ނުކުރައްވާ

އެމެރިކާގެ ރައީސް ޑޮނަލްޑް ޓްރަމްޕް ވެރިކަމަށް ވަޑައިގެންނެވިތާ އަހަރަކަށް ވުރެ ގިނަ ދުވަސް ވެފައިވާ އިރު، އެ މަނިކުފާނުގެ ދައުރުގައި އެންމެ ފުރަތަމަ ވައިޓް ހައުސްއަށް ޒިޔާރަތް ކުރެއްވި އެފްރިކާގެ ގައުމެއްގެ ލީޑަރަކީ ނައިޖީރިއާގެ މުހައްމަދު ބުހާރީއެވެ.

ބުހާރީ އަބޫޖާއިން ވޮޝިންގޓަންއަށް ދަތުރުކުރައްވާފައިވަނީ ހޮނިހިރު ދުވަހެވެ. އަދި މި ދަތުރުގެ ބޭނުމަކީ ދެ ގައުމުގެ ގުޅުން ބަދަހި ކުރުންކަމަށް ރިޕޯޓް ތަކުގައި ފާހަގަކޮށްފައިވެއެވެ.

ވައިޓް ހައުސްގައި ކުރިއަށް ދިޔަ ބައްދަލުވުމަށް ފަހު، ދެ ލީޑަރުންވަނީ ނޫސްވެރިންނާ ބައްދަލު ކުރައްވާފައެވެ. އެގޮތުން ޓެރަރިޒަމްއާ ދެކޮޅަށް ކުރާ ހަނގުރާމައަކީ ދެ ގައުމަށްވެސް މުހިއްމު ހަނގުރާމައެއްކަމަށް ޓްރަމްޕާއި ބުހާރީ ފާހަގަ ކުރެއްވިއެވެ.

މީގެ އިތުރުން، ނައިޖީރިއާއިން އަޅާފައިވާ އިގްތިސާދީ ހުރަސްތައް ނައްތާލާނެކަމަށް އުއްމީދު ކުރައްވާކަމަށް ޓްރަމްޕް ވިދާޅުވިއެވެ. އެ މަނިކުފާނުގެ ވާހަކަފުޅުން ދޭހަވާ ގޮތުގައި، އެއީ އެމެރިކާއިން ނައިޖީރިއާއަށް ބޭރުގެ އެހީގެ ގޮތުގައި ކޮންމެ އަހަރަކު ދޭ އެއް ބިލިއަން ޑޮލަރުގެ ބަދަލުގައި ކޮށްދޭން ޖެހޭ ކަމެކެވެ. އަދި އިގްތިސާދީ ގޮތުން 'ޕްލެޔިންގ ފީލްޑް' އެއްވަރު ކޮށްފިނަމަ އެމެރިކާއިން ނައިޖީރިއާގައި އިތުރަށް އިންވެސްޓް ކުރާނެކަމަށްވެސް ޓްރަމްޕް ވިދާޅުވިއެވެ.

ހޯމަ ދުވަހު އޮތް ނޫސްވެރިންގެ ބައްދަލުވުމުގައި ރިޕޯޓްރަކު ވަނީ އެފްރިކާގެ ގައުމުތަކާ ގުޅިގެން ޓްރަމްޕް ވިދާޅުވި ބަދު ބަސްތަކަށް އިޝާރާތް ކުރައްވާ ސުވާލު ކުރައްވާފައެވެ.

އެކަމާ ގުޅޭގޮތުން ވާހަކަ ދައްކާފައި ނުވާކަން ޓްރަމްޕް ފާހަގަ ކުރެއްވި އިރު، ބުހާރު ވިދާޅުވީ 'ތިކަމުގެ ހަގީގަތެއް އަޅުގަނޑަކަށް ނޭނގޭ، އެހެންވެ އެކަމަށް ބަހެއް ނުބުނުން އެންމެ ރަނގަޅުވާނީ" މިހެންނެވެ.

ޓްރަމްޕްގެ ޖަވާބުގައި އެފަދައިން ވިދާޅުވެފައިވާކަމަށް އިންކާރު ކުރައްވާފައެއް ނުވެއެވެ. އޭގެ ބަދަލުގައި އެ މަނިކުފާނު ވިދާޅުވީ، އެފްރިކާގައި "ވަރަށް ހާލު ދެރަ، ދިރިއުޅެން ވަރަށް އުނދަގޫ" ގައުމުތައް ހުރި ކަމަށެވެ.