ލ. ގަމުގައި މައުމޫނުގެ ސަޕޯޓަރުން ރައީސް ޔާމީނާ ދެކޮޅަށް ތެދުވުމުން މާފަތިން މަރުހަބާ ކިޔާއިފި
28 އެޕްރީލު 2018 | ހޮނިހިރު 07:08ލ. އަތޮޅުގައި ރައީސް މައުމޫނަން ތާއިދު ކުރާ ގިނަ ރައްޔިތުން ދިރިއުޅޭ
ރައީސް މައުމޫންގެ ސަޕޯޓަރުން ކަރުގައި މާފަތި އަޅުވައިފި
ރައީސް އަބްދުﷲ ޔާމީންގެ ސަރުކާރަށް ނޫނެކޭ ބުނުމުގެ ގޮތުން ކުރިއަށް ގެންދާ ހަރަކާތަށް ތާއިދުކޮށް ލ. ގަމުގައި ދިރިއުޅޭ ރައީސް މައުމޫންގެ ސަޕޯޓަރުން ފާޅުގައި، ގުޅިފައިވާ ސިޔާސީ ޕާޓީތަކުގެ ހަރަކާތާ ގުޅިއްޖެއެވެ.
ހުކުރު ދުވަހުގެ ރޭ ތުނޑީ އަވަށު ބަނދަރު ސަރަހައްދުގައި ރައީސް މައުމޫންގެ ސަޕޯޓަރުން އިސްނަގައިގެން ވަނީ ހާއްސަ ހަރަކާތެއް ބާއްވާފައެވެ. އެގޮތުން 2013 ވަނަ އަހަރު ރައީސް ޔާމީން ވެރިކަމަށް ގެނެއުމަށްޓަކައި ގަމުގައި މަސައްކަތްކޮށް އެމަނިކުފާނަން ވޯޓު ދިން ގިނަ ބަޔަކު ފާޅުގައި ރައީސް ޔާމީންގެ ސަރުކާރާ ދެކޮޅަށް ނުކުތުމުން ގުޅިފައިވާ ސިޔާސީ ޕާޓީތަކަށް ތާއިދު ކުރާ ރައްޔިތުން ވަނީ އެމީހުންގެ ކަރުގައި މާފަތި އަޅުވައި މަރުޙަބާ ކިޔާފައެވެ.
ގިނަ އަދަދެއްގެ އާންމު ރައްޔިތުން ބައިވެރި މި ހަރަކާތް ކުރިއަށް ގެންގޮސްފައިވާ ހާއްސަ ކެއުމަކާ އެކުގައެވެ.
ރައީސް މައުމޫންގެ ސަޕޯޓަރުންނަން މަރޫޙަބާ ދަންނަވަނީ
ރައީސް މައުމޫނަން ދާއިތުކުރާ ސަޕޯޓަރުން ބުނާ ގޮތުން އެމީހުން 2013 ވަނަ އަހަރުގެ ރިޔާސީ އިންތިހާބުގައި ރައީސް ޔާމީންނަން ވޯޓު ދިނީ ރައީސް މައުމޫން އެދިވަޑައިގަތުމުން ކަމަށެވެ. އެހެންނަމަވެސް ރައީސް ޔާމީންގެ ސަރުކާރުން ރައީސް މައުމޫން ހައްޔަރުކުރުމަކީ ގަބޫލުކުރެވޭނެ ކަމެއް ނޫން ކަމަށާއި، ރައީސް މައުމޫން ފައްޓަވާފައިވާ އިސްލާހީ ހަރަކާތުގައި ކުރިއަށް އޮތް ދުވަސްތަކުގައި ފާޅުގައި ބައިވެރިވާނެ ކަމަށް ވެސް އެމީހުން ބުންނެއެވެ.
"2013 ގައި ވެރިކަމަށް އައުމަށް ރައީސް ޔާމީން ވީ ވައުދުތައް ނުފުއްދައި، ޤައުމުގެ އަދުލް އިންސާފު ނަގާލައި، ކޯޓް އަމުރަށް ތަބާނުވެ، ރައީސް މައުމޫނު ޖަލަށްލައިގެން ހިންގާ އަނިޔާވެރި ވެރިކަމަށް ތާޢިދުކޮށް އިތުރަށް ރައީސް ޔާމީނަށް ތާޢީދުކޮށްގެން ތިބެން ބޭނުމެއް ނޫން" ރާއްޖެއެމްވީއަށް މައުލޫމާތު ދިން މައުމޫންގެ ސަޕޯޓަރަކު ބުންޏެއެވެ.
ލ. އަތޮޅަކީ ރައީސް މައުމޫނަން ތާއިދުކުރާ ގިނަ އަދަދެއްގެ ރައްޔިތުން ދިރިއުޅޭ އަތޮޅެކެއެވެ. އެގޮތުން ރައީސް މައުމޫން ޑީއާރުޕީ ހިންގެވި އިރު، ދޮންކެޔޮ ރީނދު ކުލައަށް ހުންނާތީ، އެ އަތޮޅުގެ ބައެއް ރައްޔިތުން ވަނީ ދޮންކޭލުގައި ނޫކުލަ ވެސް ޖައްސާފައެވެ.
