ގްރޭޓް މާޗް އޮފް ރިޓަރން: މި ހަފްތާގެ މުޒާހަރާގައި ފަލަސްތީނުގެ ތިން މީހުން މަރާލައިފި

ސަރަހައްދީ ރޮނގުގައި ކުރިޔަށްދާ އިހުތިޖާޖުގައި އިސްރާއީލްގެ ސިފައިން ފަލަސްތީނުގެ ތިން މީހެެއްގެ ގަޔަށް ބަޑިޖަހައި މަރާލައިފި ކަމަށް ޣައްޒާގެ ހެލްތު މިނިސްޓްރީ އިން ބުނެފިއެވެ.

މިނިސްޓްރީ އިން ބުނީ ވަޒަން އަރައި ޒަޚަމްވެގެންނާއި ކަރުނަގޭހުގެ އަސަރުކޮށްގެން އިތުރު 300 އަށް ވުރެ ގިނަ މީހުން ހޮސްޕިޓަލުގައި އެޑްމިޓްކުރެވުނު ކަމަށެވެ.

އިސްރާއީލުގެ އަސްކަރިއްޔާ އިން ބުނީ ފަލަސްތީނުގެ 10،000 އަށް ވުރެ ގިނަ މީހުން ގެންދިޔައީ ރަޔަޓްކުރަމުން ކަމަށާއި ކަނޑައެޅިފައިވާ އުސޫލުތަކާ އެއްގޮތަށް އިސްރާއީލުގެ ސިފައިން އެމީހުންނަށް އަމާޒުކޮށް ބަޑިޖަހާފައިވާނެ ކަމަށެވެ.

މިއީ ހުއްޓުމެއް ނެތި މުޒާހަރާ ކުރަމުންދާތާ 5 ވަނަ ހަފްތާއެވެ.

ފަލަސްތީނުގެ ރައްޔިތުން ގޮވާލަމުންދަނީ އިސްރާއީލުގައި މިހާރު ތިބި ފަލަސްތީނުގެ ރެފިއުޖީން އެމީހުންގެ އަމިއްލަ ބިމަށް އައުމުގެ ފުރުސަތު ދިނުމަށެވެ.

މުޒާހަރާތަކަކީ ޣައްޒާގެ ކޮންޓްރޯލް އޮންނަ ހަމާސް ޖަމާއަތުން އިސްރާއީލަށް ހަމަލާދިނުމަށް ބޭނުންކުރާ ބަަހަނާއެއް ކަަމަށް އިސްރާއީލުން ދަނީ ތުހުމަތުކުރަމުންނެވެ.

މި މުޒާހަރާތަކީ ވަކި ފަރާތެއްގެ ނުފޫޒެއް ނެތި ހިނގާ މިނިވަން މުޒާހަރާތަކެއް ކަމަށް ބުނެވުނު ނަމަވެސް ހަމާސް އިން މުޒާހަރާތަކަށް ތާއީދުކުރެއެވެ.

ވޭތުވެދިޔަ ފަސް ހުކުރުގައި ވެސް މުޒާހަރާގެ ބައިވެރިން ވަނީ ސަރަހައްދީ ރޮނގުގެ ފެންސްގެ ކައިރިން އެމީހުން ކަނޑައަޅާފައިވާ ފަސް ސަރަހައްދަކަށް ޖަމާވެފައެވެ. އެންމެ ބޮޑު އެއްވުމެއް ބާއްވާފައި ވަނީ ޚާން ޔޫނިސްގައި ކަމަށްވާ އިރު މުޒާހާރާގެ ބައިވެރިންގެ ތެރެއިން ކުޑަ ގްރޫޕަކުން ވަނީ ސަރަހައްދީ ރޮނގުގައި ޖަހާފައިވާ ފެންސުގެ ނަރުތައް ކަނޑާލާއި އިސްރާއީލުގެ ތެރެއަށް ވަދެފައެވެ.

މާޗް މަހުގެ 30 ވަނަ ދުވަހު މި މުޒާހަރާތައް ފެށުނު ފަހުން އިސްރާއީލް ސިފައިން ވަނީ ފަލަސްތީނުގެ 40 މީހުން މަރާލާފައެވެ. އަދި 5،000 އަށް ވުރެ ގިނަ މީހުން ވަނީ ޒަޚަމްކޮށްލާފައެވެ.