ވައިޓްހައުސްގެ ޗީފް އޮފް ސްޓާފްގެ ފޯން ހެކްކޮށްފި

ވައިޓް ހައުސްގެ ޗީފް އޮފް ސްޓާފްގެ ފޯން ހެކް ކޮއްފިއެވެ.

މިކަން ފަޅާއަރާފައިވަނީ ވައިޓް ހައުސްގެ ޗީފް އޮފް ސްޓާފް ޖޯން ކެލީގެ ފޯނަށް ގިނަ މައްސަލަތަކެއް ދިމާވާން ފެށުމުން ވައިޓް ހައުސްގެ ޓެކްނިކަލް ސްޓާފަކަށް އޭނާ އެކަން އެންގެވި ހިސާބުންނެވެ.

ޕޮލިޓިކޯގައި ޝާއިއުކޮށްފައިވާ ރިޕޯޓެއްގައި ވާގޮތުގައި ވައިޓްހައުސްގެ ޓެކްނިލަކް ޓީމުން ގަބޫލުކުރާ ގޮތުގައި ފޯނު ހެކް ކޮށްފައިވަނީ މިދިޔަ އަހަރުގެ ޑިސެމްބަރު މަހުގެ ތެރޭގައެވެ. ހެކް ކޮށްފައިވާ ފޯނަކީ ކެލީގެ އަމިއްލަ ކަންކަމުގައި އެބޭފުޅާ ބޭނުންކުރައްވާ ޕާސަނަލް ފޯނެވެ.

ވައިޓްހައުސްގެ ސްޕޯކްސްޕާސަން މީޑިއާއަށް މައުލޫމާތު ދީފައިވާ ގޮތުގައި، ކެލީ އާންމުގޮތެއްގައި ބޭނުންކުރައްވަނީ ވައިޓްހައުސްއިން ސްޓާފުންނަށް ދީފައިވާ ހާއްސަ ފޯނެވެ. ނަމަވެސް ކެލީ ކޮންމެވެސް ވަރަކަށް އެބޭފުޅާގެ ޕާސަނަލް ފޯނު ވެސް ބޭނުން ކުރައްވައެވެ.

ކެލީގެ ފޯނު ހެކް ކުރިކަން ހާމަވުމާއި ގުޅިގެން އެބޭފުޅާ މިހާރު ބޭނުންކުރައްވަނީ އައު ޕާސަނަލް ފޯނެއް ކަމަށް ސްޕޯކްސްޕާސަން ވިދާޅުވިއެވެ.

ފޯން ހެކްވެފައިވާކަން އެނގުނު ނަމަވެސް، ފޯނުން ލީކްވެފައިވާ މައުލޫމާތެއް، ނުވަތަ މައުލޫމާތެއް ލީކްވިކަންވެސް ސާފުވާގޮތް އަދި ވަނީ ނުވެފައެވެ. ޖޯން ކެލީގެ ފޯނު ހެކްކުރި މައްސަލަ ފެންމަތިވެފައިވާއިރު މި ފަހަކަށް އައިސް ވައިޓްހައުސްގެ ރަސްމީ ބޭނުންތަކަށް އިވަންކާ ޓްރަމްޕް ފަދަ ބޭފުޅުންގެ އަމިއްލަ އީމެއިލް އެޑްރެސް ބޭނުންކުރައްވާ މައްސަލަ ފަދަ މަައްސަލަތައް ވަނީ ދިމާވެފައެވެ.