މި ސީޒަނަށް ފަހު އާސެނަލްގެ ކޯޗުގެ މަގާމު ދޫކޮށްލާނެ ކަމަށް އިއުލާނުކުރީ ޓީމުގެ މެނޭޖްމަންޓާއި މަޝްވަރާ ކުރުމަށް ފަހު މެނޭޖްމަންޓުން އެގޮތަށް އެދުމުން ކަމަށް އާސެން ވެންގާ ބުނެފިއެވެ.
އާސެނަލްގެ ކޯޗުގެ މަގާމު ދޫކޮށްލާނެކަން ވެންގާ އިއުލާނު ކޮށްފައިވާއިރު އެ ޓީމު މިވަގުތު އޮތީ ޕްރިމިއާ ލީގުގެ ހަވަނައިގައެވެ. އަންނަ ސީޒަނުގެ ޗެމްޕިއަންސް ލީގުން އެ ޓީމަށް ޖާގަ ހޯދެން އޮތް ހަމައެކަނި ގޮތަކީ މި ސީޒަނުގެ ޔުއެފާ ޔުރޮޕާ ލީގު ކާމިޔާބު ކުރުމެވެ.

ނޫސްވެރިންގެ ބައްދަލުވުމެއްގައި ވާހަކަ ދައްކަމުން ވެންގާ ބުނީ އޭނާ އަބަދުވެސް މަސައްކަތް ކުރަނީ ކުރިޔަށް އޮންނަ މެޗަށް ޓީމު ތައްޔާރުކުރަން ކަމަށާއި ޓީމު ދޫކޮށްލާނެކަން އިއުލާނުކުރި ނަމަވެސް މަސައްކަތަށް އެއްވެސް ބަދަލެއް އައިސްފައިނުވާ ކަމަށެވެ. އޭނާ ބުނީ މުސްތަގުބަލުގައި ވެސް ކޯޗިންގް ދާއިރާއިން ފެންނާނެ ކަމަށާއި އެހެން ނަމަވެސް މިވަގުތު އެފަދަ އެއްވެސް ކަމަކާ މެދު ވިސްނަން ބޭނުންނުވާ ކަމަށެވެ.

ވެންގާ ބުނީ އާސެނަލްގެ ކޯޗުގެ މަގާމު ދޫކޮށްލުމާމެދު އޭނާ ގޮތެއް ނިންމި ނަމަވެސް އެކަން އިއުލާނުކުރީ ޓީމުގެ މެނޭޖްމަންޓުގައި މަޝްވަރާ ކުރުމަށް ފަހު މެނޭޖްމަންޓުން އެގޮތަށް އެދުމުން ކަމަށެވެ. އޭނާ ބުނީ އެކަމާ މެދު އެއްވެސް މައްސަލައެއް ނެތް ކަމަށާއި އެކަން އިއުލާނު ކުރެވުނީ ވެސް އެންމެ ރަނގަޅު ވަގުތުގައި ކަމަށް ގަބޫލުކުރާ ކަމަށެވެ.

އާސެނަލްގެ ކޯޗުގެ މަގާމައި ހަވާލުވާނެ ކަމަށް އެންމެ ބޮޑަށް ބެލެވެނީ ބާސެލޯނާގެ ކުރީގެ ކޯޗު ލުއިސް އެންރިކޭއެވެ. ހަމައެހެންމެ އެ ޓީމަށް ކުރިން ކުޅުނު ޕެޓްރިކް ވިއެރާގެ އިތުރުން ޖަރުމަނުގެ ގައުމީ ޓީމުގެ ކޯޗު ޔޯކިމް ލޯ އަދި ރެއާލް މެޑްރިޑާއި އޭސީ މިލާންގެ ކުރީގެ ކޯޗު ކާލޯ އަންޗެލޯޓީ އެ މަގާމުން ފެނުމަކީ ވެސް އެކަށީގެންވާ ކަމެކެވެ. އާސެނަލްއިން ބުނެފައިވަނީ ވެންގާގެ ބަދަލުގައި އާ ކޯޗެއް ވަރަށް އަވަހަށް އެ މަގާމަށް އައްޔަނުކުރެވިގެންދާނެ ކަމަށެވެ.

އެންރިކޭއާ ގުޅޭގޮތުން ވާހަކަ ދައްކަމުން ވެންގާ ބުނީ އެންރިކޭއާމެދު އޭނާ ދެކެނީ ވަރަށް އުއްމީދީ ނަޒަރަކުން ކަމަށާއި އެހެން ނަމަވެސް ދެން އެ ޓީމުގެ ކޯޗުގެ މަގާމަށް އައްޔަނުކުރާ އެއްވެސް ފަރާތަކަށް ނުފޫޒު ފޯރުވަން ބޭނުންނުވާ ކަމަށެވެ.

އާސެނަލްގެ ކޯޗުގެ މަގާމާއި ވެންގާ ހަވާލުވީ 1996 ވަނަ އަހަރުގެ އޮކްޓޯބަރު މަހުގެ ތެރޭގައެވެ. ޕްރިމިއާ ލީގުގައި އޭނާ އެ ޓީމަށް 823 މެޗުގައި އިރުޝާދު ދީފައިވާއިރު މިއީ ރެކޯޑެކެވެ. ވެންގާގެ އިރުޝާދުގެ ދަށުން އާސެނަލްއިން 1549 ލަނޑު ޖަހާފައިވާއިރު އޭނާ އެ މަގާމު ދޫކޮށްލީ ސަޕޯޓަރުންގެ ފަރާތުން ވޭތުވެދިޔަ ދެ ސީޒަނުގައި އޭނާއަށް ކުރިމަތިވި ފާޑުކިޔުންތަކުގެ ސަބަބުން ކަމަށް ގިނަ ބަޔަކު ގަބޫލުކުރެއެވެ.

އުމުރުން 68 އަހަރުގެ ވެންގާ ވަނީ އާސެނަލްގައި އޭނާ ހޭދަކުރި ދުވަސްތަކުގައި އެ ޓީމަށް ތިން ޕްރިމިއާ ލީގާއި ހަތް އެފްއޭ ކަޕް ކާމިޔާބުކޮށްދީފައިވެއެވެ. ވެންގާގެ އިރުޝާދުގެ ދަށުން އާސެނަލްއިން ހޯދި އެންމެ ބޮޑު ކާމިޔާބަކީ 2004 ވަނަ އަހަރުގެ ޕްރިމިއާ ލީގުގެ ތަށި އެއްވެސް މެޗަކުން ބަލިނުވެ އުފުލާލުމެވެ.