ކިމް ވޯލްގެ މަރު: ކިމް ވޯލް މަރާލިކަން މޭޑްސެންގެ މައްޗަށް ސާބިތުވެއްޖެ

ސްވިޑެންގެ ނޫސްވެރިޔާ ކިމް ވޯލް މަރާލިކަން ސާބިތުވެ ޑެންމާކުގެ އިންވެެންޓަރ ޕީޓަރ މޭޑްސެން، ޕެރޯލްގެ ފުރުސަތު ނުލިބޭ ގޮތަށް އުމުރަށް ޖަލަށްލުމަށް ހުކުމްކޮށްފިއެވެ.

އުމުރުން 30 އަހަރުގެ ކިމް ވޯލް މަރާލަން މޭޑްސެން ރާވާފައި އޮތީ އޭނާ ނޭވާ ހާސްކޮށްލައިގެން ނުވަތަ ވައިނޮޅި ބުރިކޮށްލައިގެން ކަމަށް ކޯޕަންހޭގަންގެ ކޯޓުން ބުނެފައި ވެއެވެ.

އުމުރުން 47 އަހަރުގެ މޭޑްސެން ވަނީ އޭނާގެ މައްޗަށް އިއްވި ހުކުމް އިސްތިއުނާފް ކުރާނެ ކަމަށް ބުނެފައެވެ.

މިދިޔަ އޯގަސްޓް މަހު ކިމްވޯލް މަރާލާފައި ވަނީ މޭޑްސެން އަމިއްލައަށް އުފެއްދި ސަބްމެރިންގައި ގެންދިއުމަށް ފަހުއެވެ.

ވޯލްގެ ގުނަވަންތައް ހުޅުހުޅުން ބުރިކުރި ކަމަށް ކުރާ ތުހުމަތު މޭޑްސެން ކުރިން ދޮގުކޮށްފައިވާއިރު އޭރު އޭނާ ވަނީ ވޯލް މަރުވެފައި ވަނީ ސަބްމެރިންގެ ކުޑަދޮރެއް އޭނާގެ ބޮލަށް ވެއްޓިގެން ކަމަށް ވެސް ބުނެފައެވެ.

ޑައިވަރުންނަށް އޭނާގެ ބޯ ފެނިފައި ވަނީ ދެ ފަޔާ އަންނައުނާ އެކު ގޯންޏެއްގައި ފައްތާފައި ހުއްޓައި ކޯޕަންހޭގަންގެ ދެކުން ކޮގް ބޭއިން މިދިޔަ އަހަރުގެ އޮކްޓޯބަރު މަހުގެ ކުރީކޮޅުއެވެ.

މި ބައިތައް ފެނިފައި ވަނީ ޕީޓަރ މޭޑްސެންގެ ސަބްމެރިންގައި ވޯލް ދިޔަތާ 11 ދުވަސް ފަހުން އޭނާގެ ހަށިގަނޑުގެ ކަރުން ފެށިގެން ފޫޅާ ދެމެދުގެ ބައި ފެނުނު ސަރަހައްދާ ދުރު ނޫން ސަރަހައްދަކުންނެވެ.

އޮކްޓޯބަރު މަހުގެ 6 ވަނަ ދުވަހު ފެނުނު ގޯނިތައް ފައްތާފައި ހުރީ ދަގަނޑުތަކެއް އަޅައިގެން ކަމަށް ކޯޕަން ހޭގަންގެ ޕޮލިސް އިންސްޕެކްޓަރ ޖެންސް މޮލަރ ވިދާޅުވެފައިވެއެވެ.

ވޯލްގެ ހަށިގަނޑުގެ ކަރުން ތިރި ފޫޅާ ދެމެދު ފެނިފައި ވަނީ އޯގަސްޓް މަހުގެ 21 ވަނަ ދުވަހުއެވެ.

ޕޯސްޓް މޯޓަމް ތަހުލީލުން ދައްކާ ގޮތުގައި އޭނާގެ ޖިންސީ ގުނަވަނާއި މޭކަށިތަކުގައި ވަޅިން ހަމަލާދީ ޒަޚަމް ކޮށްލާފައި ހުރިއިރު ބެލެވޭ ގޮތުގައި އެއީ "މަރުވަނިކޮށް ނުވަތަ މަރުވިތާ ކުޑަވަގުތުކޮޅެއްގެ ތެރޭ" ދީފައިވާ ހަމަލާތަކެކެވެ.

އުމުރުން 30 އަހަރުގެ ވޯލް ދިރި ހުއްޓައި އެންމެ ފަހުން ފެނިފައި ވަނީ އޯގަސްޓްމަހުގެ 10 ވަނަ ދުވަހު ހަވީރު މޭޑްސެން އަމިއްލައަށް އުފައްދާފައިވާ ސަބްމެރިންއެއްގައި އޭނާއާ އެކު އެ އުފެއްދުމާ ބެހޭ ގޮތުން ރިޕޯޓެއް ތައްޔާރު ކުރުމަށް ފުރަނިކޮށެވެ.

އެ ދަތުރުން އޭނާ އެނބުރި ނައުމުން އެކަން ސަމާލުކަމަށް ގެނެސްފައި ވަނީ ވޯލްގެ ލޯބިވެރިޔާއެވެ.

އެންމެ ފުރަތަމަ މޭޑްސެން ބުނެފައި ވަނީ ކޯޕަން ހޭގަންއަށް ވޯލް ސަލާމަތުން ގެންގޮސްދީފައިވާ ކަމަށެވެ. ނަމަވެސް ފަހުން އޭނާ ވަނީ ވާހަކަ ބަދަލުކޮށް "ނުރައްކާ އެކްސިޑެންޓެއް" ހިނގީ ކަމަށާއި ވޯލްސް ކަނޑަށް ދޫކޮށްލުމަށް ފަހު ސަބްމެރިން އަޑިޔަށްދާން ދޫކޮށްލައި އޭނާގެ ފުރާނަ ސަލާމަތްކުރީ ކަމަށް ބުނެފައެވެ.