ޓާގެޓަކީ މަޖިލީހަށް ކުރިމަތިލުން: ނިއުމާ
23 އެޕްރީލު 2018 | ހޯމަ 04:42އޭނާ ބޭނުންވަނީ ހެޔޮހިތުން ގައުމަށް ޚިދުމަތް ކޮށްދިނުން
ނިއުމާ މުހައްމަދު
ޓާގެޓަކީ މަޖިލީހަށް ކުރިމަތިލުން ކަމަށް ދިވެހި ފިލްމީ ދާއިރާގައި އެންމެ މަގުބޫލު އެއް ތަރި ނިއުމާ މުހައްމަދު ބުނެފިއެވެ.
ރާއްޖެޓީވީގެ ފަސް ސުވާލު ޕްރޮގްރާމުގައި ނިއުމާ ބުނީ އޭނާ ބޭނުން ވަނީ ހެޔޮހިތުން ގައުމަށް ޚިދުމަތް ކޮށްދޭން ކަމަށާއި އެހެން ކަމުން މަޖިލީހަށް ކުރިމަތިލުމަކީ ޓާގެޓް ކަމަށެވެ.
ނިއުމާ މަޖިލީހަށް ކުރިމަތިލާނެ ކަމަށް އިއުލާން ކޮށްފައިވާއިރު އޭނާ ކުރިމަތިލާނީ މަޖިލީހުގެ ކޮން ދައުރަކަށް ކަމަށް ހާމަކޮށްފައެއް ނުވެއެވެ.
ރާއްޖޭގައި ފެބްރުއަރީ މަހުގެ 5 ވަނަ ދުވަހު އިއުލާން ކުރި ކުއްލި ނުރައްކަލުގެ ހާލަތާއި ގުޅުވައިގެން ނިއުމާ ކޮށްފައިވާ ޓްވީޓުތަކަށް ސަރުކާރަށް ނިސްބަތްވާ ފަރާތްތަކުގެ ފާޑު ކިޔުން ވެސް އަމާޒުވިއެވެ. ނިއުމާ އެޓުވީޓުގައި ބުނެފައިވަނީ "ރާއްޖޭގައި ކުއްލި ނުރައްކަލުގެ ހާލަތު އޮންނަން ޖެހޭ ކަމަށް ގަބޫލު ނުކުރަން" ކަމަށެވެ. ނިއުމާގެ އެޓުވީޓަށް ފާޑުކިޔުންތައް އަމާޒުވުމުން އޭނާ ބުނެފައިވަނީ ގައުމާމެދު އެއްޗެކޭ ބުނުމަށް ވަކި ފެންވަރެއްގެ ޑިގްރީއެއް އޮންނަން ނުޖެހޭނެ ކަމަށެވެ.
ފަސް ސުވާލު ޕްރޮގްރާމުގައި ނިއުމާ ބުނީ އޭނާ ޓްވީޓެއް ކޮށްގެން އެވަރުވާނެ ކަމަށް ހީ ނުކުރާ ކަމަށެވެ. އަދި އޭނާ އެވަރުއެޗެއް ބުނެގެން "ހަޖަމް" ނުވާނެ ކަމަށް ގަބޫލު ނުކުރެވުނު ކަމަށް ނިއުމާ ބުންޏެވެ.
"ވަރަށްބައިވަރު މީހުން ސޯޝަލްމީޑިއާގައި ވަރަށް ހަޑިކޮށް ބަވާ މައްޗަށް ދާން ފެށީމައި އަހަރެން ވެސް މައިތިރިވެލީ. ދެން އާއިލާގެ މީހުންނަށް އެ އެއްޗެހި ފެނި ރައްޓެހިންނަށް ފެނި ރައްޓެހިން އެވާހަކަ ދައްކާ އުޅެން ފެއްޓީމަ ކުޑަކުޑަކޮށް، އެކަމަކުވެސް ސޯޝަލްމީޑިއާގައި އަހަރެމެން ބޭނުންއެއްޗެއް ޖަހާނީ، ދެން ވެސް ޖަހާނަން އަދިވެސް ޖަހާނަން." ނިއުމާ ބުންޏެވެ.
ނިއުމާ ބުނީ މަޖިލީހުގައި މަސައްކަތް ކުރުމަށް ފުރުސަތު ލިބިއްޖެނަމަ މަސައްކަތް ކުރާނީ ރިޝްވަތާއި ނުލައި ކަމަށެވެ.
