ނިއުމާގެ ނިވައިރޯޅީގެ ޝޫޓިން މިމަހު ފަށަނީ

ރާއްޖޭގެ ފިލްމީ ދާއިރާގެ މަޝްހޫރުތަރި ނިއުމާ މުހައްމަދުގެ އެންމެ ފަހުގެ ފިލްމު ނިވައިރޯޅީގެ ޝޫޓިން މިމަހުގެތެރޭގައި ފަށާނެއެވެ.

މިފިލްމުގެ ޝޫޓިން ފެށުމަށްހަމަޖެހިފައި ވަނީ ރ.އިނގުރައިދޫގައެވެ. ނިއުމާ ބުނީ ފިލްމުގެ ފެށުމަށް މިމަހުގެ 26 ގައި އިނގުރައިދޫއަށް ފުރާނެ ކަމަށެވެ.

ފިލްމުގެ ފައިނަލް ކާސްޓުންގެ ތެރޭގައި ހިމެނެނީ އައިމިނަތު ރިޝްފާ، އަހްމަދު ޒިޔާ، އަހްމަދު ސައީދު، އަހްމަދު އަޒްމީން (އަޒޭ)، ނާޝިދާ މުހައްމަދު (ނާއްކޮ)، އަހްމަދު އާސިމް، އައިމިނަތު ނިޝާ ރަޝީދު، އަޖްނާޒް އަލީ، އިސްމާއިލް ޒާހިރު ، އައިމިނަތު ރަޝީދާ (އައިންތު)، މަރިޔަމް ޝަކީލާ، މަރިޔަމް ހަލީމް، ޔޫސުފް ޝަފީއު (ޔޫއްޕެ)، ފާތިމަތު ޒީނަތު (ޒީތު)، އަދި ނިއުމާ މުހައްމަދެވެ.

ފިލްމީ ދާއިރާއިން ރިޓަޔާ ވެއްޖެކަމަށް ނިއުމާ ނިންމާފައިވަނީ އޭނާގެ 40 ވަނަ އުފަން ދުވަހުގައެވެ. ހަމަ އެރޭގައި އޭނާ ވަނީ ނިވައިރޯޅި ފިލްމަކީ އޭނާގެ އެންމެ ފަހުގެ ފިލްމު ކަމަށް ބުނެ ފިލްމުގެ ޓީޒާ ލޯންޗު ކޮށްފައެވެ.

މޫމިން ފުއާދުގެ ސްކްރިޕްޓެއްގެ މައްޗަށް އުފައްދާ މި ފިލްމު ޑައިރެކްޓު ކުރަނީވެސް އޭނާއެވެ. އަދި ޕްރޮޑިއުސް ކުރަނީ ނިއުމާއެވެ. މި ފިލްމު ރިލީޒް ކުރުމަށް ހަމަޖެހިފައިވަނީ މިއަހަރުގެ އޮކްޓޯބަރު މަހުގެ ތެރޭގަ އެވެ.