މިމަހުގެ 20 ވަނަ ދުވަހު ދިވެހި ފިލްމީ ތަރި ނިއުމާ މުހައްމަދުގެ 40 ވަނަ އުފަންދުވަހުގައި  އޭނާ ވަނީ ބެލުންތެރިންނަށް ތިން ސަޕްރައިޒެއް ދޭން ނިންމާފައެވެ.

ނިއުމާ ބުނީ އޭނާގެ "3 ސަޕްރައިޒް" ދޭނީ 20 ވަނަ ދުވަހުގެ ރޭ ދަރުބާރުގޭގައި އޮންނަ ހަފްލާގައި ކަމަށެވެ. އެ ހަފްލާ އޮންނާނީ ދައުވަތު އަރުވާފައިވާ ފަރާތްތަކާ އެކީގައި ކަމަށް ނިއުމާ ބުންޏެވެ. 

ފަހަރުގައި އޭގެތެރެއިން އެއް ސަޕްރައިޒަކީ އޭނާގެ "ސެލެބްރޭޓިން 20" ގެ ލަވަ އަލްބަމް ކަމަށްވެސް ވެދާނެއެވެ. އެއީ  އޭނާ ފިލްމީ ދާއިރާގައި މަސައްކަތް ކުރާތާ 20 އަހަރު ފާހަގަ ކުރަން "ސެލެބްރޭޓިން 20" ގެ ނަމުގައި ކަލެކްޝަން އަލްބަމެއްވެސް ބެލުންތެރިންނަށް ދޫކޮށްލަން އުޅޭ ކަމަށް މީގެ ކުރިން ވަނީ ބުނެފައެވެ. އެހެންކަމުން އެއީ  "3 ސަޕްރައިޒް" ގެ ތެރެއިން އެއް ސަޕްރައިޒަކަށްވުމަކީ އެކަށީގެންވާކަމެކެވެ. "ސެލެބްރޭޓިން 20" ގައި ހިމެނެނީ ހަތްލަވައެވެ.

ކޮންމެއަކަސް ނިއުމާގެ "3 ސަޕްރައިޒް" އެނގެން ދެން އޮތީ އެންމެ 3 ދުވަހެވެ.

1995 ވަނަ އަހަރު ދިވެހި ފިލްމީ ދާއިރާއިން ފެނިގެންދިޔަ ނިއުމާ ވަނީ 1000 އަށް ވުރެ ގިނަ ލަވަ ބެލުންތެރިންނާއި ހަމައަށް ގެނެސްދީފައެވެ. އަދި އޭގެ އިތުރުން އެތަކެއް ޑްރާމާ ސީރީޒް އަކާއި އެތަކެއް ފިލްމެއްގައި ވަނީ ހަރަކާތްތެރި ވެފައެވެ. ނިއުމާ ކުޅެފައިވާ ފިލްމު ތަކުގެތެރޭގައި

1998 ވަނަ އަހަރު ނިކުތް ޑައިރެކްޓަރ ޢީސާ ޝަރީފްގެ "ފަތިސް ހަނދުވަރު"، 1999 ވަނަ އަހަރު ނިކުތް ފަރިވާ ފިލްމްސްގެ "ބަދަލު"، 2002 ވަނަ އަހަރު ނިކުތް ޑައިރެކްޓަރ ފީރޯޒް އައިޝަތު ގެ "ހިތް އެދެނީ"، 2003 ވަނަ އަހަރު ނިކުތް ޑައިރެކްޓަރ ޢީސާ ޝަރީފްގެ "ގިނި ހިލަ"، 2004 ވަނަ އަހަރު ނިކުތް ޑައިރެކްޓަރ ފާތިމަތު ނަހުލާގެ "ކަލާޔާ ނުލާ"، 2005 ވަނަ އަހަރު ނިކުތް ޑައިރެކްޓަރ އަޙުމަދު ނިމާލް ގެ "ދަރިންނަށްޓަކައި"، 2006 ވަނަ އަހަރު ނިކުތް ޑައިރެކްޓަރ އަހުމަދު ނިމާލް ގެ "ހިޔަނި"، އަދި 2008 ވަނަ އަހަރު ނިކުތް ޑައިރެކްޓަރ ފާތިމަތު ނަޙުލާގެ "ޔޫސުފް" ފަދަ ފިލްމްތައް ހިމެނެއެވެ.