ނިއުމާގެ ވަދާއީ ފިލްމު، ނިވައިރޯޅީގެ ޝޫޓިން ފަށައިފި

މަޝްހޫރު ދިވެހި ބަތަލާ ނިއުމާ މުހައްމަދު ކުޅޭނެ އެންމެ ފަހު ފިލްމު، "ނިވައިރޯޅީ"ގެ ޝޫޓިން ފަށައިފިއެވެ.

މޫމިން ފުއާދުގެ ވާހަކައަކަށް ނިއުމާ ޑައިރެކްޓު ކުރާ އެ ފިލްމުގެ ލީޑް ކާސްޓުންނަކީ ނިއުމާ އާއި ޔޫއްޕެއެވެ. އެ ފިލްމުގެ ޕްރޮޑިއުސަރަކީ ވެސް ނިއުމާއެވެ.

ފަންސަވީސް ދުވަހުގެ ތެރޭގައި ޝޫޓިން ނިންމުމަށް ހަމަޖެހިފައިވާ އެ ފިލްމްގެ ހުރިހާ އިންޑޯ މަންޒަރެއް ނެގުމަށް ހަމަޖެހިފައި ވަނީ ރ. އިނގުރައިދޫގައެވެ. އަދި އެ އަތޮޅު އުނގޫފާރާއި މާލޭގައި ވެސް ފިލްމުގެ ބައެއް މަންޒަރުތަކެއް ނެގުމަށް ހަމަޖެހިފައިވާ ކަމަށް ނިއުމާ "ރާއްޖެއެމްވީ"އަށް ބުންޏެވެ.

ފިލްމްގެ 15 ޕަސެންޓް މިހާރު ނިމިފައިވާކަމަށް އޭނާ ބުންޏެވެ.

އެ ފިލްމުގެ ތަރިންނަކީ ޔޫސުފް ޝަފީއު (ޔޫއްޕެ)، ފާތިމަތު ޒީނަތު (ޒީތު)، ނިއުމާ މުހައްމަދު، އަމިނަތު ރިޝްފާ، އަހްމަދު ޒިޔާ، އަހްމަދު ސައީދު، މަރިޔަމް ޝަކީލާ، މަރިޔަމް ހަލީމް، އަމިނަތު ރަޝީދާ (އައިންތު)، އަހްމަދު އަޒްމީލް (އަޒޭ)، ނާޝިދާ މުހައްމަދު (ނާއްކޮ)، އަހްމަދު އާސިފް، އިސްމާއިލް ޒާހިރު، އާމިނަތު އިޝާލް ރަޝީދު އަދި އަޖްނާޒް އަލީއެވެ.

އެ ފިލްމަކީ ދިވެހި ފިލްމު އިންޑަސްޓްރީގައި މެދުނުކެނޑި 20 އަހަރު ގުނަމުންދާ އެންމެ ކުޅަދާނަ އެއް ބަތަލާ، ނިއުމާ މުހައްމަދުގެ ވަދާއީ ފިލްމެވެ.