މަޝްހޫރު ބަތަލާ ނިއުމާ މުހައްމަދުގެ 40 ވަނަ އުފަންދުވަހުގެ "3 ސަޕްރައިޒް" އެންމެ ފަހުން ދީފިއެވެ.

ހުކުރުދުވަހުގެ ރޭ ދަރުބާރުގޭގައި ބޭއްވި ހަފްލާގައި ނިއުމާ ދިން އެންމެ ބޮޑު "ސަޕްރައިޒަކީ" އޭނާ ފިލްމު ކުޅުން ހުއްޓާލާނެ ކަމަށް ބުނި "ސަޕްރައިޒް"އެވެ.

"އަޅުގަނޑު އެކްޓިން ދާއިރާއިން މިއަދު ރިޓަޔާ ކުރާއިރު އަޅުގަނޑު އެދެނީ ދިވެހި ފިލްމީ އިންޑަސްޓްރީއަށް އަދަށް ވުރެ ފެހި މާދަމާއެއް" ކަމަށެވެ.  

ނިއުމާގެ ދެވަނަ ސަޕްރައިޒަކީ އޭނާ ފިލްމު ކުޅެން ހުއްޓާލާނީ "ނިވައިރޯޅި" ކިޔާ ފިލްމެއް ކުޅުމަށް ފަހުގައި ކަމެވެ. އެ ފިލްމު ދައްކާނީ އަންނަ އަހަރުގެ އޮކްޓޯބަރު މަހު ކަމަށް ނިއުމާ ވަނީ ބުނެފައެވެ. އެ ފިލްމަކީ އޭނާ އެކްޓަރެއްގެ ގޮތުގައި ފެންނާނެ އެންމެ ފަހު ފިލްމް ކަމަށް އޭނާ ބުންޏެވެ. 

ތިންވަނަ ސަޕްރައިޒަކީ ނިއުމާގެ "ބައޮގްރަފީ"އެވެ. ނިއުމާ ބުނީ އޭނާގެ 40 ވަނަ އުފަންދުވަހުގެ މުނާސަބަތާ ގުޅުވައިގެން ނެރޭ މި ބައޮގްރަފީގައި އޭނާގެ ނޭނގޭ އެތަކެއް ވާހަކަތަކެއް ހިމެނޭނެ ކަމަށެވެ. ފިލްމީ ދާއިރާގައި އޭނާ ހޭދަކުރި ދިގު މުއްދަތަކީ ފަސޭހަ ދުވަސްތަކެއް ނޫން ކަމަށާއި އެ "ބައޮގްރަފީ" ގައި އެހުރިހާ ވާހަކައެއް ހިމަނާފައި ވާނެ ކަމަށް ނިއުމާ ބުންޏެވެ.  

މި ހަފްލާގައި ނިއުމާގެ ފިލްމީ ހަޔާތުގައި 20 އަހަރުވުމާއި ގުޅިގެން ވަނީ "ސެލެބްރޭޓިން 20" ގެ ނަމުގައި ލަވަ އަލްބަމެއް ނެރެފައެވެ. މި އަލްބަމުގައި ނިއުމާގެ އަމިއްލަ އަޑުން ކިޔާފައިވާ ލަވައެއް ވެސް ވަނީ ހިމަނާފައެވެ. "ސެލެބްރޭޓިން 20" ގައި ހިމެނެނީ ހަތްލަވައެވެ.

ދަރުބާރު ގޭގައި ބޭއްވި މި ހަފްލާގައި މުނިފޫހިފިލުވުމުގެ ދާއިރާގައި މަސައްކަތް ކުރާ ގިނަ ބަޔަކު ބައިވެރިވެފައި ވެއެވެ. ހަފްލާގައި ނިއުމާ ވަނީ ގިނަ ފަރާތްތަކަކަށް ޝުކުރު އަދާކޮށްފައެވެ. 

ދިވެހި ފިލްމީ ދާއިރާއިން 1995 ވަނަ އަހަރު ފެނިގެންދިޔަ ނިއުމާ ވަނީ 1،000 އަށް ވުރެ ގިނަ ލަވަ ބެލުންތެރިންނާ ހަމައަށް ގެނެސްދީފައެވެ. އަދި އޭގެ އިތުރުން އެތަކެއް ޑްރާމާ ސީރީޒްއަކާއި އެތައް ފިލްމެއްގައި ވަނީ ހަރަކާތްތެރި ވެފައެވެ.